பொண்ணு பாக்க போறேன் - சிறுகதை

balakarthik · balakarthik Mon Sep 27, 2010 2:52 pm

First topic message reminder :

செல்போனில் சில்பா பேசியதும் நான் பரபரப்பானேன்.
” ரூட் ஒன் நார்த் எடுத்திருக்கேன். அபார்ட்மென்ட்டுக்கு எப்படி வரணும்? “

” இன்னும் ரெண்டு மைல்தான். வலது பக்கம் வால் மார்ட் வரும். எதிர்ல லஃபாயட் கோர்ட் ! அபார்ட்மென்ட் நம்பர் பத்தொன்பது. “

சில்பா இன்னும் சில நிமிஷங்களில் வரப் போகிறாள் என்றதும் அபார்ட்மென்ட்டே கலகலத்துப் போனது. கோபியும், கார்த்திக்கும் கிச்சனில் தீவிரமாய் இயங்கினார்கள். பாபு ஹாலில் வேக்வம் போட்டு ப்ளவர் வாஸ்களில் புதுப் பூக்களைச் சொருகி வைத்தான். இந்த சம்பந்தத்தையாவது நல்லபடியாய் முடித்து விட வேண்டும் என்று எல்லோரும் கங்கணம் கட்டியிருந்தார்கள். அப்பா போன வாரம்தான் போன் பண்ணி சில்பா பற்றிச் சொன்னார்.

” நியூஜெர்சியில்தான் இருக்கா. ஜான்சன் அண்ட் ஜான்சன்ல பர்மனன்ட் உத்தியோகம். உன்னை நேர்ல பார்த்துட்டு முடிவு சொல்றாளாம். அவளுக்குப் பிடிக்கிற மாதிரி பக்குவமா பேசு. இனிமே இந்தியாவில் உனக்குப் பொண்ணு பார்க்க என்னால முடியாது. செப்டம்பர் 11-க்கப்புறம் எல்லாமே மாறிப் போச்சு. அமெரிக்கா மாப்பிள்ளைன்னா எல்லாரும் பின் வாங்கறா. அப்படியே நெருங்கி வந்தாலும் ஜாதகம் பார்க்கறாளோ இல்லையோ… பையன் எத்தனை நாள் பெஞ்ச்சில் இருந்தார், எத்தனை நாள் ப்ராஜெக்ட்டில் இருந்தார்ன்னு தேதி வாரியா ஜாப் ஹிஸ்டரி கேக்கறா. அன்னிக்கு ஒரு சம்பந்தம் ஒரு படி மேல போய் பையனோட சோஷியல் செக்யூரிட்டி நம்பர் தரேளா, பேக்ரவுண்ட் செக் பண்ணிட்டு சொல்றோம்ங்கறா. “

கார் ஹார்ன்.

சில்பா வந்து விட்டாள். ஆரஞ்சு நிறத்தில் ஷார்ட் ஷர்ட்டும், கறுப்பு வர்ண ஜீன்ஸும், ரேபான் கண்ணாடியும் அவளுக்கு அசத்தலாய்ப் பொருந்தி இருந்தது. இந்த 108-வது தேவதையாவது எனக்கு வாய்ப்பாளா? இருதயத் துடிப்பு எகிறுவதைத் தடுக்க முடியவில்லை.

ஹால் சோபாவில் அவள் கால் மேல் கால் போட்டு உட்கார்ந்ததும் கோபியும், கார்த்திக்கும் பாய்ந்து பாய்ந்து டீபாய் பூராவும் தட்டுக்களாய் நிரப்பி வைத்தார்கள். பாபு, ” ஜுஸ் சாப்பிடறிங்களா மேடம் ? ” என்றான்.

அவள் சிரித்து விட்டாள்.

