தொலைவில் உன்னை

by **மு.வித்யாசன்** Mon Oct 04, 2010 9:35 pm

எனது நெடுந்தூர தனிமை பயணத்தில்
உன் நினைவே துணை....

மெளனம் நிலை கொண்டிருக்கும் தருணத்தில்
உன் பேச்சின் நினைவே இசை...

கனவுகளின் மடியில் நான் கைதாகும்போதெல்லாம்
உன் வருகையின் எதிர்பார்ப்பே சுகம்...

தென்றல் உரசி போகும் வேளையில்
உன் சுவாச நுனி தொடும் இதம்...

ஏதேதோ மாற்றம் நிறைந்த வழித்தடம்.
அந்த வழி எங்கும் நான் தேடி அலைவது
உன் கால் தடம்...

வயதுகளின் ஏற்றங்கள் தோற்றங்களை
உருமாற்றம் செய்தாலும், உனது வடிவம்
மட்டும் அடி மனதில் அழியா சிற்பம்...

கலையும் மேகம் ஓவியம் கோடி
வரைந்தாலும், மேகம் கூடி வரும் போதெல்லாம்
இமை எனும் தூரிகை உன்னையே வரைகிறது...

இயலாமையின் கொடுமை
இழப்பின் அருமை
பிரிவின் ஆழம்
துயரின் துயரம்
உணர்கிறேன்
நீ தூரம் சென்ற நிமிடம்...

கதை சொல்ல உதடுகள் காத்திருக்கிறது
எங்கே உன் செவி ?

பார்த்தே அதிசயிக்க துடிக்கிறது விழிகள்
எங்கே உன் முகம் ?

நனைந்து கொண்டே நடக்க பொழிகறது மழை
எங்கே உன் வருகை ?

தொலையும் வாழ்க்கையின் கரையில்
தொலைந்து, தொலைத்து தேடுகிறேன்
தொலைவில் உன்னை !!

பாடகன்

by கலைவேந்தன் Mon Oct 04, 2010 9:40 pm

சீக்கிரம் கல்யாணம் செய்துக்கோங்க வித்யாசன்... இல்லைன்னா இன்னும் நிலைமை போசமாயிடும். ஜாலி

by **மு.வித்யாசன்** Mon Oct 04, 2010 9:45 pm

கவலை வேண்டாம் கலை அவர்களே... நிலை மாறிடாது அவளை காணும் வரை. நன்றி

by வினுப்ரியா Mon Oct 04, 2010 9:48 pm

கலையும் மேகம் ஓவியம் கோடி
வரைந்தாலும், மேகம் கூடி வரும் போதெல்லாம்
இமை எனும் தூரிகை உன்னையே வரைகிறது...

மிகவும் அருமையான வரிகள்

உங்கள் இமை வரைந்த ஓவியம்
உங்கள் இதயம் வந்து சேரட்டும்
கரங்கள் கோர்த்து காதல் வானில் பறக்கட்டும்

by அன்பு தளபதி Mon Oct 04, 2010 9:49 pm

சூப்பர் வித்யா கவிதை மெருகேறுகிறது

by **மு.வித்யாசன்** Mon Oct 04, 2010 10:05 pm

நன்றிகள் உங்கள் மறு பதிவுகளுக்கு.

" கை கொடு நண்பா...
உந்தன் கவிதை வளம்
எனக்குள்ளும் ஏதோ பண்ணுது...
உந்தன் காதலிக்கு தெரிந்தால்...
அவள் உள்ளமும்...துள்ளும்..!
சீக்கிரம் காதலியிடம் சேர என்
வாழ்த்துக்கள்...நண்பா..!