மனைவியால் சிக்கிய ஹெட்லி

ரபீக் · ரபீக் Mon Oct 18, 2010 10:30 am

2008 ஆம் ஆண்டு மும்பை தாக்குதல் சம்பந்தமாக கைது செய்யப்பட்டுள்ள டேவிட் ஹெட்லியைப் பற்றி அவரது மனைவியர் ஏற்கனவே அமெரிக்க உளவுத்துறையினரிடம் எச்சரித்திருந்தனர் என்ற தகவல் தற்போது வெளியாகியுள்ளது. டேவிட் ஹெட்லிக்கு மூன்று மனைவியர். அதில் இருவர் ஹெட்லி லஷ்கர் ஏ தொய்பாவுடன் தொடர்பு வைத்திருந்துள்ளதாக தெரிவித்துள்ளனர்.

2005 ஆம் ஆண்டு அவருக்கும் அவரது முதல் மனைவிக்கும் கருத்து வேறுபாடு ஏற்பட்டுள்ளது. அவரது மனைவி, ஹெட்லி பாகிஸ்தானில் லஷ்கர் ஏற்பாடு செய்யும் பயிற்சி முகாம்களில் கலந்து கொண்டிருந்ததாக அமெரிக்க உளவுத்துறையான FBI யிடம் தெரிவித்ததையடுத்து அவர் கைது செய்யப்பட்டார். பின்னர் அவர் விடுதலை செய்யப்பட்டு விட்டார்.

2007 ஆம் ஆண்டு அவரது இரண்டாவது மனைவி மொரோக்கா நாட்டைச் சார்ந்த பாய்ஷா ஒதல்ஹா என்பவர் இஸ்லாமாபாத்திலுள்ள அமெரிக்க தூதரகத்தில் ஹெட்லியின் தீவிரவாத தொடர்பு பற்றி தெரிவித்திருந்தார். ஆனால் இது சம்பந்தமாக தூதரகம் எந்த நடவடிக்கைகளையும் எடுக்கவில்லை என பாய்ஷா குற்றம் சாட்டினார். இந்த தகவல்களை அமெரிக்காவிலிருந்து வெளிவரும் நியுயார்க் டைம்ஸ் மற்றும் வாஷிங்டன் போஸ்ட் பத்திரிகைகள் தெரிவித்துள்ளன.

இந்த ஆண்டு மார்ச் மாதம் ஹெட்லி மும்பைத் தாக்குதலுக்கும் தனக்கும் சம்பந்தமிருப்பதாக ஒப்புக் கொண்டிருந்தார். லஷ்கர் ஏ தொய்பா தாக்குதல் நடத்த ஏற்ற இடத்தை அடையாளம் காட்டும் பொறுப்பை தான் மேற்கொண்டதாக அவர் தெரிவித்திருந்தார். இது சம்பந்தமாக கருத்து தெரிவித்த அமெரிக்க உள்துறை அமைச்சகத்தைச் சார்ந்த கிரவ்லி என்பவர் 2008 ஆம் ஆண்டு தங்களுக்கு கிடைத்த தகவல்களை இந்தியாவுடன் பகிர்ந்து கொண்டதாக தெரிவித்துள்ளார். மும்பைத் தாக்குதல் சம்பந்தமாக துல்லியமான தகவல்கள் கிடைத்திருந்தால் அதனை கண்டிப்பாக இந்திய அரசுக்கு தெரிவித்திருப்போம் என அவர் கூறினார்.

ஹெட்லியின் மனைவியர் கொடுத்த தகவல்கள் பொதுவானவையாக இருந்ததாகவும் எந்தத் தாக்குதலையும் அவர்கள் குறிப்பிட்டு சொல்லவில்லை என்றும் அமெரிக்க அரசு அதிகாரிகள் தெரிவித்துள்ளனர்.

இந்நேரம்