விடுதலைப் புலிகள்: தங்களது தலைவரின் “கடத்தல்” குறித்து மலேசியா விளக்க வேண்டும்

கைது குறித்து ஐஜிபிக்கு தெரியாது


தங்களது புதிய தலைவர் மலேசியாவில் எவ்வாறு கைது செய்யப்பட்டு, விசாரிக்கப்படுவதற்கு தாயகம் கொண்டு செல்லப்பட்டாரென்பது குறித்து விசாரணை செய்யும்படி தமிழ் ஈழ விடுதலைப் புலிகளின் மூத்த தலைவர் விசுவநாதன் ருத்ரகுமாரன் இன்று மலேசியாவை கேட்டுக் கொண்டுள்ளார். விடுதலைப் புலிகளின் புதிய தலைவர் செல்வராசா பத்மநாதன் “கடத்தப்பட்டது” குறித்த விவரங்களை மலேசியா உடனடியாக வெளியிட வேண்டும் என்றாரவர்.

பத்மநாதன் எவ்வாறு கைது செய்யப்பட்டாரென்பதை தெரிவிக்க கொழும்புவில் அதிகாரிகள் மறுத்து விட்டனர். ஆனால், கடந்த புதன்கிழமை, அவர் கோலாலம்பூரில் கைது செய்யப்பட்டு, பாங்காக் வாயிலாக இலங்கைக்குக் கொண்டு செல்லப்பட்டதாக தாய்லாந்து அரசாங்கம் கூறியது.

“அந்த விவகாரம் குறித்த தகவல்களை மலேசிய அரசாங்கம் கொண்டிருக்காவிட்டால், அது குறித்த முழு விசாரணையை மேற்கொள்ளும்படி நாங்கள் கோருகிறோம்”, என மின்னஞ்சல் வழி அனுப்பிய அறிக்கையில் ருத்ரகுமாரன் கூறினார்.

ஆயினும், அந்த கைது குறித்து தமக்கு எதுவும் தெரியாதென மலேசியப் போலீஸ் படைத் தலைவர் கூறியுள்ளார்.

“அது குறித்து எனக்குத் தெரியாது”, என்று கடந்த வெள்ளிக்கிழமையன்று கோலாலம்பூரில் ஏஎப்பியிடம் போலீஸ் படைத் தலைவர் முசா ஹசான் தெரிவித்தார்.

இயக்கத்துக்கு புத்துயிரூட்ட முயற்சி

கடந்த மே மாதம் இறுதிக் கட்ட ஈழப் போரில் விடுதலைப் புலிகள் தலைவர் வேலுப்பிள்ளை பிரபாகரன் கொல்லப்பட்டதை தொடர்ந்து, புலிகள் இயக்கத்தின் புதிய தலைவராக பத்மநாதன் பொறுப்பேற்றார். அவர், வெளிநாடுகளிலிருந்து அந்த இயக்கத்துக்கு புத்துயிரூட்ட முயலுவதாக கூறப்படுகிறது.

இதனிடையே, இலங்கையில் பத்மநாதன் விசாரிக்கப்படுவதாக, கடந்த வெள்ளிக்கிழமை, இலங்கை தற்காப்பு அமைச்சின் பேச்சாளர், ஊடகவியலாளர்களிடம் தெரிவித்தார். ஆனால் அவர் எவ்வாறு கைது செய்யப்பட்டாரென்பதை விவரிக்க மறுத்து விட்டார்.

பத்மநாதன் வயது 55, ஆயுதக் கடத்தலுக்காக அனைத்துலகப் போலீசாராலும், 1991ல் ராஜீவ் காந்தி கொலை தொடர்பாக இந்திய அரசாங்கத்தாலும், தேடப்பட்டு வந்தார். ஈராண்டுகளுக்கு முன்னர் தாய்லாந்திலிருந்து மலேசியாவுக்கு அவர் தப்பியோடியதாக நம்பப்படுகிறது. கடந்த மே மாதம் விடுதலைப் புலிகள் தோற்கடிக்கப்பட்டதை தொடர்ந்து, பிரிட்டிஷ் ஊடகத்துக்கு அவர் பேட்டி வழங்கியுள்ளார்.

கணிசமான நிதி திரட்டும் கட்டமைப்பு

வெளிநாடுகளில் விடுதலைப் புலிகளின் கணிசமான சொத்துக்களும், வெளிநாடுகளில் வாழும் தமிழ் மக்களிடையே நிதி திரட்டும் கட்டமைப்பும் பத்மநாதனின் கட்டுப்பாட்டில் உள்ளதாக நம்பப்படுகிறது .

விடுதலைப் புலிகள் இயக்கம் மறுசீரமைப்புச் செய்யப்பட்டு, “நாடு கடந்த தேசிய அரசாங்கம்” அமைக்கப்படவிருக்கிறது என்றும், அதற்கு தாமே தலைமை வகிக்கப் போவதாகவும் கடந்த ஜூன் மாதம் வெளிநாடுகளில் வசிக்கும் இதர விடுதலைப் புலிகள் தலைவர்களுடன் சேர்ந்து பத்மநாதன் ஓர் அறிவிப்பை வெளியிட்டார்..

“தமிழ் ஈழ மக்களின் போராட்டம் ஒரு புதிய பரிமாணத்தை அடைந்துள்ளது”, என அப்போது அவர் தெரிவித்தார். “நாம் முன்னோக்கிச் சென்று, சுதந்திரத்துக்கான நமது அரசியல் லட்சியக் கனவை சாதிப்பதற்கு இப்போது காலம் கனிந்துள்ளது”, என்றாரவர்.