ராமர் கோவில் கட்டும்வரை மனதில் அமைதி இல்லை

by **சிவா** Thu Oct 07, 2010 6:16 pm

ராமர் கோவில் கட்டும்வரை மனதில் அமைதி இல்லை : அத்வானி

அயோத்தியில் ராமர் கோவில் கட்டும்வரை எனது மனம் அமைதி அடையாது என்று பாஜக மூத்த தலைவர் அத்வானி கூறியுள்ளார்.

பாஜக மூத்த தலைவர் அத்வானி ராஜஸ்தான் மாநிலம் ஜெய்ப்பூரில் தேர்தல் தொடர்பான கருத்தரங்கில் கலந்து கொண்டார். கருத்தரங்கில் பேசிய அவர்,

"தேர்தல் முறையில் மாற்றங்களை கொண்டு வருவது பற்றி பாரதீய ஜனதா பல கருத்துக்களை நிர்ணயித்து உள்ளது. நாடாளுமன்றத்துக்கும், சட்டசபைக்கும் ஒரே நேரத்தில் தேர்தல் நடத்த வேணடும் என்பது எங்களின் விருப்பம்.

குஜராத்தில் உள்ளாட்சி தேர்தலில் வாக்களிப்பதைக் கட்டாயமாக்கியிருக்கிறார்கள். அதேபோன்று அனைத்து தேர்தல்களிலும் வாக்களிப்பது கட்டாயமாக்கப்பட வேண்டும்.

தேர்தல் முறையில் தொடர்ந்து மாற்றங்களை செய்தால்தான் ஜனநாயகம் வலுவாக இருக்க முடியும். தேர்தலில் பண பலம் ஆதிக்கம் செலுத்துவதை தடுத்தாக வேண்டும்.

இங்கிலாந்தில் 18 மற்றும் 19ஆவது நூற்றாண்டுத் தேர்தல்களில் முறைகேடு இருந்ததை அதை வெற்றிகரமாக தடுத்து இருக்கிறார்கள். அதுபோல் இங்கேயும் செய்ய வேண்டும். ஊழல் நீடித்தால் அனைத்து தரப்பிலும் பாதிப்பை ஏற்படுத்தி விடும். இதை தடுத்தே ஆக வேண்டும்.

அயோத்தியில் ராமர் கோவில் கட்ட வேண்டும் என்பது எனது மனதில் உள்ள ஆசை. எனவே ராமர் கோவில் கட்டும்வரை எனது மனம் அமைதி அடையாது" என்று தெரிவித்தார்.

வீரகேசரி