ஐ.நா. பாதுகாப்பு அவையில் இந்தியாவுக்கு இடம் உறுதி

by **சிவா** Mon Oct 11, 2010 3:08 pm

ஐ.நா. பாதுகாப்பு அவையில் இந்தியாவுக்கு தாற்காலிக உறுப்பினர் அந்தஸ்தில் இடம் கிடைப்பது உறுதியாகிவிட்டது. பொது அவையில் நாளை நடக்க இருக்கும் தேர்தலில் இந்தியா எளிதாக வெற்றிபெறும் என எதிர்பார்க்கப்படுகிறது.

ஐ.நா. பாதுகாப்பு அவையில் தாற்காலிக உறுப்பினர் இடங்கள் ஆசியா, ஆப்பிரிக்கா, லத்தீன் அமெரிக்கா, மேற்கு ஐரோப்பா போன்ற பிராந்தியங்களில் இருந்து தலா ஒரு நாட்டுக்கு வழங்கப்படும். இதற்கான தேர்தல் ஐ.நா. பொது அவையில் நாளை நடக்க இருக்கிறது.

ஆசிய பிராந்தியத்தில் இந்தியாவுக்குப் போட்டியாக இருந்த கஜகஸ்தான் இந்த ஆண்டு தொடக்கத்தில் போட்டியிலிருந்து விலகிக் கொண்டது. இதனால், இந்தியா போட்டியின்றித் தேர்ந்தெடுக்கப்படும் என எதிர்பார்க்கப்படுகிறது.

இதே போல், ஆப்பிரிக்க பிராந்தியத்திலிருந்து தென்னாப்பிரிக்காவும், லத்தீன் அமெரிக்காவிலிருந்து பிரேசிலும் போட்டியின்றித் தேர்ந்தெடுக்கப்பட இருக்கின்றன.

மேற்கு ஐரோப்பிய, இதரப் பிரிவு இடங்களுக்கு ஜெர்மனி, போர்சுகல், கனடா ஆகிய 3 நாடுகள் போட்டியிடுகின்றன.

ப்ரிக் கூட்டமைப்பில் இருந்து இந்தியா, தென்னாப்பிரிக்கா, பிரேசில் ஆகிய நாடுகள் ஒரே நேரத்தில் பாதுகாப்பு அவையில் உறுப்பினராக இடம்பெறப்போவது சிறப்பம்சமாகும். இந்த இடத்தைப் பெறுவதற்காக கடந்த 3 ஆண்டுகளாக இந்தியா பல நாடுகளுடன் பேச்சு நடத்தி வந்தது குறிப்பிடத் தக்கது.

பாதுகாப்பு அவையின் தாற்காலிக, நிரந்தர உறுப்பினர்களின் எண்ணிக்கையை அதிகரிக்க வேண்டும் எனவும், தமக்கு நிரந்தர உறுப்பினர் அந்தஸ்தை வழங்க வேண்டும் எனவும் இந்தியா தொடர்ந்து வலியுறுத்தி வருகிறது.

தினமணி!