முகத்தில் கறுப்பு பெயின்ட் பூசி எருமை மீது ஊர்வலம்: பெண்ணுக்கு கொடுமை

பூஜிதா · பூஜிதா Sat Oct 09, 2010 11:40 am

உத்தரப் பிரதேச மாநில கிராமம் ஒன்றில், தலித் பெண்ணின் முகத்தில், கறுப்பு பெயின்ட்டை அடித்து, எருமை மாடு மீது ஏற்றி, ஊர்வலமாக அழைத்து சென்ற கொடுமை நடந்துள்ளது. உத்தரப் பிரதேச மாநிலம், புலந்த்சாகர் மாவட்டத்தில் உள்ள ஒரு கிராமத்தைச் சேர்ந்தவர் சந்திராவதி. அதே கிராமத்தைச் சேர்ந்த சாமா என்ற பெண், தன் காதலனுடன் ஊரை விட்டு ஓடி விட்டார். இதற்கு சந்திராவதியும், அவரது மகனும் உதவி செய்ததாக குற்றச்சாட்டு எழுந்தது. உடனடியாக பஞ்சாயத்து கூட்டப்பட்டு, விசாரணை நடத்தப்பட்டது. பின்னர், தாய்க்கும், மகனுக்கும், முகத்தில் கறுப்பு பெயின்ட் பூசி, எருமை மாட்டின் மீது ஊர்வலமாக அழைத்து செல்ல வேண்டும் என்று தண்டனை விதிக்கப்பட்டது. மேலும், அவர்களுக்கு 50 ஆயிரம் ரூபாய் அபராதமும் விதிக்கப்பட்டது. பஞ்சாயத்தாரின் தீர்ப்புப்படி, தாய்க்கும், மகனுக்கும் முகத்தில் கறுப்பு பெயின்ட் பூசப்பட்டு, அவர்களை வலுக்கட்டாயமாக தனித்தனியாக எருமை மாட்டின் மீது ஏற்றி, அந்த கிராமத்தின் தெருக்களில் ஊர்வலமாக அழைத்து சென்றனர். இதற்கு, கிராமத்தின் ஒரு பிரிவினர் கடும் எதிர்ப்பு தெரிவித்தனர். இதுகுறித்து, சந்திராவதியின் உறவினர்கள் போலீசில் புகார் அளித்தனர். இது தொடர்பாக, 23 பேர் மீது போலீசார் வழக்கு பதிவு செய்துள்ளனர். ஏழு பேரை கைது செய்துள்ளனர். தலைமறைவானவர்களை தேடி வருகின்றனர். இந்த சம்பவம் அந்த பகுதியில், பெரும் பரபரப்பை ஏற்படுத்தியது.