தூக்கத்தைத் தொடர்பவர்களா நீங்கள்?

by gnsraaga Thu Sep 23, 2010 10:21 pm

அதிகாலை ஆறுமணிக்கு அலாரம் வைத்துவிட்டு, அலார சப்தம் கேட்டவுடன் அலறியடித்து எழுந்திருந்து ஆறரை, ஏழு என நேரத்தை மாற்றி வைத்தபடியே தொடர்ந்து தூக்கத்தைத் தொடர்பவர்களா நீங்கள்?

`நான் ஒரு சோம்பேறி, தூங்குமூஞ்சி' என்றெல்லாம் நீங்கள் குற்ற உணர்வு கொள்ள வேண்டாம். உங்கள் உடலுக்குத் தேவையான ஓய்வைத்தான் நீங்கள் வழங்குகிறீர்கள். அது உடலுக்கு மட்டுமின்றி மனதிற்கும்கூட மிக அவசியமானது. இயல்பைவிடவும் அதிகமாக உழைக்கிறபோது அதற்கேற்ப ஓய்வெடுக்க வேண்டியதும் முக்கியமானது.

ஒருநாள் இரவு சரியாக தூங்காவிட்டாலே மறுநாள் பகல் முழுவதும் கண்ணெரிச்சல், ஞாபகமின்மை, உடல் சோர்வு, மனச்சோர்வு என்று பலப்பல பிரச்சனைகள். தொடர்ந்து போதுமான தூக்கம் இல்லாமல் இருப்பதோ மன அழுத்தத்தை அதிகரிக்கச் செய்வதோடு நோய் எதிர்ப்புச் சக்தியையும் குறைப்பதாக எச்சரிக்கிறார்கள் மருத்துவ நிபுணர்கள்.

நியூஸிலாந்து மற்றும் ஆஸ்திரேலிய நாடுகளில் தூங்காமல் தொடர்ந்து வாகனம் ஓட்டியவர்களிடம் ஆய்வு மேற்கொள்ளப்பட்டிருக்கிறது. அதில் தூங்காததன் விளைவாக ரத்தத்தில் ஆல்கஹால் அளவு 0.05 சதவீதம் உயர்ந்திருப்பது கண்டுபிடிக்கப்பட்டது. சட்டரீதியாக அனுமதிக்கப்பட்ட அளவைக்காட்டிலும் இது அதிகமானது. தூங்காமல் இருப்பதும் குடிமகனாய் இருப்பதும் உடலில் ஒரே விளைவைத்தான் ஏற்படுத்துகிறது.

இரவும் பகலும் இடைவெளியின்றி தொடர்ந்து பணியிலிருக்கும் மருத்துவர்கள் நோயாளிகளின் பரிசோதனை விவரங்களை தப்பும் தவறுமாக புரிந்துகொள்கிறார்கள் என்று பயமுறுத்துகின்றன மேலும் சில ஆய்வுகள்.

சில நாட்கள் மட்டும் தொடர்ந்து சரியாக தூங்காவிட்டால் கொஞ்சநேரம் கூடுதலாகத் தூங்கி அதை சரிசெய்து கொள்ளலாம். சில வாரங்கள், சில மாதங்கள் என்று தொடர்ந்து சரியாக தூங்காவிட்டால் உடல்பருமனுக்கு அதிக வாய்ப்புகள் இருப்பதோடு நீரிழிவு நோய்க்கும்கூட அது காரணமாக அமைந்துவிடுகிறது.

மனித உடலிலுள்ள பழைய செல்கள் அழிந்து புதிய செல்கள் உருவாகும் வளர்சிதை மாற்றச் செயல்கள் அனைத்தும் தூக்கத்தின்போதே நடக்கிறது. நினைவில் வைத்திருக்கவேண்டிய தகவல்களை மூளையிலுள்ள நினைவுத்திறன் பகுதி பதிவு செய்வதும் தூக்கத்தில்தான்.
எனவே தூங்குவது என்பது நேரத்தை வீணடிப்பது அல்ல. விழித்திருக்கும் நேரத்தை முழுமையானதாகவும் பயனுள்ளதாகவும் மாற்றுகின்ற செயல். ஆழ்மனமும் வெளிமனமும் கட்டிப்பிடித்து காதல் செய்வது கனவில் மட்டுமே சாத்தியம் என்பதால் அதை அனுமதிக்க வேண்டும். மனிதனின் கற்பனைத்திறனும் படைப்பாற்றலும் மேம்பட கனவுகள் அவசியம். தூக்கத்தை தவிர்த்தால் கனவு எப்படி வரும்?

சரி எவ்வளவு நேரம் தூங்குவது போதுமானது என கேட்கிறீர்களா? தூக்கத்தின் அளவு நபருக்கு நபர் மாறுபடுகிறது. சிலருக்கு ஐந்து மணிநேரம். சிலருக்கு பத்துமணி நேரம். மற்றவர்களுக்கு இரண்டுக்கும் இடைப்பட்ட நேரம். படுக்கையிலிருந்து எழுந்த ஐந்து நிமிடத்திற்குள் சோர்வு களைந்து உங்களை புத்துணர்ச்சி தொற்றிக்கொண்டால் நீங்கள் தூங்கியது போதுமானது என்று அர்த்தம்.