இலங்கையி நேற்று நடைபெற்ற தேர்தல் முடிவுகள்:

யாழ்ப்பாண மாநகரசபை, வவுனியா நகரசபை மற்றும் ஊவா மாகாண சபைத் தேர்தல்களின் முடிவுகள் அனைத்தும் வெளியாகியுள்ளன.இதன்படி, யாழ். மாநகரசபையிலும் ஊவா மாகாணசபையிலும் ஆளும் ஐக்கிய மக்கள் சுதந்திர கூட்டமைப்பு வெற்றி பெற்றுள்ள நிலையில் வவுனியா நகர சபையை தமிழ் தேசிய கூட்டமைப்பு தனதாக்கியுள்ளது.

இந்தநிலையில், யாழ்ப்பாணம் மாநகரசபைக்கான இறுதித் தேர்தல் முடிவுகளின் படி ஐக்கிய மக்கள் சுதந்திர கூட்டமைப்பு 10 ஆயிரத்து 602 வாக்குகளை பெற்று வெற்றிப்பெற்றுள்ளது

அதன் கீழ் பெற்றுக்கொண்ட ஆசனங்களின் எண்ணிக்கை 13 ஆகும்.

தமிழ் தேசிய கூட்டமைப்பு 8008 வாக்குகளைப் பெற்று 8 ஆசனங்களை கைப்பற்றியுள்ளது.

அதேவேளை, சுயேட்சைக் குழு ஒன்று ஆயிரத்து 175 வாக்குகளை பெற்று ஓரு ஆசனத்தையும், தமிழர் விடுதலைக் கூட்டணி ஆயிரத்து 007 வாக்குகளை பெற்று ஒரு ஆசனத்தையும் கைப்பற்றியுள்ளன.

அத்துடன், வவுனியா நகரசபைத் தேர்தலுக்கான உத்தியோகபூர்வ இறுதி முடிவுகளின்படி தமிழ் தேசிய கூட்டமைப்பு 4 ஆயிரத்து 279 வாக்குகளை பெற்று ஐந்து ஆசனங்களுடன் சபையைக் கைப்பற்றியுள்ளது.

புளொட்டின் ஜனநாயக மக்கள் விடுதலை முன்னணி பெற்றுக்கொண்ட மொத்தவாக்குகளின் எண்ணிக்கை 4 ஆயிரத்து 136, இதன்படி அந்த கட்சி 3 ஆசனங்களை பெற்றுக்கொண்டது

ஐக்கிய மக்கள் சுதந்திர கூட்டமைப்பு மூவாயிரத்து 45 வாக்குகளை பெற்று 2 ஆசனங்களை தன்வசப்படுத்தியுள்ளது.

சிறிலங்கா முஸ்லிம் காங்கிரஸ் 587 வாக்குகளை பெற்று ஒரு ஆசனத்தை கைப்பற்றியுள்ளது.

இந்தநிலையில், ஊவா மாகாணசபை தேர்தலின் இறுதி முடிவுகளின் படி ஐக்கிய மக்கள் சுதந்திர கூட்டமைப்பு 4 லட்சத்து 18 ஆயிரத்து 906 வாக்குகளை பெற்ற 2 மேலதிக ஆசனங்கள் அடங்கலாக 25 ஆசனங்களை கைப்பற்றியுள்ளது.

ஐக்கிய தேசிய கட்சி 1 லட்சத்து 29 ஆயிரத்து 144 வாக்குகளை பெற்று 7 ஆசனங்களை கைப்பற்றியுள்ளது.

அத்துடன், ஜே.வி.பி பெற்ற 14 ஆயிரத்து 639 வாக்குகளின் அடிப்படையில் அந்த கட்சி 1 ஆசனத்தை தன்வசப்படுத்தியுள்ளது.

இதுதவிர மலையக மக்கள் முன்னணி 9 ஆயிரத்து 227 வாக்குகளுடன் 1 ஆசனத்தை பெற்றுள்ளது