காமன்வெல்த் போட்டி-100 பதக்கங்களை அள்ளுமா இந்தியா?

by ரபீக் Thu Oct 14, 2010 11:14 am

காமன்வெல்த் போட்டியின் கடைசி நாளான இன்று இந்தியா 100 பதக்கங்களைப் பெற்று புதிய சாதனை படைக்குமா என்ற எதிர்பார்ப்பு வலுத்துள்ளது.

இதுவரை இல்லாத அளவுக்கு பதக்க வேட்டையில் இந்த முறை பின்னி எடுத்து விட்டது இந்தியா. தங்கப் பதக்கங்களைப் பெற்றதில் மான்செஸ்டர் காமன்வெல்த் போட்டியில் நிகழ்த்தியிருந்த சாதனையை இந்தமுறை டெல்லியில் வைத்து முறியடித்து விட்டனர் இந்திய வீரர், வீராங்கனைகள்.

இந்த நிலையில் தற்போது 100 பதக்கங்களைப் பெறுமா இந்தியாஎன்ற எதிர்பார்ப்பு வலுத்துள்ளது. தற்போது 36 தங்கம், 26 வெள்ளி, 34 வெண்கலப் பதக்கம் என 96 பதக்கங்களுடன் உள்ளது இந்தியா.

இதுவரை 2வது இடத்தில் இருந்த இந்தியா தற்போது 3வது இடத்தில் உள்ளது. 2வது இடத்தை இங்கிலாந்துப் பிடித்துள்ளது. அது 37 தங்கப் பதக்கங்களுடன் 2வது இடத்தில் உள்ளது.

மேலும் 2 தங்கப் பதக்கங்களை இந்தியா வென்றால் 2வது இடத்தைப் பிடிக்கலாம். மேலும் 4 பதக்கங்களை வென்றால் மொத்தம் 100 பதக்கங்களை வென்று புதிய சாதனை படைக்க முடியும்.

இறுதி நாளான இன்று இந்தியாவுக்கு ஹாக்கி மற்றும் பேட்மிண்டன் மூலம் தங்கப் பதக்கம் கிடைக்க வாய்ப்புகள் உள்ளன.

ஆடவர் ஹாக்கி இறுதிப் போட்டியில் இந்தியாவும், ஆஸ்திரேலியாவும் மோதுகின்றன.

மகளிர் பேட்மிண்டன் ஒற்றையர் ஆட்டத்தில் சாய்னா மூலம் தங்கம் வரலாம் என்ற நம்பிக்கை உள்ளது. அதேபோல, மகளிர் இரட்டையர் பிரிவில் ஜூவாலா கத்தா-அஸ்வினி பொன்னப்பா ஜோடி தங்கத்திற்கு முயலலாம்.

பதக்கப்பட்டியலில் ஆஸ்திரேலியா 72 தங்கம், 50 வெள்ளி, 47 வெண்கலத்துடன் 169 பதக்கங்களுடன் முதலிடத்தில் உள்ளது. இங்கிலாந்து 37 தங்கம், 56 வெள்ளி, 45 வெண்கலத்துடன் 138 பதக்கங்களுடன் 2வது இடத்தில் உள்ளது.

கடந்த மெல்போர்ன் (2006) காமன்வெல்த் போட்டியில் இந்தியா 4வது இடத்தைப் பிடித்திருந்தது. இந்த முறை 3வது இடத்தில் உள்ளது. சற்று முயன்றால் 2வது இடத்தைப் பிடித்து விட முடியும் என்பது குறிப்பிடத்தக்கது

தட்ஸ்தமிழ்