இண்ட்ராப் தடை செய்யப்பட்டது

மலேசியாஇன்று

இண்ட்ராப் தடை செய்யப்பட்ட ஓர் அமைப்பு என்று அரசாங்கம் நேற்று அறிவித்தது.

“இண்ட்ராப் சட்டத்துக்குப் புறம்பான நடவடிக்கைகளுக்குப் பயன்படுத்தப்பட்டிருப்பதையும் பயன்படுத்தப்பட்டு வருவதையும் அது பொது ஒழுங்குக்கும் நன்னடத்தைக்கும் ஒரு மருட்டலாக இருப்பதையும்” காட்டும் ஆதாரங்களில் உள்துறை அமைச்சு மனநிறைவு கொண்ட பின்னர் அதனைத் தடை செய்யும் முடிவுக்கு வந்ததாக அமைச்சர் சைட் அமிட் அல்பார் கூறினார்.

“சங்கச் சட்டத்தின் பகுதி 5 (1) இன்கீழ் இண்ட்ராப் சட்டத்துக்குப் புறம்பான அமைப்பாக அறிவிக்கப்படுகிறது”, என்றாரவர்.

இண்ட்ராப் அமைக்கப்பட்டதிலிருந்து அதன் நடவடிக்கைகளைச் சங்கப் பதிவதிகாரியும் உள்துறை அமைச்சும் கண்காணித்து வந்திருப்பதாக சைட் அமிட் கூறினார்.

இண்ட்ராப்பைத் தடுக்காவிட்டால், அது பொது ஒழுங்குக்கும் பாதுகாப்புக்கும் நாட்டின் அரசுரிமைக்கும் இன இணக்கத்துக்கும் மருட்டலாக விளங்கும்.

“அது சட்டத்தை மீறிய ஒன்றிரண்டு சம்பவங்களை மட்டுமல்லாமல் அமைக்கப்பட்டதிலிருந்து அது ஈடுபட்ட எல்லா நடவடிக்கைகளையும் கருத்தில்கொண்டே இண்ட்ராபைத் தடை செய்யும் முடிவு எடுக்கப்பட்டது”, என்று சைட் அமிட் சொன்னார்.

நிறுவனப் பூர்வமாக அமைந்த ஒரு அமைப்புக்கான தகுதிகளெல்லாம் இண்ட்ராபிடம் இருந்தன அதனால்தான் கடந்த ஆண்டு அக்டோபர் 16 இல், அது சங்கப் பதிவதிகாரியிடம் பதிவுக்காக விண்ணப்பம் செய்திருந்தது.

அதன் விண்ணப்பம் இன்னும் அங்கீகரிக்கப்படவில்லை.

இந்திய சமூகத்தைப் பயன்படுத்தி, அனுமதியின்றி சட்டத்துக்குப் புறம்பான பேரணிகளையும் தெரு ஆர்ப்பாட்டங்களையும் அந்த அமைப்பு ஏற்பாடு செய்திருக்கிறது.

இச்செயல்களின் விளைவாக இந்தியர்களில் பலர் அரசாங்கத்துக்கு எதிராக எழுச்சிகொண்டார்கள்.

இண்ட்ராபின் நடவடிக்கைகள் நாட்டில் மலாய்க்காரர்களுக்கும் இந்தியர்களுக்குமிடையே கசப்புணர்வைத் தோற்றுவித்திருப்பதாகவும் சைட் அமிட் கூறினார்.

அதன் கோரிக்கைகளுக்கு அரசாங்கம் பணிய வேண்டும் என்பதற்காக வெளிநாடுகளின் ஆதரவைப் பெற்று அதன்மூலமாக நெருக்குதல் கொடுக்கும் முயற்சியிலும் இண்ட்ராப் ஈடுபட்டது.

இண்ட்ராபைவிட்டு விலகியிருக்க வேண்டும் என்றும் அதன் நடவடிக்கைகளில் பங்குபெறக்கூடாது என்றும் சை அமிட் பொதுமக்களுக்கு ஆலோசனை கூறியுள்ளார்.

அண்மைய வாரங்களில், இசா-எதிர்ப்பைப் பிரதமருக்கு உணர்த்துக்கும் நோக்கத்துடன் அவர் ஏற்பாடு செய்திருந்த ஹரிராயா திறந்த இல்ல உபசரிப்பில் கலந்து கொண்டதன்வழி இண்ட்ராப் மீண்டும் செய்திகளில் முக்கிய இடம்பெற்றது.

அவர்களின் செயலை, இஸ்லாத்துக்கு முரணான ஒன்று எனவும் தேவையில்லாத ஒன்று எனவும் அரசாங்கமும் மலாய் ஊடகங்களும் கூறின. பலர் அந்த அமைப்பைத் தடை செய்ய வேண்டும் எனவும் வலியுறுத்தினர்.

தடைவிதிப்புத் தொடர்பாக கருத்துரைத்த ஜசெக தலைவர் லிம் கிட் சியாங், தேச-நிர்மாணிப்பை ஒரு புதிய, முதிர்ச்சியடைந்த நிலைக்குக் கொண்டு செல்வதில் பிரதமர் தோல்வியுற்றதுக்கு அது சான்று பகர்வதாகக் குறிப்பிட்டார்.

அது மலேசியர்கள் ஒற்றுமையுடன் திகழ்வதற்கு இடையூறாக அமையும், பிற்போக்கான, பழிவாங்கும் நோக்கம் கொண்ட சில்லறைத்தனமான நடவடிக்கை என்று லிம் குறிப்பிட்டார்.

இண்ட்ராபைத் தடை செய்யும் நடவடிக்கை இந்திய சமூகத்தின் மனக்குறையை மேலும் மோசமாக்கும் என்றாரவர்.

நாடாளுமன்றத்தில் மாற்றரசு நாடாளுமன்ற உறுப்பினர்கள் இண்ட்ராப் தடை செய்யப்பட்ட விவகாரத்தை எழுப்புவார்கள் என்று அவர் கூறினார்.

“உள்துறை அமைச்சு, இண்டாராப் மீதான தடையை நீக்க வேண்டும் என்று கேட்டுக்கொள்வதில் பாரிசான் உறுப்பினர்களும் பக்காத்தான் ரக்யாட் உறுப்பினர்களுடன் சேர்ந்து கொள்ள வேண்டுமாய் அழைப்பு விடுக்கிறேன்”, என்று லிம் கூறினார்.