புதுசா அடி வாங்க ரூம் போட்டு யோசிக்கிறேன் நடிகர் வடிவேலு பேட்டி

காமெடியில் குழந்தைகளுக்கும் நெருக்கமாக இன்று கலக்கி வருபவர் நடிகர் வடிவேலு. போக்குவரத்து நெரிசல் மற்றும் டப்பிங் வேலைகளுக்கிடையில் சிக்கி பத்திரிகையாளர்களை சந்தித்தபோது அவரிடம் கேட்ட கேள்விகளுக்கு அவர் அளித்த பதில்கள் வருமாறு:_


கேள்வி: `அழகர் மலை' படத்தில் என்னவாக வருகிறீர்கள்?


பதில்: எல்லா படங்களுக்குமே நான் சப்போர்ட்டாக இருக்க வேண்டும் என்று நான் உழைக்கிறேன். ஸ்பாட்டில் போய் எதையும் யோசிக்கிறேன் என்று சொல்லி தயாரிப்பாளர்களின் காசை விரயம் செய்வதில் எனக்கு சம்மதமில்லை. நாளைக்கு சுடுற தோசைக்கு முந்தைய நாளே மாவை தயார் செய்து தரணும். அப்பதான் தோசை ருசியாக இருக்கும். அது மாதிரி என் படங்களில் எல்லாமே காமெடி சீனுக்காக முந்தின நாளே தயாராகிறேன். மறுநாள் நடக்கிற சூட்டிங்குக்கு முந்தின நாளே ரெடியா இருக்கணுங்கிறது தான் என்னோட வேலை.


`அழகர் மலை' படத்தில் எனக்கு தனி ட்ராக் இல்லாமல் கதையோடு இணைந்து ஆர்.கே.வுக்கு தாய் மாமனாக படம் முழுக்க வருகிறேன். உங்கள் வயிறு வலிக்கு நான் கியாரண்டி. ஆர்.கே. என்னை சிக்கலில் மாட்டி விடும் நல்ல மாப்பிள்ளை. அவருக்கு தாய் மாமனாக வருகிறேன். `எல்லாம் அவன் செயல்' படத்தில்' இரண்டு பேரும் சேர்ந்து நடித்தது ஒர்க் அவுட் ஆனது போல் `அழகர் மலை'யில் எங்க மாமன்_ மாப்பிள்ளை கூட்டணி டபுள் மடங்கு ஒர்க் அவுட் ஆகும்.


கேள்வி: தொடர்ந்து அடிவாங்கும் காமெடியிலேயே நடிக்கிறீர்களே?


பதில்: அடி வாங்குவது வடிவேலு இல்லை. வடிவேலை அடிக்க முடியாது. கேரக்டர் தான் அடி வாங்குகிறது. நான் அடி வாங்குகிறேனா? இல்லை. சாக்கடையில் விழுகிறேனா என்பது முக்கியமல்ல. மக்கள் சிரிக்கிறார்களா என்பதுதான் முக்கியம். அடி வாங்குகிற காமெடியாக இருந்தாலும், அதில் எப்படி யாரும் யோசிக்காத விஷயங்களை கொண்டு வரணும் என்பதும், திரும்ப வருகிற மாதிரியான காட்சிகளை எப்படியும் தவிர்க்கணும் என்பதும் தான் எனது நோக்கம். புது அடி வாங்குகிற சீனுக்காக ரூம் போட்டு யோசிக்கிறோம் அப்பு... சும்மா இல்லை.


கேள்வி: நிறைய படங்கள் நடிக்கிறீங்க... தொடர்ந்து வித்தியாசம் காட்ட முடியுமா? எங்கிருந்து பிடிக்கிறீங்க?


பதில்: அரை டவுசர் போட்டு நடிச்சவன் அரசர் வேஷம் வரைக்கும் போட்டு நடிச்சிட்டேன். இதைவிட வேறென்ன வேணும்? சொல்றதுக்கு நிறைய காமெடி இருக்கு. மக்கள் கிட்டே இருந்துதான் எடுக்கிறேன். அவங்களை விட்டு தள்ளிப் போயிட்டா வேற எவனுக்கோ காமெடி பண்றாங்கன்னு நினைச்சுட்டு சிரிக்காம இருந்துருவாங்க. அதனால இங்க பேச, சிரிக்க நினைக்கிற விஷயங்களைத்தான் தேடிப் பிடிக்கிறேன்.


