நடிகைகளை மிரட்டிய ரசிகர்கள்!

ரசிகர்களை நடிகர், நடிகைகளுக்கு பிடிக்கும். தங்களை கடவுளுக்கு இணையாக வைத்துப் பூஜிப்பவர்கள் என்பதால்! ஆனால் அதே ரசிகர்கள் எல்லை மீறும் போதுதான் எரிச்சலடைகிறார்கள், திகைத்துப் போகிறார்கள் திரை நட்சத் திரங்கள். அப்படிச் சில நடிகைகளை ரசிகர்கள் அச்சுறுத்திய சம்பவங்கள்...

கங்கனா ரணவத்

பிரபலங்களுக்கான `பிட்னஸ்' ஆலோசகர் லீனா மோக்ரேயின் `ஜிம்'மின் முன்னால் ஒரு ரசிகர் 4 நாட்கள் உண்ணாவிரதம் இருந்தார். தான், கங்கனாவுக் காக எழுதி வைத்திருக்கும் கடிதத்தை அவர் கையால் வாங்கிக் கொண்டால்தான் உண்ணாவிரதத்தைக் கைவிடுவேன் என்றார்.

கங்கனா செய்தது என்ன?

ஐந்தாம் நாள் இந்த விஷயத்தைப் பற்றிக் கேள்விப்பட்ட கங்கனா, கடைசியில் கடிதத்தை வாங்கிக் கொண்டார். ஆனால் கடிதத்தில் என்ன எழுதியிருந்தது என்று அவர் தெரிவிக்கவில்லை. ``ரசிகர்கள் இந்த அளவுக்குப் போவது பயமுறுத்துவதாக இருக்கிறது.

ரசிகர்கள் எப்போதும் எனது வலைப்பூ மூலம் என்னைத் தொடர்புகொள்ளலாம்'' என்றார்.

கத்ரீனா கபூர்

முப்பது வயதை நெருங்கும் ஒருவர், கத்ரீனாவை எட்டு மாதங்களாகப் பின்தொடர்ந்திருக்கிறார். அவர் கத்ரீனாவின் வீட்டருகே சுற்றித் திரிந்திருக்கிறார். ஒருநாள் வீட்டுக்குள்ளும் நுழைந்துவிட்ட அவர், வீட்டு வேலைக்காரரிடம் தன்னை கத்ரீனா சந்திக்க வரச் சொல்லியிருப்பதாகக் கூறி யிருக்கிறார். ஒரு திரையரங்கில் நடைபெற்ற நிகழ்ச்சியில் கத்ரீனாவை தொடும் அளவு நெருங்கி விட்டார் அந்த ரசிகர் (?).

கத்ரீனா செய்தது என்ன?

தன்னை நெருங்கி வந்த அந்த இளைஞரை பார்த்ததுமே புரிந்துகொண்ட கத்ரீனா, தனது பாதுகாவலர்களை உஷார்ப்படுத்தியிருக்கிறார். தன்னைச் சுற்றி பலர் சூழ்வதைக் கண்டதும் அந்த நபர் நழுவி விட்டார்.

அம்ரிதா ராவ்

ஒரு கிராமத்து ரசிகர் தனது சொத்துகளை எல்லாம் விற்றுவிட்டு மும்பை வந்து அம்ரிதாவின் வீட்டின் முன் முகாம் போட்டார். அவர் அடிக்கடி அம்ரிதாவை தொலைபேசியில் அழைக்கவும் ஆரம்பித்தார்.

அம்ரிதா செய்தது என்ன?

அம்ரிதா தனது படப்பிடிப்பு நடந்துகொண்டிருந்த ஸ்டுடியோவுக்கு அந்த ரசிகரை அழைத்தார். அவருடன் 15 நிமிடங்கள் பேசினார். அவருக்கு சினிமா பற்றியும், நடிகைகளின் வாழ்க்கையைப் பற்றியும் விளக்கி கூறினார்.

அவர் ஓரளவு தெளிவான பின்பு தனது உதவியாளர் மூலம் அந்த ரசிகருக்கு சொந்த ஊர் செல்வதற்கான ரெயில் டிக்கெட் எடுத்துக் கொடுத்து, கொஞ்சம் பணமும் கொடுத்து அனுப்பி வைத்தார்.

அசின்

அசின் கடந்த ஆண்டு சிங்கப்பூர் சென்றிருந்தபோது ஓர் இளைஞர் அவரைத் தொந்தரவுபடுத்தினார்.

இந்தூரில் இருந்து சிங்கப்பூருக்கு அசினை பின்தொடர்ந்து சென்ற அவர், அசின் தங்கிய ஓட்டலிலேயே தானும் ஒரு அறை எடுத்துக் கொண்டார். அசினைப் பார்த்து நைசாகப் பேசி பேசி புகைப்படம் எடுத்துக் கொண்ட அவர், அசினின் பாதுகாவலன் போலவும் நடந்து கொள்ளவும் முயன்றார்.

அசின் செய்தது என்ன?

அசின் திட்டமிட்டதை விட முன்பாகவே மும்பைக்குத் திரும்பி விட்டார். அந்தத் தீவிர ரசிகரை ஏமாற்றும்வகையில் திட்டமிட்ட நேரத்துக்கு முன்பாகவே ஓட்டலிலிருந்து மெதுவாக நழுவி விட்டார்.

மினிஷா லம்பா

ஒரு ஆசாமி இவருக்கு முதலில் ஜோக் எஸ்.எம்.எஸ். அனுப்பினான். முதலில் ரசிக்கும்படியாக இருந்தது. பின்பு அதுவே `ஏ' ஜோக்குகளாக மாறின. அதையும் இவர் கண்டுகொள்ளாமல் விட, அடுத்து வந்ததெல்லாம் ஆபாசம், வக்கிரம்! பொறுத்தது போதும் என்று பொங்கி எழுந்த இவர், எந்த செல்போனில் இருந்து வந்தது என்பதை கண்டறிந்து அடுத்த கட்ட அதிரடி நடவடிக்கையில் இறங்கினார்.

மினிஷா செய்தது என்ன?

முதலில் அவர் சம்பந்தப்பட்ட நபரை தொடர்பு கொண்டு செமடோஸ் விட்டார். அந்த நபர் அடங்கிப் போகாமல் பதிலுக்கு ஆத்திரம் காட்ட, மினிஷா போலீசுக்கு சென்றார். போலீஸ் தட்ட வேண்டிய இடத்தில் தட்டிய பின்புதான் அந்த ஆபாச அழைப்புகளின் வரத்து நின்றுபோனது. இவர் நிம்மதி பெருமூச்சு விட்டார்.

ஞாயிறு மலர்!