டெல்லி, மும்பையில் தீவிரவாதிகள் தாக்குதல் நடத்த சதி

டெல்லி, மும்பையில் தீவிரவாதிகள் தாக்குதல் நடத்த சதி மத்திய உளவுத்துறை எச்சரிக்கை


புதுடெல்லி, அக்.10- டெல்லி மற்றும் மும்பையில் உள்ள முக்கிய இடங்களில் தாக்குதல் நடத்த தீவிரவாதிகள் சதி திட்டம் தீட்டி இருப்பதாக மத்திய உளவுத்துறை எச்சரித்துள்ளது. எனவே, பாதுகாப்பு பலப்படுத்தப்பட்டு இருக்கிறது.

உளவுத்துறை எச்சரிக்கை

டெல்லியில் நடைபெறும் காமன்வெல்த் விளையாட்டு போட்டிகளை சீர்குலைக்க தீவிரவாதிகள் சதி திட்டம் தீட்டியிருப்பதாக அமெரிக்கா, இங்கிலாந்து உள்ளிட்ட வெளிநாடுகள் எச்சரிக்கை செய்திருந்தன. அந்த நாடுகளைச் சேர்ந்தவர்கள் இந்தியாவில் சுற்றுப்பயணம் மேற்கொள்ளும்போது கவனமான இருக்குமாறு அறிவுறுத்தின.

இந்த சூழ்நிலையில் டெல்லி மற்றும் மும்பை நகரங்களில் தீவிரவாதிகள் தாக்குதல் நடத்த சதி திட்டம் தீட்டியுள்ளதாக மத்திய உளவுத்துறைக்கு தகவல் கிடைத்துள்ளது. டெல்லியில் காமன்வெல்த் விளையாட்டு போட்டிகள் நடைபெறும் விளையாட்டு மைதானங்கள், டெல்லி மற்றும் மும்பை விமான நிலையங்கள், மும்பை பங்கு சந்தை அலுவலக கட்டிடம் போன்றவற்றுக்கு தீவிரவாதிகள் குறி வைத்துள்ளதாகவும் தகவல்கள் கிடைத்துள்ளன.

டெல்லி விமான நிலையம்

எனவே, டெல்லி மற்றும் மும்பை விமான நிலையங்களில் வழக்கத்தை விட கூடுதல் பாதுகாப்பு அளிக்கப்பட்டுள்ளது. மோப்ப நாய்களும் வரவழைக்கப்பட்டுள்ளன. விமான நிலையங்களில் ஏதாவது அசம்பாவித சம்பவங்கள் நடந்தால் மேற்கொள்ள வேண்டிய பாதுகாப்பு நடவடிக்கைகளை குறித்தும் பாதுகாப்பு படையினருக்கு விளக்கம் அளிக்கப்பட்டுள்ளது.

நாடு முழுவதும் நவராத்திரி விழா பூஜைகள் நடைபெற்று வருவதால் துர்கா பூஜை நடைபெறும் இடங்கள் மற்றும் கோவில்களிலும் பாதுகாப்பை பலப்படுத்துமாறு மத்திய உளவுத்துறை எச்சரித்துள்ளது. இது தொடர்பாக, மாநில அரசுகளுக்கு தேவையான பாதுகாப்பு அறிவுரைகள் வழங்கப்பட்டுள்ளன.

மும்பையில் உஷார்

மும்பை நகருக்கு தீவிரவாதிகள் குறி வைத்துள்ளதால், மும்பை போலீசாரும் உஷார்படுத்தப்பட்டு இருக்கின்றனர். இது குறித்து மத்திய உளவுத்துறை சார்பில் மும்பை போலீசாருக்கு எச்சரிக்கை செய்யப்பட்டுள்ளது.

ஏற்கனவே, கடல் வழியாக தீவிரவாதிகள் ஊடுருவி மும்பையில் தாக்குதல் நடத்தி உள்ளனர். அதுபோலவே, மீண்டும் தாக்குதல் நடத்தக் கூடும் என்பதால் கடலோரப் பகுதிகளில் பாதுகாப்பு தீவிரப்படுத்தப்பட்டுள்ளது. மீனவர்களும் உஷார்படுத்தப்பட்டு, போதுமான பாதுகாப்பு பணிகளில் அமர்த்தப்பட்டுள்ளனர். மேலும், நாடு முழுவதும் கடற்படை மற்றும் கடலோரக் காவல் படையினர் தீவிர ரோந்து பணிகளில் ஈடுபட்டு வருகின்றனர்.


தினதந்தி