அயோத்தி: உச்சநீதிமன்றத்தில் இன்று விசாரணை

புதுதில்லி/லக்னெள, செப்.27: ராமஜென்ம பூமியில் சர்ச்சைக்குரிய இடம் யாருக்குச் சொந்தம் என்ற வழக்கில் அலாகாபாத் உயர் நீதிமன்றத் தீர்ப்பை ஒத்திவைக்க வேண்டும் என்ற மனுவை உச்ச நீதிமன்றம் செவ்வாய்க்கிழமை விசாரிக்கவிருக்கிறது.

இனி இந்த விவகாரத்தில் பேச்சு நடத்தி சமரசத் தீர்வு காண்பது என்பது இயலாதது எனவே அக்டோபர் 1-ம் தேதிக்குள் தீர்ப்பைக் கூறிவிட வேண்டும் என்று இந்த வழக்கின் வாதி, பிரதிவாதிகளான சுன்னி முஸ்லிம் வக்ஃப் வாரியமும், அகில பாரத ஹிந்து மகாசபையும் மீண்டும் அறிவித்துள்ளன.

இந்த விவகாரத்தில் பேச்சு நடத்தி சுமுகமான தீர்வு காண 3 மாதங்கள் அவகாசம் தேவை என்பதால் தீர்ப்பையும் அதுவரை தள்ளி வைக்க வேண்டும் என்று கோரப்போவதாக நிர்மோஹி அகடா என்ற ஹிந்து அமைப்பு தெரிவித்திருக்கிறது.

பிரணாப் முகர்ஜி: இடம் யாருக்குச் சொந்தம் என்பதில் நீதிமன்றம் என்ன தீர்ப்பு கூறுகிறதோ அதை இரண்டு தரப்பும் ஏற்க வேண்டும் அல்லது தங்களுக்குள் பேசித்தீர்க்க வேண்டும்; இதைவிட்டால் வேறு வழி ஏதும் இல்லை என்று மத்திய நிதி அமைச்சரும் மூத்த காங்கிரஸ் தலைவருமான பிரணாப் முகர்ஜி மேற்கு வங்கத்தில் திங்கள்கிழமை நிருபர்களிடம் கூறியிருக்கிறார். அவருடைய கருத்துதான் மத்திய அரசின் கருத்தும் என்று கருத இடம் இருக்கிறது.

வெள்ளிக்கிழமை வந்திருக்க வேண்டிய தீர்ப்பு: கடந்த வெள்ளிக்கிழமையே இந்த வழக்கின் தீர்ப்பு வெளிவந்திருக்க வேண்டும். ஆனால் அதற்கு முதல் நாள் உச்ச நீதிமன்றத்தில் ரமேஷ் சந்திர திரிபாடி என்கிற ஓய்வுபெற்ற அரசு அதிகாரி தாக்கல் செய்த சிறப்பு மனு விசாரணைக்கு ஏற்கப்பட்டதால், தீர்ப்பு கூறுவதை ஒத்திவைக்குமாறு அலாகாபாத் உயர் நீதிமன்றத்துக்கு உச்ச நீதிமன்றம் உத்தரவிட்டது.

இப்போது மீண்டும் இந்த மனு மீது செவ்வாய்க்கிழமை விசாரணை நடைபெறவிருக்கிறது.

அக்டோபர் 1-ம் தேதிக்குள் இந்த வழக்கில் தீர்ப்பு வந்துவிட வேண்டும்; ஏன் என்றால் இந்த வழக்கை விசாரித்த 3 நீதிபதிகளில் ஒருவர் அன்றைய தேதியில் பணியிலிருந்து ஓய்வு பெறுகிறார். அவருடைய இடத்துக்கு மற்றொருவர் நியமிக்கப்பட்டால் இந்த வழக்கு விசாரணை மீண்டும் முதல் கட்டத்திலிருந்து தொடங்கப்பட வேண்டியிருக்கும் என்பதால் அதிக கால தாமதம் ஆகும் என்று மனுதாரர் முகம்மது ஹசீம் அன்சாரி (90) வலியுறுத்தினார்.

ஆனால் நீதித்துறையைச் சேர்ந்தவர்களோ குறிப்பிட்ட அந்த நீதிபதிக்குப் பணி நீட்டிப்பு செய்துவிட்டு பிறகு அவரையும் கொண்டே தீர்ப்பைப் பெறலாம் என்கின்றனர்.

ராமஜென்ம பூமி யாருக்குச் சொந்தம் என்ற இந்த வழக்கு 60 ஆண்டுகளுக்கும் மேல் நடந்து வருகிறது.

அக்டோபர் 1-ம் தேதி தீர்ப்பு வழங்கிவிடுங்கள் என்று உச்ச நீதிமன்றத்திடம் கோரும் மனு தயாராகிவிட்டதாக வக்ப் வாரியம் சார்பில் வாதாடும் வழக்கறிஞர் ஜபரியப் ஜிலானி தெரிவிக்கிறார்.

பேச்சு மூலம் இந்தப் பிரச்னை தீராது என்று கூறும் ஜிலானி, இதற்கு முன் எத்தனை முறை சமரசப் பேச்சுகள் நடந்தன, எப்பொழுதாவது இதில் தீர்வு ஏற்பட்டிருக்கிறதா என்று கேட்டார். 1986 முதல் 2003 வரை தொடர்ந்து பல முயற்சிகள் மேற்கொள்ளப்பட்டதையும் அவர் நினைவுகூர்ந்தார்.

தீர்ப்பை இனியும் ஒத்திவைக்கக்கூடாது, வழங்கிவிட வேண்டும் என்றே தாங்கள் வலியுறுத்துவதாக அகில பாரதிய ஹிந்து மகாசபையின் மாநிலத் தலைவர் கமலேஷ் திவாரி தெரிவிக்கிறார். இனி சுமுகத் தீர்வு ஏற்படவே வழியில்லை என்றார் திவாரி.

3 மாதம் அவகாசம் கொடுங்கள், சமரசப் பேச்சுநடத்தி தீர்வு காண்கிறோம் என்று கேட்கப்போவதாக நிர்மோஹி அகடா சார்பில் வழக்கில் வாதாடும் வழக்கறிஞர் ஆர்.எல். வர்மா தெரிவிக்கிறார்.

மத்திய அரசு எச்சரிக்கை: அயோத்தி வழக்கில் தீர்ப்பு கூறலாம் என்று அலாகாபாத் உயர் நீதிமன்றத்துக்கு உச்ச நீதிமன்றம் உத்தரவிடக்கூடிய வாய்ப்பும் இருப்பதால் விழிப்புடன் இருக்குமாறு எல்லா மாநில அரசுகளுக்கும், மத்திய ஆட்சிக்குள்பட்ட பகுதிகளுக்கும் மத்திய உள்துறை அமைச்சகம் எச்சரிக்கை விடுத்திருக்கிறது.

உத்தரப்பிரதேசம், குஜராத், மகாராஷ்டிரம் ஆகிய மாநிலங்கள் கவனமாக இருக்க வேண்டும் என்று உள்துறை அமைச்சகம் வலியுறுத்தியிருக்கிறது.