காமன் வெல்த் போட்டியா... காமெடி கவுண்ட் டவுன் போட்டியா.. - என்ன செய்யப் போகிறது இந்தியா

(மூவேந்தர்)

இந்தியா ஒரு வித்தியாசமான நாடு. அங்கு என்ன நடந்தாலும் மக்களோ அரசியல்வாதிகளோ அலட்டிக் கொள்ள மாட்டார்கள். அடுத்த மாதம் இந்தியாவில் காமன் வெல்த் போட்டி நடைபெற இருக்கிறது. இந்தியாவில் ஜனத்தொகை அதிகம் இருந்தாலும் விளையாட்டு போன்ற சர்வதேச நிகழ்ச்சிகளில் ஆர்வம் இல்லாதவர்கள். சினிமா நடிகர்களை தெய்வமாக நினைத்து அடிமைத்தனமாக வாழ்க்கை நடத்துபவர்கள். அதனால்தான் அவர்களால் ஒலிம்பிக் போன்ற விளையாட்டுகளில் முக்கி முக்கி ஒரு தங்கத்தை வெல்ல வேண்டி இருக்கிறது. சில நேரங்களில் அதுவும் கிடைக்காது.

ஆனால், இதைப்பற்றி அங்குள்ள தலைவர்கள் கவலைப்பட மாட்டார்கள். இதற்கு ஒரு வீர வசனத்தை வெட்கமில்லாமல் பேசுவார்கள். அடுத்த ஒலிம்பிக்கில் 550 தங்கப்பதக்கத்தை இந்தியா வெல்லும் என்று உலக நாடுகளுக்கு சவால் விடுவார்கள். மக்களும் கைதட்டி ஆராவாரம் செய்வார்கள். உண்மையான விளையாட்டு வீரர்களை விட விஜய் ரஜினி போன்ற நடிகர்கள் சினிமாவில் விளையாட்டு வீரர்களாக நடித்து தங்கப் பதக்கம் வாங்கினால் அதற்காக அவர்களின் கட்டவுட்டுக்கு பாலாபிஷேகம் செய்யும் அளவுக்கு மட்டரகமானவர்கள்.

இப்படி இருக்கும்போது இந்தியாவுக்கு காமன் வெல்த் விளையாட்டு போட்டி நடத்த வேண்டும் என்ற ஆசை வந்ததுதான் வேடிக்கை. ஆனால் இது தேவையில்லாத வேலை என்று உலக நாடுகளில் அப்போதே ஒரு முணூமுணுப்பு கிளம்பியது. அதற்காக முப்பதாயிரம் கோடி ரூபாய் தண்ணீராக செலவு செய்யப்பட்டது. ஆனால், அதிலும் ஊழல். இப்படி ஆளும் கட்சியினர் ஊழல் செய்வதற்காகத்தான் விளையாட்டு போட்டியே அறிவிக்கப்பட்டது. மற்றபடி நாட்டின் அந்தஸ்தை உலக நாடுகளின் மத்தியில் உயர்த்துவதற்காக அல்ல என்ற குற்றச்சாட்டும் பரவலாக எழுந்தது.

இதனிடையே வெளிநாட்டு வீரர்கள் தங்கும் காமன வெல்த் கிராமம் தரமாக இல்லை என்று பல மேற்கத்திய நாடுகள் சுட்டிக் காட்டின. ஒரு மேம்பாலம் இடிந்து விழுந்து அதை நிரூபித்தது. அடுத்ததாக மல்யுத்த அரங்கத்தின் கூரை சரிந்து அதை ஆமோதித்தது. ஆனால், இப்படி ஒரு கேவலமான நிலை ஏற்பட்டிருக்கிறதே என அந்த நாட்டு அமைச்சர்கள் வெட்கப்படவில்லை. நியூசிலாந்து விளையாட்டுக்கு வரவில்லை என வெள்ளை அறிக்கை வாசித்து விட்டது. கனடாவும் கண்டனக் குரல் எழுப்பி விட்டது. ஆஸ்திரேலியாவோ வீரர்களுக்கு பாதுகாப்பு தேவை என வேண்டுகோள் விடுத்து இருக்கிறது. இஷ்டப்பட்டால் போங்கள் என்று இங்கிலாந்து வீரர்களுக்கு அந்த நாட்டு அரசாங்கம் அறிவுரை கூறியுள்ளது.