” நோ தாங்க்ஸ். கால் மி சில்பா. மேடம் எல்லாம் வேண்டாம். என்ன இவ்வளவு அயிட்டம் குவிச்சிட்டிங்க. “

” எல்லாம் உங்களுக்காகவே ஸ்பெஷலா செஞ்சது. “

” நான் இங்கே சாப்பிட வரலை. இவரோட கொஞ்ச நாழி பேச வந்திருக்கேன். “

அவர்கள் வழிந்து கொண்டே இடத்தைக் காலி செய்தார்கள். நான் தொண்டையை செருமிக் கொண்டு எங்கே ஆரம்பிப்பது என்று யோசித்துக் கொண்டிருக்க – அவள் பளிச்சென்று விஷயத்துக்கு வந்தாள். ” ஓக்கே, உங்களைப் பத்தி சொல்லுங்க. நாம ஏன் கல்யாணம் பண்ணிக்கணும்ன்னு பத்து காரணங்களை உங்களால சொல்ல முடியுமா? “

இந்த அதிரடி கேள்வியால் எனக்கு தொண்டையும் நாக்கும் உலர்ந்து போனது. மெல்ல ஆசுவாசப்படுத்திக் கொண்டு பேச ஆரம்பித்தேன். ” முதல்ல என்னைப் பத்தி சொல்றேன். அமெரிக்கா வந்து நாலு வருஷம் ஆச்சு. ப்ரொஃபஷனல்ல ரொம்ப சுத்தம். இன்ஷ்யூரன்ஸ்ல ரெண்டு வருஷம், ஃபார்மால ரெண்டு வருஷம். பெஞ்ச்சுக்குப் போனதே இல்லை. அடுத்த மாசம் இ.ஏ.டி வந்துடும். மேனேஜ்மென்ட், ஆர்க்கிடெக்ச்சர், டிசைன்னு அம்பது அறுபது சர்டிபிகேடிபிகேஷன் பண்ணி வெச்சிருக்கேன். தவிர பார்ட் டைம் எம்பிஏ-ல ஜாயின் பண்ணியிருக்கேன். ஆறிலக்க சம்பளம். “

காலிஃப்ளவர் வறுவலுக்கிடையே இருந்த மிளகாயைக் கடித்து விட்டு, ” ஸ்ஸ் ” என்று அலறிய சில்பாவுக்கு பதறிப் போய் தண்ணீர் எடுத்துக் கொடுத்தேன். கண்களில் நீர் வழிய, ” தாங்க்ஸ் ” என்றாள். ” யார் பண்ணினது? “

” கார்த்திக். எப்பவுமே கொஞ்சம் காரத்தை அள்ளிப் போட்டுடுவான். கோபி செஞ்ச பகோரா சாப்பிடுங்க. மைல்டா இருக்கும். “

” நீங்க என்ன பண்ணினிங்க? “

” படிக்கவே நேரம் சரியா இருக்கு. கிச்சன் பக்கம் எட்டிப் பார்க்க மாட்டேன். டேஸ்ட் பண்றதுதான் என் வேலை. ” ஜோக் அடித்து விட்டதாக எண்ணிக் கொண்டு சத்தமாய் சிரித்தேன்.

அன்றைக்கு இரவே அப்பா போன் பண்ணினார். ” நாலு வருஷமா அமெரிக்கால குப்பை கொட்டியிருக்கார். ஆனா சமைக்க வராதாம். இவரோட எப்படிக் குடும்பம் நடத்த முடியும்?ன்னு சில்பா கேக்கறா. ஃபிலடெல்ஃபியாலிருந்து இன்னிக்கு ஒரு ஜாதகம் வந்திருக்கு. சீக்கிரமா சமைச்சுப் பழகித் தொலை. “

**சிவா** · **சிவா** Mon Sep 27, 2010 7:27 pm

///” நாலு வருஷமா அமெரிக்கால குப்பை கொட்டியிருக்கார். ஆனா சமைக்க வராதாம். இவரோட எப்படிக் குடும்பம் நடத்த முடியும்?ன்னு சில்பா கேக்கறா. ஃபிலடெல்ஃபியாலிருந்து இன்னிக்கு ஒரு ஜாதகம் வந்திருக்கு. சீக்கிரமா சமைச்சுப் பழகித் தொலை. “///

இப்படியுமா? பொண்ணு பாக்க போறேன் - சிறுகதை - Page 2 Icon_eek