சென்னையை மிரட்டுது ‘ஹார்ட் அட்டாக்’

சென்னை: இந்தியாவில் மற்ற நகரங்களில் வசிப்பவர்களைக் காட்டிலும் சென்னையில் வசிப்பவர்களுக்கு மாரடைப்பு அபாயம் அதிகம் இருப்பதாக அண்மையில் நடத்தப்பட்ட ஆய்வில் தெரியவந்துள்ளது. உலக அளவில் முக்கிய உயிர்க்கொல்லி நோயாக இருப்பது ஹார்ட் அட்டாக் மற்றும் ஸ்ட்ரோக் ஆகும். இதயத்துக்கு ரத்தம் சப்ளை செய்யும் குழாய்களில் அடைப்பு ஏற்படுவதால் மாரடைப்பும் மூளைக்கு ரத்தம் செல்லும் குழாய்களில் அடைப்பு ஏற்படுவதால் பக்கவாதமும் ஏற்படுகிறது. நமது உடலில் எல்டிஎல் மற்றும் எச்டிஎல் என இரண்டு வகை கொழுப்புகள் சேர்கின்றன.

இதில் குறைந்த அடர்த்தி கொண்ட எல்டிஎல் என்ற கொழுப்பு ரத்தக்குழாய்களில் படிந்து படிப்படியாக ரத்த நாளங்களை சுருக்கி ஒரு கட்டத்தில் அடைப்பு ஏற்பட வழிவகுக்கிறது. அதே சமயம் அதிக அடர்த்தி கொண்ட எச்டிஎல் கொழுப்பு, அபாயம் விளைவிக்கக்கூடிய எல்டிஎல் கொழுப்பை குறைக்க உதவுகிறது. சமையல் எண்ணெய் தயாரிப்பில் ஈடுபட்டுள்ள தனியார் நிறுவனம் ஒன்று அண்மையில் இந்தியாவில் உள்ள முக்கிய நகரங்களில் வசிப்பவர்களிடம் கொலஸ்ட்ரால் அளவு குறித்து ஒரு ஆய்வு நடத்தியது.

இதில் ஒட்டுமொத்தமாக 44 சதவீத இந்தியர்களுக்கு மாரடைப்பு வருவதற்கான அபாயம் இருப்பது தெரியவந்துள்ளது. நகரங்கள் வாரியாக பார்க்கும்போது சென்னையில் வசிப்பவர்களில் 51 சதவீதத்தினருக்கு கேடுதல் விளைவிக்கும் எல்டிஎல் கொழுப்பு அதிகமாகவும், நல்லது செய்யும் எச்டிஎல் கொழுப்பு குறைவாகவும் இருப்பது தெரியவந்துள்ளது. கொல்கத்தாவாசிகளுக்கு இந்த கொலஸ்ட்ரால் அளவு நல்ல விகிதத்தில் உள்ளது.

சென்னை மக்கள் அதிக அளவில் பொறித்த அயிட்டங்களை விரும்பி சாப்பிடுவது இதற்கு காரணம் என்கிறார் பிரபல இதய மருத்துவர் வி.சொக்கலிங்கம். தென்னிந்திய சமையலில் தேங்காய் அதிகம் சேர்ப்பதும் மற்றொரு காரணம் என்கிறார் லைப்லைன் மருத்துவமனை இதய அறுவை சிகிச்சை நிபுணர் டாக்டர் வி.அருண். புகைப்பழக்கம் மற்றும் குடிப்பழக்கம் இருப்பவர்களுக்கு ரத்தக்குழாயில் கொழுப்பு சேர்வதற்கான அபாயம் இன்னும் அதிகம் என்பது மருத்துவர்களின் பொதுவான கருத்தாகும்.

திமுகவின் உடச்ச படச்ச சாதனைகளில் இதுவும் ஒன்னு!