முதலாம் ராஜராஜன் காலத்து கோவில் கண்டுபிடிப்பு

கார்த்திக் · கார்த்திக் Fri Oct 08, 2010 10:50 am

கரூர் மாவட்டம் , குளித்தலை அருகில் காவிரியின் தென் கரையில் மேட்டு மருதூர் என்ற கிராமம் அமைந்துள்ளது. இவ்வூருக்கு செல்லும் சாலையின் கிழக்கு பக்கத்தில் பழமையான சிவன் கோவில் உள்ளது. இக்கோவில் சோழ மாமன்னன் முதலாம் ராஜராஜன் (கி.பி.985-1014) காலத்தில் கட்டப் பட்டதாகும்.

தொல்லியல் துறையின் முதன்மை செயலாளர் (ஆணையர்) ஸ்ரீ.ஸ்ரீதர் ஆணைப் படி கல்வெட்டு முனைப்பு திட்டத்தின் கீழ் கருவூர் சேரர் அகழ்வைப்பக காப்பாட்சியர் நாக.கணேசன் கரூர் மாவட் டத்தில் ஆய்வு மேற்கொண்ட பொழுது இக்கோவிலை கண்டறிந்துள்ளார்.

மேலும் இது குறித்து நாக.கணேசன் விடுத்துள்ள செய்தி குறிப்பில்,

’’இக்கோவில் ஆயிரம் ஆண்டு களை கடந்து இன்றும் கலை யழகுடன் காட்சியளிக்கிறது.

கருவறை, அர்த்த மண்டபம் என்ற அமைப்பில் கோவில் வடிவமைக்கப்பட்டுள்ளது. கோவிலின் ஜகதி, பட்டி, குமுதவரி, கால் (சுவர்), பிரஸ்தரம் போன்றவை கருங்கற்களாலும், விமானம் செங்கற்களாலும் வடிவமைக்கப்பட்டுள்ளன.

கருவறையின் 3 பக்கங்களிலும் வேலைப்பாடுகள் மிக்க 22 தூண்களைக்கொண்டு கருவறை கட்டப்பட்டுள்ளது. பிரஸ் தரத்தில் கொடுங்கை வரியில் பூதகணங்கள் வரிசையாக அணி வகுத்து நிற்பது போல் காட்டப்பட்டுள்ளன.

கருவறை சுவர் பகுதியிலுள்ள ஒவ்வொரு தூணிற்கும் மேல் பிரஸ்தரத்தில் கொடிக்கருக்கும் அதன் நடுவே மனித முகமும் குடைந்து அழகு படுத்தப் பட்டுள்ளது.

விமானத்தின் கட்டுமானமும், சுதை உருவங் களும் சிதைந்து விட்டதால் அவற்றைப்பற்றிய விவரம் முழுமையாக அறிய இயல வில்லை.

கருவறையின் வெளிப் பக்கத்தில் தென்மேற்கு மூலை யில் சுவர் பகுதியிலும், கருவறை குமுதவரியிலும் பொறிந்த நிலையில் கல் வெட்டு பொறிப்புகள் காணப்படுகின்றன. கருவறையின் உள்ளே பெரிய அளவில் ஆவுடையாரும், லிங்கமும் பிரதிஷ்டை செய்யப் பட்டுள்ளன.

கருவறையையடுத்து அர்த்த மண்டபம் உள்ளது. அர்த்த மண்டபத்தின் வெளிப்புறத்தில் வடக்கு, தெற்கு, கிழக்கு ஆகிய 3 பக்கங்களில் 10 தூண்களை கொண்டு சிறிய வடிவில் அர்த்த மண்டபம் அமைக்கப் பட்டுள் ளது. ஒவ்வொரு தூணின் மேல் பகுதியில் கொடி கருக்கும் அதன் நடுவே மனித முகமும் குடைந்து காட்டப் பட்டுள்ளது.

அர்த்த மண்டபத்தின் உள்ளே மையப்பகுதியில் நான்கு தூண்கள் காணப்படுகின்றன. அர்த்த மண்டபத்தின் நுழைவு வாயிலில் தென்புற நிலைக் காலில் முதலாம் இராசராசனின் கல் வெட்டு பொறிக்கப் பட்டுள்ளது.

21 வரிகளில் பொறிக்கப்பட்டுள்ள கல்வெட்டின் முதல் 10 வரிகள் தெளிவாகவும், ஏனைய வரிகள் பொறிந்தும் காணப்படுகின்றன. கோவிலின் முன் நந்தி உள்ளது. கோவில் அர்த்த மண்டபத்தின் முன் சேஷ்டாத்தேவி, விநாயகர் போன்ற உதிரி சிற்பங்கள் காணப்படுகின்றன.

இக்கோவில் கல்வெட்டு முதலாம் இராசராசனின் 11-வது ஆட்சியாண்டை சேர்ந்த கல்வெட்டாகும். தெளிவாக தெரியும் கல்வெட்டு பகுதி யிலிருந்து இவ்வூரைப் பற்றியும், இக்கோவில் இறைவனைப் பற்றியும், இக்கோவிலை கட்டிய மன்னனை பற்றியும், அறிந்து கொள்ள முடிகிறது. மேலும் பல புதிய தகவல்களையும் இக்கல் வெட்டுகள் உணர்த்துகின்றன.