இப்படி விளையாட்டு நடைபெறுவதற்கு முன்பே பல வில்லங்கங்கள் எழுந்தாலும் இந்த விளையாட்டு சம்பந்தமான பொறுப்பாளர்கள் எதைப்பற்றியும் கவலை இல்லாமல் அறிக்கை விடுகிறார்கள். மேல் கூரை விழுந்து 1000 பேர் மேல் உலகம் போனால் கூட அசர மாட்டோ ம், சின்ன கூரை விழுந்ததுக்கு போய் இந்த பயந்தாங்கொள்ளி நாடுகள் பந்தா காட்டுகின்றன என ஓர் மத்திய அமைச்சர் கூறுகிறார். கதவில்லாத வீடுகளில் இந்திய மக்கள் வசிக்கும் போது கூரை இல்லாத விளையாட்டு அரங்கத்தில் இந்த பசங்களால் விளையாட முடியாதா என ஓர் அரசியல் வாதி கேள்வி எழுப்பினாராம்.

காமன் வெல்த் போட்டி விளையாட்டு அரங்கம் கட்டுவதில் ஆரம்பத்தில் இருந்தே ஊழல் நடைபெறுவதாக ஆதாரப்பூர்வமான தகவல்கள் வெளியாகின. இருந்தாலும் ஆளூம் கட்சி சம்பந்தப்பட்டதாலும் அடுத்த தேர்தலுக்கு தேவையான பணத்தை இந்தத் திட்டத்தின் மூலமாகத்தான் அறுவடை செய்ய வேண்டிய கட்டாயத்தில் ஆளும் தரப்பினர் இருப்பதாலும் அது அப்படியே அமுக்கப்பட்டு விட்டது. முதல் கோணல் முற்றும் கோணல் என்பது போல செலவு செய்வதற்கு முன்னரே ஊழல் என்றால் கட்டடங்கள் எப்படி தரமானதாக இருக்கும் என ஒரு சமுதாய அக்கறையாளர் கேள்வி எழுப்புகிறார்.

என்ன கேள்வி எழுப்பினாலும் எத்தனை நாடுகள் எட்டி உதைத்தாலும் அதைப்பற்றி கவலைப்படாதவர்கள் இந்தியத் தலைவர்கள். வெட்கப்படுகின்றவர்களுக்குத்தானே வேதனையும் துன்பமும். மானப்பிரச்சினை இல்லாதவர்களை இது போன்ற காரியங்கள் எந்தக் காலத்திலும் பாதிக்காது என அவர் குறிப்பிடுகிறார். இது தவிர தீவிரவாதிகள் மிரட்டல் வேறு. ஆனால் அதெல்லாம் எங்களுக்கு பெரிய பிரச்சினை இல்லை. விரல் நுனியில் அடக்கி விடுவோம் என மார் தட்டுகிறார்கள்... காஷ்மீரில் கட்டுக்கடங்காமல் தலைவிரித்தாடும் கலவரத்தை அடக்கமுடியாமல் பாதுகாப்புப் படையினர் திண்டாடிக் கொண்டிருக்கும் காட்சியை தொலைக்காட்சியில் பார்த்தபடி.

எது எப்படியோ... காமன் வெல்த் போட்டி நடைபெற இன்னும் பத்து நாட்களே இருக்கின்றன. அது காமன் வெல்த் போட்டியா... காமடி கவுண்ட் டவுன் போட்டியா.. என்பது போட்டி முடிவில் தான் தெரியும். காமன் வெல்து போட்டி வடிவேலு காமெடி மாதிரி நடந்தாலும்... இவர்களுக்கெல்லாம் விளையாட்டுப் போட்டி ஒரு கேடா... என ஏனைய நாடுகள் எள்ளி நகையாடினாலும் அதைப்பற்றி அலட்டிக் கொள்ளாமல் "காமன் வெல்த் போட்டி நூறு சதவிகிதம் வெற்றி. கலக்கி விட்டது இந்தியா" என அரசியல் தலைவர்கள் அறிக்கை விட்டு உலக நாடுகளின் கண்களில் விரலை விட்டு ஆட்டப் போகிறார்கள் என்பது மட்டும் உண்மை :D :evil: