உலகில் 100 கோடி பேர் பசியால் வாடுகின்றனர்

கார்த்திக் · கார்த்திக் Tue 12 Oct 2010 - 12:40

வாஷிங்டன் : உலக அளவில் தற்போது உயிர் வாழ தேவையான உணவு கிடைக்காமல் பசியால் வாடுபவர்கள் எண்ணிக்கை 100 கோடியாக உள்ளது. இதில் பெரும்பான்மை குழந்தைகள் ஆப்ரிக்கா, இந்தியாவை உள்ளடக்கிய ஆசிய நாடுகளில் உள்ளதாக ஆய்வு தகவல் தெரிவிக்கிறது. மனிதன் உயிர்வாழ தேவையான

சத்தான உணவு கிடைக்காமல் பசியுடன் உடல் வலிமை குன்றி இருப்பவர்கள் குறித்து, சர்வதேச உணவு திட்ட ஆராய்ச்சி மையம் (ஐ.எப்.பி.ஆர்.ஐ.) 122 நாடுகளில் ஆய்வு செய்தது. அதன் விவரம்:

போதிய அளவுக்கு ஊட்டச் சத்து உணவு கிடைக்காமல் உடல் வலிமையின்றி இருப்பவர்களை மோசமான நிலையில் உள்ளவர்கள் (20% மேல்) மற்றும் மிக மோசமான நிலையில் உள்ளவர்கள் (30% மேல்) என இரண்டு வகையாகப் பிரித்தனர். இதில் பசியால் பாதிக்கப்பட்ட மோசமான நிலையினர் 25 நாடுகளிலும், மிக மோசமான நிலையினர் 4 நாடுகளிலும் அதிகமாக வாழ்வது தெரியவந்தது.

சத்தான உணவு கிடைக்காமல் மிக மோசமான நிலையில் இறக்கும் மற்றும் உடல் எடை குறைந்த குழந்தைகள் ஆப்ரிக்காவை சேர்ந்த காங்கோ, புருண்டி, எரிட்ரியா, சாட் ஆகிய 4 நாடுகளில் அதிகம் உள்ளனர். இந்த நாடுகளில் நிலவும் வறுமை, பொருளாதார தேக்கம், உணவுப் பற்றாக்குறை போன்றவற்றால் இந்நிலை அங்கு நிலவுகிறது. சத்தான உணவு கிடைக்காமல் மோசமான நிலையில் உள்ள குழந்தைகள் உள்ள 25 நாடுகளில் நேபாளம், தான்சேனியா, கம்போடியா, ஜிம்பாப்வே, இந்தியா, வங்கதேசம், எத்தியோப்பியா போன்ற நாடுகள் இடம் பெற்றுள்ளன. குறிப்பாக வங்கதேசம், இந்தியா, ஏமன், தைமூர்&லெஸ்டி நாடுகளில் போதிய உணவு இல்லாமல் உடல் எடை குறைந்த குழந்தைகள் 40 சதவீதத்துக்கும் மேற்பட்டோர் உள்ளனர். ஆப்கானிஸ்தான், அங்கோலா, சாட், சோமாலியா ஆகிய நாடுகளில் பசியால் 5 வயதுக்குட்பட்ட குழந்தைகள் 20 சதவீதத்துக்கும் மேற்பட்டோர் இறக்க நேரிடுகிறது என்று ஆய்வில் தெரிய வந்துள்ளது .

தமிழ் சி என் என்