பெண்களின் கருப்பையும் யோனியும்

ஹேர்பீஸ் சிம்ப்ளெக்ஸ் வைரசும் கருப்பைக் கழுத்துப் புற்றுநோயும்.


ஹேர்பீஸ் சிம்ப்ளெக்ஸ் வைரசுக்கும் கருப்பை கழுத்துப் புற்றுநோய்க்கும் இடையில் தொடர்பேதும் இருப்பதாக இதுவரையில் கண்டறியப்படவில்லை. எனினும் ஹேர்பீஸ் தொற்றிய ஒரு பெண் கருப்பை தொடர்பாக நடத்தப்படும் PAP SMEAR TEST (பப் சோதனை) வருடாந்தம் செய்து கொள்ளவேண்டும். இவ் சோதனையின் போது கருப்பைக் கழுத்துப் பாயம் நுணுக்குக் காட்டியினூடாக சோதிக்கப்படும்.

ஆபத்தை விளைவிக்காத கருப்பைக் கட்டிகள்.

உடலில் எங்கேயாவது கட்டி தோன்றிவிட்டால் கவலைப்படுவது இயல்பு. அந்தக் கட்டி எப்படித் தோன்றியது. என்ன விளைவுகள் செய்யும். என்ன முறையில் நிவர்த்திக்கலாம்? என்ற கேள்விகளுடன் அந்தக் கட்டி புற்றுநோய்க்கட்டியாக இருக்குமா என்ற குலைநடுங்கும் சந்தேகமும் ஏற்படுவது இயற்கை. ஆனால் உலகத்திலுள்ள பெண்களில் 20-25% மானவர்கள் தங்கள் வாழ்நாளில் கருப்பையில் கட்டியை உருவாக்கும் அல்லது கட்டியை கொண்டிருக்கும் தன்மையில் காணப்படுவார்கள் என மருத்துவ நூல்கள் சொல்கின்றன. இந்தக் கட்டியை Fibroid (பையிரோயிட்) என்று செல்லப் பெயரினாலும் Leiomyoma (லையோமயோமா) என்ற விஞ்ஞானப் பெயரினாலும் அழைக்கிறார்கள். இந்தக் கருப்பைக் கட்டிகள் கருப்பையின் தசைப் படையிலிருந்து உருவாகும் கட்டிகளாகும். இவை பிரச்சனைகளை ஏதும் தராத கட்டிகளாக குறிப்பாக புற்றுநோயாக மாறாத கட்டிகளாகவே இருக்கும். இவ்வாறு பிரச்சனை கொடுக்காத கட்டிகளை ஒரு பிரச்சனையாக எடுத்து ஏன் எழுதுகிறார் என நீங்கள் கேட்கலாம் இந்தக் கருப்பைக் கட்டிகள் சிறிதாக கருப்பையில் காணப்படும் போது பிரச்சனைகள் இல்லை கட்டிகள் பெரிதாகும் போது அல்லது எண்ணிக்கையில் அதிகமான கட்டிகள் காணப்படும் போது அல்லது கருப்பையின் “முக்கிய இடத்தில்” கட்டி வளரும் போது பிரச்சனைகளைக் கொடுக்கத் தொடங்குகிறது.

பொதுவாக இந்த பையிரோயிட் கட்டிகள் தற்செயலாக ஸ்கானிங் முறையிலும், சாதாரண வைத்திய பரிசோதனையிலும் கண்டறியப்படுகின்றன. இவை அந்தப் பெண்ணுக்கு எந்த வகையிலும் பிரச்சனை கொடுக்காமல் இருந்தால் மருத்துவர்கள் அந்தக் கட்டிகளுக்கு எந்த வைத்தியமும் செய்வதில்லை.

முன்பு சொன்னது போல கருப்பைக் கட்டிகள் பெரிதாக கருப்பை அகவணிக்கு (Endometrium) அருகாகக் காணப்படும் போது அதிக மாதவிடாய், குருதிப் போக்கு ஏற்படும். (Menorrhogia) இந்த பைபிரோயிட் அதிகளவு குருதியை கருப்பையிலிருந்து பெறும் போது வயிற்று வலி எற்படும் நிலைமைகளும் உண்டு. சில பெண்களுக்கு குழந்தையைப் போன்று கருப்பைக் கட்டிகளும் வளர்ச்சி அடைவதால் தாய்மையடைந்த பெண்களைப் போலவே வயிறு வீங்கிக் காணப்படும். இவ்வாறு பாரிய கட்டிகள் வயிற்று அங்கங்களை அழுத்துவதனால் இடுப்பு வலி, சிறுநீர் கழிக்கும் பிரச்சனைகள் ஏற்படுகின்றன.