இக்கல்வெட்டில் `ஸ்வஸ்தி ஸ்ரீ சாலை' , `கலமறுத்த கோவிராஜ', `ராஜகேஸரி ப ந்ம', `க்கு யாண்டு யக (11)', `ஆவது மீய் கோட்டு', `நாட்டு மாதான மருதூ', ` ர் ஆரா வமிதீஸ்வரத்', `து தேவர்க்கு இவ்வூ', `ர்' என்ற கல்வெட்டு பொறிப்பு களிலிருந்து இக்கோவில் மா மன்னன் முதலாம் இராசராசனின் (கி.பி.985-கி.பி.1014) பதினோறாவது ஆட்சி யாண்டில் கட்டப் பட்டுள்ளதை அறிய முடிகிறது.

இக்கல்வெட்டில் "சாலைக்கல மறுத்த கோவி ராஜராஜ சேகரி'' என்று பொறிக்கப்பட்டுள்ள மெய்க்கீர்த்தி தொடர் முதலாம் இராசராசனை குறிப்பதாகும். முதலாம் ராஜராஜன் கி.பி.985-ல் ஆட்சி பொறுப் பேற்றதிலிருந்து நான்காண்டு காலம் வரை (கி.பி. 989) "கோவி இராஜராஜ கேசரி'' என்றும், எட்டாவது ஆட்சியாண்டு வரை (கி.பி.993) "காந்தளுர் சாலை கலமறுத் தருளிய கோவி இராஜராஜ கேசரி'' என்றும், அதன் பிறகு வரும் அம்மன்னனது கல் வெட்டுகள் அனைத்தும் "திருமகள் போலப் பெருநிலச் செல்லியும்'' என்ற மெய் கீர்த்தியுடனும் தொடங்கு வதை அம்மன்னனது கல்வெட்டுகளில் காணலாம்.

மேட்டுமருதூர் கோவிலில் காணப்படும் கல்வெட்டு பொறிப்புகளிலிருந்து முதலாம் ராஜராஜனின் பதினோறாவது ஆட்சியாண்டில் கி.பி.996ல் இக்கோவில் கட்டப்பட்டுள்ள தையும், அம்மன்னனின் 11-வது ஆட்சியாண்டு வரை "சாலை கல மறுத்த கோவிராஜராஜ கேசரி'' என்று அம்மன்னனின் மெய்கீர்த்திகள் பொறிக்கப் பட்டுள்ளதையும் அறிய முடிகிறது.

முதலாம் ராஜராஜன் முதன் முதலில் கேரளத்திலுள்ள விழிஞம் கோட்டையையும், கேந்திர முக்கியத்துவம் வாய்ந்த காந்தளூர்ச்சாலையையும் வெற்றிகொண்டான். அம்மாபெரும் வெற்றியை நினைவு கூறும் வகையில் மூன்று வகையான தனது மெய்க் கீர்த்திகளிலும் அவ்வெற்றிகளை இடம் பெற செய்தான்.

முதலாம் ராஜராஜனின் காந்தளூர்சாலை வெற்றிக்கு பின் பொறிக்கப்பட்ட கல்வெட்டுகள் அனைத்தும் "சாலை கல மறுத்த கோவி இராஜராஜகேசரி'' என்ற மெய்க் கீர்த்தியுடன் தொடங்கப் பட்டுள்ளதையும், முதலாம் ராஜராஜனின் 11-வது ஆட்சியாண்டு வரை அம்முறை நடை முறைப் படுத்தப் பட்டுள்ளதையும், மேட்டு மருதூர் சிவன் கோவிலில் கிடைத்துள்ள கல்வெட்டின் மூலம் அறிய முடிகிறது.

இக்கல்வெட்டிலிருந்து மேட்டு மருதூர் "மாதான மருதூர்'' என்றும், அவ்வூர் ஈஸ்வரன் "ஆராவமிதீஸ்வர்'' என்றும் அழைக்கப் பட்டுள்ளமை தெரிகிறது. இக் கோவில் முதலாம் ராஜராஜனின் 11-வது ஆட்சி யாண்டில் கட்டப்பட்டுள்ள தையும், மேட்டு மருதூர், சோழப் பேரரசில் "மீய் கோட்டு'' நாட்டில் அமைந்துள்ள சிற்றூர் என்பதையும் இக்கல்வெட்டின் மூலம் தெளிவாக அறிந்து கொள்ள முடிகிறது.

கி.பி. 996ல் முதலாம் ராஜராஜன் காலத்தில் கட்டப் பட்டு சிறப்புற்று விளங்கிய இச்சிவாலயம் பற்றி அறிய செய்திகளை கொண்டுள்ள இக்கோவில் கல்வெட்டுகள் முற்றிலும் சிதைந்து விட்டதால் இக்கோவில் பற்றிய தொடர்ச்சி யான வரலாற்றினை கண்டறிய இயலவில்லை. எனினும் இக்கோவிலும், இக்கோவிலில் காணப்படும் கல்வெட்டுகளும், கோவில் கட்டிட அமைப்பும் மாமன்னன் முதலாம் ராஜ ராஜனின் மேன்மையை பறை சாற்றும் மற்றுமொரு ஆவண மாகும்’’என்று தெரிவிக்கப்பட்டுள்ளது.

நக்கீரன் ..