கேள்வி: உங்க கூட இருக்கிறவங்க... இப்போ இல்லைன்னு ஒரு பேச்சு?


பதில்: அவங்களும் வரணுமில்ல... தெரிஞ்ச முகமாயிட்டாங்க. வேற வேற படங்களிலே நடிக்க வாய்ப்பு வருது. போய் பண்றாங்க. அவங்க எனக்கு அறிமுகமாகும்போது புதுசாதான் அறிமுகமானாங்க. அதேபோல இப்போ நிறைய புது முகங்களோட புதிய காமெடிகளோடும் போட்டியிருக்கு, வேற வேற வெரைட்டி தரணுமில்ல. அழகர் மலை பாருங்க தெரியும். கேள்வி: ஹீரோவாக நடிக்க நிறைய பேர் கிளம்பி வாறாங்க. ஆனா... காமெடியனாக ஆக ஆசைப்பட்டு அதிகமாக வர்றதில்லையே?


பதில்: ஹீரோவா அடிதடி, காதல் காட்சிகளில் இறங்குறது ஈஸி. சிரிக்க வைக்கிறது கஷ்டம். காமெடியை நீங்க, நான் யார் வேணா ரசிக்கலாம். ஆனா, காமெடி பண்றது கஷ்டம். அதுகூட காரணமாக இருக்கலாம்.


கேள்வி: உங்களுக்கு `அழகர் மலை' பப்ளிசிட்டியில் அதிக முக்கியத்துவம் இருக்கே?


பதில்: ஐயா, என்னோட காமெடியை பார்க்க ஒரு கூட்டம் இருக்கா? இல்லையா? அந்த கூட்டம் வரணும்னு என்னோட போட்டோவை போடறாங்க. யார் முக்கியம்னு பார்க்கிறதை விட படம் முக்கியம்னு பார்க்கிறாங்க அழகர் மலையில். அழகர்மலையில் அவ்வளவு காமெடி பண்ணியிருக்கேன். அடுத்த அதிரடி அதுதான்.


கேள்வி: அழகர் மலை ஹீரோ, இயக்குநர் பற்றி?


பதில்: இயக்குநர் எஸ்.பி. ராஜ்குமாரை முதல் படத்திலிருந்தே அறிவேன். அவரது படங்களில் காமெடிக்கு முக்கியத்துவம் இருக்கும். அது அழகர்மலையிலும் இருக்கிறது. ஆர்.கே. நல்ல மனிதர். காமெடி ரசிகர். எல்லாம் அவன் செயல் படத்திற்கு பிறகு தொடர்ந்து நடிக்கிறோம்.


கேள்வி: சமீபத்தில் மறக்க முடியாத ஒரு சம்பவம்?


பதில்: சேலத்தை சேர்ந்த ஒரு குழந்தை விபத்தில் சிக்கி கோமா ஸ்டேஜிலிருந்தார். அவருக்கு எனது காமெடியை டி.வி.யில் போட்டு போட்டு காட்டி குணப்படுத்தியிருக்கிறார்கள். அந்த பெண் இப்பொழுது நல்ல நிலையில் இருப்பதற்கு அந்த காமெடி வரத்தை கொடுத்த கடவுளுக்கு நன்றி. கேள்வி: காமெடிக்கு முக்கியத்துவம் அதிகரித்துள்ளதே?


தனி சானல் ஆரம்பிக்கிற அளவுக்கு 24 மணி நேரம் அந்த சேனல்களை பார்க்கிற அளவுக்கு காமெடி வளர்ந்துள்ளது. காமெடி இப்போது தேவையான மருந்து. காமெடி இல்லாமல் சினிமா இல்லை. இவ்வாறு அவர் கூறினார்.