திண்டுக்கல் அருகே பரபரப்பு ஓடும் காரில், இளம்பெண் கற்பழித்து கொலை? 1 1/2 வயது குழந்தையுடன் பிணத்தை வீசிய பயங்கரம்

**சிவா** · **சிவா** Fri Sep 24, 2010 10:54 am

திண்டுக்கல் மாவட்டம் கன்னிவாடி செங்கமலையான் கோவில் அருகே, ஒரு குழந்தையின் அழுகை குரல் கேட்டது. அந்தபகுதியில் ஆடு மேய்த்து கொண்டிருந்தவர்கள் குழந்தையின் அழுகைகுரல் கேட்டதும் ஓடிச்சென்று பார்த்தனர். அங்கு சுமார் 11/2 வயது குழந்தை அழுது கொண்டிருந்தது. குழந்தையின் அருகில் 30 வயது மதிக்கத்தக்க ஒரு பெண் பிணமாக கிடந்தது கண்டு அவர்கள் அதிர்ச்சி அடைந்தனர். இது குறித்து உடனடியாக கன்னிவாடி போலீசுக்கு தகவல் தெரிவிக்கப்பட்டது.

போலீசார் சம்பவ இடத்துக்கு விரைந்து வந்து விசாரித்தனர். குழந்தையின் நெற்றி, கால் முட்டு பகுதியில் மட்டும் லேசான காயம் இருந்தது. அந்த குழந்தையை மீட்டு சிகிச்சைக்காக திண்டுக்கல் அரசு ஆஸ்பத்திரிக்கு போலீசார் அனுப்பி வைத்தனர். பிணமாக கிடந்த பெண்ணின் உடலை கைப்பற்றிய போலீசார், பிரேத பரிசோதனைக்காக திண்டுக்கல் அரசு ஆஸ்பத்திரிக்கு அனுப்பி வைத்தனர். ஆனால் பிணமாக கிடந்த பெண் யார்? எந்த ஊரை சேர்ந்தவர்? என்று தெரியவில்லை.

அவர் பிரவுன் கலரில் சேலை அணிந்திருந்தார். முதற்கட்ட விசாரணையில், அந்த பெண் கழுத்தை இறுக்கி கொலை செய்யப்பட்டு இருப்பது தெரியவந்தது. மேலும் அந்த பெண்ணின் இடுப்பு பகுதியில் கத்திக்குத்து காயமும் இருந்தது. இதற்கிடையே செம்பட்டியில் இருந்து ஒட்டன்சத்திரம் நோக்கி வேகமாக சென்ற ஒரு கார், சம்பவ இடத்தில் நின்றதாக தெரியவந்தது. எனவே, காரில் வந்த மர்ம நபர்கள் தான் பெண்ணின் உடலையும், குழந்தையையும் வீசி சென்றிருக்கக்கூடும் என்று அக்கம்பக்கத்தினர் போலீசாரிடம் தெரிவித்தனர்.

ஆனால், அந்த பெண் எதற்காக கொலை செய்யப்பட்டார்? அவரை கொலை செய்தது யார்? என்பது மர்மமாக உள்ளது. வேறு இடத்தில் கொலை செய்து விட்டு, உடலை காரில் கொண்டு வந்து இங்கே வீசி இருக்கலாம் என்ற கோணத்தில் போலீசார் விசாரணையை முடுக்கி விட்டுள்ளனர். மேலும் குழந்தையுடன் சென்ற பெண்ணை காரில் கடத்தி சென்று, கற்பழித்து கொலை செய்தார்களா? என்ற கோணத்திலும் போலீசார் விசாரணை நடத்தி வருகின்றனர். கழுத்தை இறுக்கி கொலை செய்து இருப்பதால், பிரேத பரிசோதனை அறிக்கை முடிவில் தான் உண்மை தெரியவரும்.

சாலையோரத்தில் சுமார் 30 வயது மதிக்கத்தக்க பெண் கழுத்தை இறுக்கி கொலை செய்யப்பட்டு கிடப்பதாகவும், அந்த பெண்ணின் உடல் அருகே 11/2 வயது குழந்தை அழுது கொண்டிருப்பதாகவும் கேள்விபட்ட கன்னிவாடி சுற்று வட்டார கிராம மக்கள், சம்பவ இடத்துக்கு ஓடோடி வந்தனர். குயவநாயக்கன்பட்டியை சேர்ந்த அழகுமலை என்பவரின் மகள் லெட்சுமி (வயது 25) என்பவரும் கூட்டத்தோடு கூட்டமாக நின்று வேடிக்கை பார்த்து கொண்டிருந்தார்.

அப்போது யாரும் எதிர்பாராத விதமாக லெட்சுமி மயங்கி விழுந்தார். இதைக்கண்ட அக்கம்பக்கத்தினர் அவரை சிகிச்சைக்காக கன்னிவாடியில் உள்ள ஒரு தனியார் ஆஸ்பத்திரிக்கு கொண்டு சென்றனர். அவரை பரிசோதனை செய்த டாக்டர்கள், ஏற்கனவே லெட்சுமி இறந்து விட்டதாக தெரிவித்தனர். கொலை செய்யப்பட்ட பெண்ணின் உடலை நேரில் பார்த்த அதிர்ச்சியில் பெண் இறந்த சம்பவம், கன்னிவாடி பகுதியில் மேலும் சோகத்தை ஏற்படுத்தியது.

http://tamilcnn.com