இலங்கைத் தமிழரின் உயிரைக் குடித்த லண்டன் வைத்தியசாலை! சட்ட நடவடிக்கை எடுப்பார் என மகன் சபதம்

”எனது தந்தையார் உயிர் இழந்தமைக்கு வைத்தியசாலையில் இடம்பெற்ற தவறுதான் காரணம். ரோயல் வைத்தியசாலைக்கு எதிராக சட்ட நடவடிக்கை எடுப்பேன்.

எமது குடும்பத்தைப் போல் எவரும் எதிர்காலத்தில் பாதிக்கப்படக் கூடாது.” இவ்வாறு தெரிவித்துள்ளார் பிரித்தானியாவில் ஹெண்டன் நகரில் வாழும் இலங்கைத் தமிழரான நாகராஜா சிவா.

இவரது தந்தையார் என்.நாகராஜா. வயது 81. ஓய்வு பெற்ற மருத்துவ உத்தியோகத்தர். 16 பேரப் பிள்ளைகள் இவருக்கு. இவர் லண்டன் ரோயல் வைத்தியசாலையில் கடந்த ஜூன் மாதம் சிகிச்சைக்காகச் சேர்க்கப்பட்டார்.

இரத்தத்தில் சீனி குறைந்தமையே இவரது பிரச்சினையாக இருந்தது. அங்கு இவரை CT scan பண்ண தீர்மானித்தனர். நாகராஜா சிறுநீரகக் கோளாறும் உடையவர். எனவே scan பரிசோதனையின்போது iodine dye ஐ இவருக்கு பயன்படுத்துகின்றமை ஆபத்தானது.

எனவே iodine dye ஐ பயன்படுத்த வேண்டாம் என்று கடமையில் இருந்த வைத்தியர்களுக்கு நாகராஜா கண்டிப்பான வேண்டுகோள் விடுத்தும் இருந்தார். இவருக்கு iodine dye பயன்படுத்தப்படக் கூடாது என வைத்தியர்கள் குறிப்புப் புத்தகத்தில் எழுதிக் கொண்டார்கள்.

ஆனால் ஜூன் 25 ஆம் திகதி இரவு நேர பதில் கடமைக்கு வந்த வைத்தியர் ஏற்கனவே காலை முழுவதும் வேலை செய்து சோர்வடைந்து இருந்தார். குறிப்புப் புத்தகத்தை சரியாக வாசிக்கத் தவறி விட்டார்.

இவ்வைத்தியரின் அறிவுறுத்தலின் பேரில் iodine dye நாகராஜாவின் உடலில் ஊசி மூலம் ஏற்றப்பட்டது. பின் scan பரிசோதனையும் இடம்பெற்றது. 10 நாட்கள் கழித்து நாகராஜா இறந்து விட்டார்.

நாகராஜாவின் மரணத்துக்கு iodine dye உடலில் ஏற்றப்பட்டமையே காரணம் ஆகி விட்டது. இம்மரணம் தொடர்பாக நீதிமன்ற விசாரணையும் இடம்பெற்றுக் கொண்டிருக்கின்றது.

தந்தையின் மரணத்துக்கு காரணமான வைத்தியசாலைக்கு எதிராக சட்ட நடவடிக்கை எடுத்தே தீருவார் என்று மகன் சிவா விடாப்பிடியாக உள்ளார்.