ஒரே நாளில் 260 வழக்குகளில் தீர்ப்பளித்து ஆந்திர நீதிபதி சாதனை

by ரபீக் Mon Sep 27, 2010 5:12 pm

ஆந்திரா மாநிலம் நெல்லூர் மாவட்டத்தில் உள்ள வேங்கடகிரி கோர்ட்டில் நீதிபதியாக இருப்பவர் ஏசுரத்தினம். இவர் இந்த கோர்ட்டில் 4 மாதங்களுக்கு முன்பு பொறுப்பு ஏற்றார்.

நீதிபதி ஏசுரத்தினம் வழக்குகளை விரைந்து முடிப்பதில் பெயர் பெற்றவர். தன்னிடம் வரும் சிறிய வழக்குகளை இவர் ஒருபோதும் தேங்கவிட்டதில்லை.

கடந்த வெள்ளிக்கிழமை அவர் வழக்கு விசாரணைகளை மின்னல் வேகத்தில் நடத்தி தீர்ப்பு வழங்கினார். மொத்தம் 260 வழக்குகளை அவர் முடித்து தீர்ப்பளித்தார். இதில் பெரும்பாலான வழக்குகள் கடந்த பல வருடங்களாக நிலுவையில் இருந்தவை என்பது குறிப்பிடத்தக்கது.

நீதிபதி ஏசுரத்தினம் ஒரே நாளில் 260 வழக்குகளில் தீர்ப்பு வழங்கி இருப்பது புதிய சாதனையாக கருதப்படுகிறது. தீர்ப்பளிக்கப்பட்ட 260 வழக்குகளில் 157 வழக்குகள் கிரிமினல் வழக்குகளாகும், 103 வழக்குகள் சிவில் தொடர் புடையவையாகும்.

தீர்பளிக்கப்பட்ட 260 வழக்குகளில் 205 வழக்குகள் உரிய சாட்சி, ஆதாரம் இல்லாததால் தள்ளுபடி செய்யப்பட்டன. 13 வழக்குகளில் மட்டும் குற்றவாளிகளுக்கு தண்டனை கொடுக்கப்பட்டது. கடந்த 4 மாதங்களில் நீதிபதி ஏசுரத்தினம் 600 வழக்குகளில் தீர்வு கண்டுள்ளார். இதுவும் புதிய சாதனையாக கருதப்படுகிறது.

மாலைமலர்