சொத்து பிரச்னையில் உயிர் இழந்தார் வாலிபர் கொலையில் ‘திடுக்’ தகவல்

ஆவடி :

பட்டாபிராமில் தலையில் அம்மிக்கல்லை போட்டு வாலிபர் கொலை செய்யப்பட்ட வழக்கில், தலைமறைவான கட்டிட தொழிலாளி கைது செய்யப்பட்டார். அவரிடம் நடத்திய விசாரணையில், தாயையும் கள்ளக்காதலனையும் கொலை செய்த வாலிபர், சொத்துப் பிரச்னையில் உயிரை இழந்தது தெரிய வந்துள்ளது.தாம்பரம் பழைய பெருங்களத்தூர் முடிச்சூர் ரோட்டில் வசித்தவர் செந்தில்குமார் (28). இவர், பட்டாபிராம் கோபாலபுரம் 9வது தெருவில் வசிக்கும் தனது மாமா மகன் வினோத் (28) வீட்டுக்கு கடந்த 9ம் தேதி வந்தார். வினோத் கட்டிட தொழிலாளி.இருவரும் வீட்டில் விடிய, விடிய மது அருந்தியபடி பேசிக்கொண்டு இருந்தனர்.


திடீரென அவர்களுக்குள் வாக்குவாதம் ஏற்பட்டு ஒருவரை ஒருவர் தாக்கிக் கொண்டனர். இதில் ஆத்திரம் அடைந்த வினோத் அம்மிக் கல்லை எடுத்து செந்தில்குமார் தலையில் போட்டு கொலை செய்துவிட்டு தப்பினார். இதுகுறித்து பட்டாபிராம் போலீஸ் இன்ஸ்பெக்டர் சத்தியன், சப் இன்ஸ்பெக்டர் சாம்சன் சேவியர் வழக்குப்பதிவு செய்து வினோத்தை தேடினர். திருவள்ளூரில் பதுங்கியிருந்த வினோத்தை போலீசார் நேற்று கைது செய்தனர்.போலீஸ் விசாரணையில் கிடைத்த தகவல்கள் வருமாறு: கொலை செய்யப்பட்ட செந்தில்குமார் சில ஆண்டுகளுக்கு முன் அம்பத்தூர் ஞானமூர்த்தி நகரில் வசித்துள்ளார். அப்போது தனது அம்மாவையும் அவருடன் தொடர்பு வைத்திருந்த தனது நண்பரையும் கொலை செய்துள்ளார்.

பிறகு, பழைய பெருங்களத்தூரில் குடியேறி உள்ளார்.பாட்டி சொத்தை பிரிப்பதில் வினோத்துக்கும் செந்தில்குமாருக்கும் இடையில் பிரச்னை இருந்துள்ளது. இதனால் வினோத் மனைவி சீமந்தத்துக்கு செந்தில்குமாரை கூப்பிடவில்லை. இதுவும் அவருக்கு கோபத்தை ஏற்படுத்தி இருக்கிறது.இந்நிலையில், கடந்த சில தினங்களுக்கு முன் வினோத்தும் செந்தில்குமாரும் ஒரு திருமண நிகழ்ச்சியில் சந்தித்துள்ளனர். அப்போது வினோத், ‘வீட்டில் தனியாக இருக்கிறேன், நீ வந்தால் இருவரும் மது அருந்துவோம்Õ என்று அழைத்துள்ளார். அதன்படி கடந்த 9ம் தேதி வினோத் வீட்டுக்கு செந்தில்குமார் சென்றுள்ளார். அங்கு இருவரும் அளவுக்கு அதிகமாக மது அருந்தியுள்ளனர்.

அப்போது சொத்து பிரச்னை பற்றியும் சீமந்தத்துக்கு அழைக்காதது குறித்தும் வினோத்துடன் செந்தில்குமார் வாக்குவாதம் செய்துள்ளார். ஒருவரை ஒருவர் தாக்கியுள்ளனர். ஆத்திரம் அடைந்த வினோத், அம்மிக்கல்லை எடுத்து தலையில் போட்டு செந்தில்குமாரை கொலை செய்துள்ளார். இவ்வாறு போலீஸ் விசாரணையில் தெரியவந்துள்ளது. இதையடுத்து, வினோத்தை திருவள்ளூர் நீதிமன்றத்தில் ஆஜர்படுத்தி புழல் சிறையில் அடைத்தனர்.