பெண்ணுக்கு ஆபாச எஸ்.எம்.எஸ்: எல்லை பாதுகாப்பு படைவீரர் சிக்கினார்

சென்னை ராஜா அண்ணாமலைபுரம் பக்ஸ் ரோட்டில் வசித்து வருபவர் சுதா (பெயர் மாற்றப்பட்டுள்ளது). இவரது செல் போனுக்கு தொடர்ந்து ஆபாச எஸ்.எம்.எஸ். வந்து கொண்டிருந்தது. எஸ்.எம்.எஸ். வந்த செல்போன் எண்ணுக்கு சுதா தொடர்பு கொண்டு பேசினார். அப்போதும் எதிர் முனையில் பேசிய வாலிபர் அறுவறுக்கத்தக்க வகையில் ஆபாச வார்த்தைகளை அள்ளி வீசியுள்ளார். இதனால் அதிர்ச்சியடைந்த சுதா, வாலிபரை எச்சரிக்கை செய்து விட்டு, போனை துண்டித்துவிட்டார்.
ஆனால், சுதாவின் செல்போனுக்கு தொடர்ந்து ஆபாச எஸ்.எம்.எஸ்.கள் வந்து கொண்டே இருந்தன. இதுகுறித்து சுதா தனது கணவருடன் சென்று அபிராமபுரம் போலீசில் புகார் செய்தார். போலீசார் வழக்குப்பதிவு செய்து விசாரணை நடத்தினர்.

சுதாவை பொறியாக வைத்து எஸ்.எம்.எஸ். வாலிபரை பிடிக்க முடிவு செய்தனர். இதன்படி சுதா சம்பந்தப்பட்ட வாலிபரின் செல்போனுக்கு தொடர்பு கொண்டு இனிக்க...இனிக்க.. பேசினார். நீங்கள் சென்னைக்கு புறப்பட்டு வாருங்கள். நாம் சந்திப்போம் என்று சுதா கூறியதும், குறிப்பிட்ட இடத்துக்கு எஸ்.எம்.எஸ். வாலிபர் வந்தார்.

அப்போது அங்கு மறைந்திருந்த போலீசார் வாலிபரை மடக்கி பிடித்து அபிராமபுரம் போலீஸ் நிலையத்துக்கு கொண்டு வந்தனர். அங்கு அவரிடம் விசாரணை நடத்தப்பட்டது. அப்போது அவர் எல்லைப்பாதுகாப்பு படை வீரர் என்பது தெரியவந்தது. வேலூர் காட்பாடியை சேர்ந்த இவர் உலந்தரில் பணிபுரிந்து வருகிறார். விடுமுறையில் ஊருக்கு வந்த இவர், சலபபுத்தி காரணமாக சுதாவுக்கு ஆபாச எஸ்.எம்.எஸ்.களை அனுப்பி விட்டேன்.

என்னை மன்னித்து விடுங்கள் என்று கெஞ்சினார். இதை தொடர்ந்து சுதாவும் மனமிறங்கி நடவடிக்கை தேவை இல்லை என்று எழுதி கொடுத்தார். இதனால் ஜாமீனில் வெளிவரக்கூடிய சட்டப்பிரிவில் வழக்கு பதிவு செய்து போலீசார் எல்லை பாதுகாப்பு படை வீரரை எச்சரித்து அனுப்பினர்.


இந்நேரம்