முக்கியான விடயம், இந்த பைபிரோயிட் கட்டிகள் அதிகளவில் காணப்படும் போது அவை சில வேளைகளில் குழந்தைப் பேறு கிடைப்பதைக் குறைக்கின்றன. (Subfertility) சில வேளைகளில் அடிக்கடி கருச்சிதைவு ஏற்படவும் காரணமாக இருக்கின்றன. இவ் வகையாக கருப்பைக் கட்டிகள் தொல்லை தர ஆரம்பிக்கும் போது அவற்றை அகற்ற வேண்டிய தேவை மருத்துவர்களுக்கு உண்டு.

இலங்கையைப் பொறுத்த வரை இந்தக் கட்டிகளை அகற்றுவதற்கு இரண்டு வகையான சத்திரசிகிச்சைகள் மேற்கொள்ளப்படும். ஒன்று குழந்தைப் பேறை நிறைவு செய்து இனி குழந்தைகள் தேவையில்லை என்று சொல்லும் தாய்மார்களிக்கு இவர்களது கர்ப்பப்பையை நீக்கிவிடும் (TAH) சத்திரசிகிச்சையே அது. மற்றையது குழந்தைப் பாக்கியத்தை இன்னும் எதிர் பார்த்துக் கொண்டிருக்கும் பெண்கள் இவர்களில் கருப்பைகளை அகற்றினால் குழந்தைப் பேறு பின்னர் எதிர்பார்க்க முடியாது என்பதால் கட்டிகளை மட்டும் தோண்டி எடுக்கும் (Myomectomy) மயோமெக்டமி என்ற சத்திர சிகிச்சை மேற்கொள்ளப்படும். இதனால் கர்ப்பப்பை அகற்றப்படாமல் பாதுகாக்கப்படும்.

வெளிநாடுகளைப் பொறுத்தவரை இந்தக் கட்டிகளுக்கு உணவு மற்றும் ஒட்சிசன் வழங்கும் குழாய்களை அடைத்துக் கட்டியைச் சுருங்கச் செய்யும் தந்திரோபாயத்தை பரீட்சித்துப் பார்த்துக் கொண்டிருக்கிறார்கள் ஆயினும் இந்த Artery Embolization என்னும் முறை இன்னும் பிரபல்யம் அடையவில்லை என்றே சொல்ல வேண்டும்.

தவிர GnRH தூண்டிகளைச் செயல்படுத்துவதன் மூலம் செயற்கையான மாதவிடாய் நிறுத்தத்தை எற்படுத்தி கட்டியைச் சுருங்கச் செய்யும் முறை இருந்தாலும் அது இன்னமும் அவ்வளவாகப் பிரபல்யம் அடையவில்லை.

கமராவுடன் சேர்ந்த குழாயான Endoscope hysteroscopy போன்ற முறை மூலமும் சிறிய கட்டிகள் அகற்றும் வழிமுறைகளும் தற்போது பிரபல்யம் அடையத் தொடங்கியுள்ளன.

கடைசியாகச் சின்ன ஒருவிடயம் சொன்னால் கோபித்துக் கொள்ள மாட்டீர்களே? மிக மிக அரிதான சந்தர்ப்பங்களில் இந்தக் கட்டிகள் Fibroid Pmi-po sarcomatous change எனப்படும் புற்றுநோய் வகையாக மாறும் தன்மையும் உடையன. அடப்பாவி சும்மா ஒன்றும் செய்யாத கரைச்சல் இல்லாத கட்டி என்று சொல்லத் தொடங்கி விட்டு இப்படி ஒரு குண்டைத் தலையில் போடுகிறேன் என்கிறீர்களா? அதுதான் சொல்லி விட்டேனே மிகவும் குறைவாக சந்தர்ப்பத்தில் தான் இப்படி நிகழும் என்று. ஹூம் யாரைத் தான் நம்புவதோ இந்த விடயத்தில் என்கிறீர்களா? எதற்கும் வித்தியாசங்கள் தென்படும் பட்சத்தில் டாக்டரை அணுகி ஆலோசனை பெற்றால் எதற்கும் நல்லது தானே.
நன்றி : வீரகேசரி

மிக மிக அவசியமான பகிர்வு சபீர் இது..

பெண்களுக்கு கர்ப்பப்பை இருப்பது உடலுக்கு பலம்..

ஆனால் அதுவே ஆரோக்கியமாக இருப்பது நலம்...

அதில் இதுபோன்ற பிரச்சனைகள் வருவதை தடுக்க தரும் விழிப்புணர்வு கட்டுரையாக இதை கருத்தில் கொண்டு பெண்கள் எப்போதும் கவனமுடன் இருக்கவேண்டும்...

அன்பு நன்றிகள் சபீர் அருமையான கட்டுரை தந்தமைக்கு...