அதிர்ஷ்ட ரேகையை ....

கிழிந்த கோணிப்பைக்குள்
இருப்பவை எல்லாம்...
அவனுக்கு சொந்தமானவை...
வீடு, மனைவி, மக்கள் என்ற
உலகத்தை விட்டு
தனித்து இயங்குபவன்!
அடுத்தவேளை உணவு என்பது கூட
இல்லாமலும் இருக்கலாம்!
ஒளியிழந்த கண்கள் என்றாலும்
வெளிச்ச நிகழ்வுகளை
அவனது பார்வைகள் அவ்வப்போது
அங்கீகரிக்கின்றன...
இரவு போர்வைக்குள்
உலகம் உறங்குமுன்னே...
இவனது கோணிப்பைக்குள்
தினுசு தினுசாய் சிதைந்த பொருட்கள்!
குப்பை மேட்டிலும், கால்வாய்களிலும்
கிளறிய கைகளின் அழுக்குகளினூடே...
மறைந்திருக்கும் அவனது
அதிர்ஷ்ட ரேகையை
அடையாளம் காண முற்படுகையில்
தூக்கி எறியப்பட்ட உடைந்த
'பிளாஸ்டிக்' வாளியை எடுக்க
முந்திக்கொண்டு ஓடுகிறான்....
பயனற்ற பொருட்களுக்கும்
மறுவாழ்வு இருக்கிறதே...!
என்றெண்ணியவாறு!!

......கா.ந.கல்யாணசுந்தரம்.