இயற்கை உணவு சாப்பிட்டால் நோய் தடுப்பு சக்தி அதிகரிக்கும் டாக்டர்கள் தகவல்

இயற்கை உணவு சாப்பிட்டால் நோய் தடுப்பு சக்தி அதிகரிக்கும்'' என்று டாக்டர்கள் கூறினர்.

விழிப்புணர்வு முகாம்

தஞ்சையை அடுத்த விளார் சாலை மருதம் தொண்டு நிறுவன பயிற்சி மையத்தில் "இயற்கை மருத்துவம் மற்றும் யோகா'' என்ற தலைப்பில் விழிப்புணர்வு முகாம் நடைபெற்றது. இதில் பெண்கள், கர்ப்பிணி பெண்கள் திரளாக கலந்து கொண்டனர்.

முகாமிற்கு தொண்டு நிறுவன இயக்குநர் அந்தோணியம்மாள் தலைமை தாங்கினார். இயற்கை மருத்துவம், யோகா பற்றி மருத்துவர்கள் வனிதா, சுபத்ராதேவி ஆகியோர் கலந்து கொண்டு பயிற்சி அளித்தனர்.

அப்போது அவர்கள் பேசியதாவது:-

"இயற்கை மருத்துவம் இது ஒரு மருந்திலா மருத்துவம் ஆகும். காற்று, மண், நீர், சூரிய ஒளி போன்ற இயற்கை சக்திகளும், சமைக்காத உயிருள்ள இயற்கை உணவு வகைகளான பழங்கள், காய்கறிகள், கீரைகள், இலைகள், பால், தேங்காய், கேரட், தானிய வகைகள் ஆகியவை மட்டுமே மருந்தாக பயன்படுகின்றன. சாப்பிட்ட உணவை ரத்தமாக மாற்றத் தெரிந்த மனித உடலுக்கு எல்லாவிதமான நோய்களையும் குணப்படுத்த தெரியும்.

நோய் தடுக்கும் சக்தி வளரும்

ஆனால் மனித உடலில் உள்ள இயற்கை நோய் தடுக்கும் சக்தியை வளர்த்து நோய் நீங்கி வாழ வைப்பதே இயற்கை உணவுகளின் வேலை. இதனை நாம் அதிக அளவில் ஒரே நேரத்தில் சாப்பிட முடியாது.

தினமும் சாப்பாட்டுடன் சிறிது, சிறிதாக எடுத்துக்கொள்ள வேண்டும். நாளடைவில் அது நமக்கு பழக்கமாகி விடும்.

பாஸ்ட் புட் உணவுகளால் இன்று பல நோய்கள் பரவுகின்றன. முன்பு இயற்கை உணவு உண்டதால் நோயின் தாக்கம் குறைந்தது. எனவே மீண்டும் நாம் பழைய பழக்க வழக்கத்திற்கு செல்ல வேண்டி உள்ளது. மேலும் இயற்கை உணவில் வைட்டமின்களும், புரதச்சத்தும், நார்ச்சத்தும், தாதுப்பொருட்களும், நீர்ச்சத்தும் அழிக்காமல் பாதுகாக்கப்படுகின்றன.

மண்சிகிச்சை

இயற்கை மருத்துவத்தில் பஞ்ச பூதங்களை உபயோகித்து சிகிச்சை செய்யப்படுகிறது. அதாவது மண் சிகிச்சை, நீர் சிகிச்சை, வெப்ப சிகிச்சை, காற்று சிகிச்சை, உபவாச சிகிச்சை என்று பல சிகிச்சை முறைகள் உள்ளன.

மருந்துகளே இல்லாமல் செய்யும் காந்த சிகிச்சை, அக்குபிரசர், யோகா ஆகிய சிகிச்சை முறைகளை மாற்று மருத்துவ முறைகள் என்று அழைப்பது உண்டு. இவை எல்லாம் ஒன்று சேர்ந்த மருத்துவம் தான் இயற்கை மருத்துவம்.

மேலும் யோகசனம், தியானப்பயிற்சிகள் செய்தவன் மூலம் உடலையும், மனதையும் ஒரு
நிலைப்படுத்தி ஆரோக்கியமாக வாழ முடியும். இயற்கை மருத்துவத்தையும், யோகசனத்தையும் ஒன்றிணைந்து எடுத்துக்கொண்டால் எந்த நோயில் இருந்தும் மிக விரைவில் குணம் அடையலாம்.'' இவ்வாறு அவர்கள் பேசினர்.


http://www.viparam.com/%E0%AE%9A%E0%AF%81%E0%AE%95%E0%AE%BE%E0%AE%A4%E0%AE%BE%E0%AE%B0%E0%AE%AE%E0%AF%8D/23370.html