திருப்பதியில் மீண்டும் சிறுத்தைகள்

சித்தூர்: திருப்பதி ஏழுமலையான் கோயிலுக்கு நடை பயணமாக ஏராளமான பக்தர்கள் வந்து செல்கின்றனர். பக்தர்கள் அலிபிரியிலிருந்து நடைபாதை வழியாக திரும லைக்கு நடந்து செல்கின்றனர். சமீபத்தில் 2 சிறுமிகளை சிறுத்தைகள் தாக்கின. இதன்காரணமாக, இரவு 8 மணி முதல் காலை 5 மணி வரை நடைபாதை மூடப்பட்டது. பின்னர், தேவஸ்தான அதிகாரிகள் வனத்துறையினருடன் இணைந்து, மலைவழி பாதையில் கூண்டுகளை வைத்து 2 ஆண் சிறுத்தைகளை பிடித்து கடப்பா வனப்பகுதியில் விட்டனர். ‘இனி சிறுத்தை பயமில்லை, பக்தர்கள் பீதியடைய வேண்டாம்’ என தேவஸ்தானம் அறிவித்தது.

இரவு நேரங்களில் நடைபாதையில் பக்தர்கள் செல்ல மீண்டும் அனுமதிக்கப்பட்டது.இந்நிலையில் புரட்டாசி மாத 3வது சனிக்கிழமையொட்டி நேற்று முன்தினம் இரவு ஏராளமான பக்தர்கள் நடைபாதை வழியாக திருமலைக்கு சென்று கொண்டிருந்தனர். 10.30 மணியளவில் மான் பூங்காவில் மான்களின் இரைச்சல் அதிகமாக கேட்டது. இதனால் அவ்வழியாக சென்ற பக்தர்கள் மற்றும் தேவஸ்தான செக்யூரிட்டிகள் விரைந்து சென்று பார்த்தனர். அங்கு ஒரு சிறுத்தை சென்று கொண்டிருந்தது.

அதை கண்ட பக்தர்கள் அலறியடித்து ஓடினர். செக்யூரிட்டிகள் கற்களை வீசி சிறுத்தையை விரட்டியடித்தனர். இதே போல், திருமலை பாலாஜி நகரில் இரவு 9.30 மணியளவில் சிறுத்தை ஒன்று நடமாடியதை அப்பகுதி பொதுமக்கள் பார்த்துள்ளனர்.இதுகுறித்து தேவஸ்தான அதிகாரிகளுக்கு தகவல் தெரிவித்தனர். திருமலையில் 2 சிறுத்தைகள் நடமாட்டத்தை பார்த்து விட்டதால், பக்தர்களிடையே மீண்டும் பீதி ஏற்பட்டுள்ளது. வனத்துறையினர் நேற்று காலை சிறுத்தைகள் நடமாடிய பகுதிகளுக்கு சென்று கால் தடத்தை பதிவு செய்தனர். இதனைதொடர்ந்து நடைபாதை வழியில் இரவு நேரங்களில் பக்தர்கள் செல்ல மீண்டும் தடை விதிக்கலாமா என்று தேவஸ்தான அதிகாரிகள் ஆலோசனை நடத்தினர்