வல்லரசாகிறது, இந்தியா! -தாக்கும் எதிரியை அழிக்கும் அதி நவீனத் தொழில்நுட்பம்

**சிவா** · **சிவா** Mon Aug 03, 2009 3:01 am

வல்லரசாகிறது, இந்தியா! -தாக்கும் எதிரியை அழிக்கும் அதி நவீனத் தொழில்நுட்பம்

பல்வேறு முனைகளில் இருந்து தாக்கும் எதிரியை, சுவடு தெரியாமல் அழிக்கும் அதிநவீனத் தொழில்நுட்பத்தை கண்டுபிடித்து இந்திய விஞ்ஞானிகள் புதிய சாதனை படைத்துள்ளனர்.

வல்லரசுகளுக்கு இணையாக, அணுசக்தித் துறையில் இந்தியா அசுர வளர்ச்சி அடைந்து வருகிறது.

இந்நிலையில், நாட்டின் பாதுகாப்புத் திறனை பல மடங்கு மேம்படுத்தும் வகையில் கடல்சார் அதிநவீனத் தொழில்நுட்பத்தை பாபா அணு ஆராய்ச்சி மைய விஞ்ஞானிகள் கண்டறிந்துள்ளனர்.

இத்தகவலை இந்திய அணுசக்தி ஆணையத்தின் தலைவர் அனில் ககோட்கர் கல்பாக்கத்தில் ஞாயிற்றுக்கிழமை தெரிவித்தார்.

இந்த திரவ இயக்க அணு உலை தொழில்நுட்பத்தின்படி தயாரிக்கப்பட்ட நமது நீர்மூழ்கிக் கப்பல் மூலம் கடலுக்குள் பதுங்கி இருந்தபடி, நாட்டின் எல்லைப் பகுதிகளில் எதிரிகளின் நடமாட்டத்தை மிக எளிதாகவும், துல்லியமாகவும் கண்காணிக்க முடியும்.

ஆனால், நமது நீர்மூழ்கி கப்பல்கள் பதுங்கியுள்ள இடத்தையும், அவற்றின் நடமாட்டத்தையும் எதிரிகளால் கண்டறிய இயலாது.

இந்திய நிலைகள் மீது பல்வேறு முனைகளில் இருந்து தொடர்ந்து தாக்கும் எதிரியை சுவடு தெரியாமல் அழிக்கும் திறனை, நமது அணுசக்தி நீர் மூழ்கி கப்பல்களுக்கு இத்தொழில்நுட்பம் வழங்கும்.

கால பைரவன்... அரிஹந்த் நீர்மூழ்கி கப்பல்: உள்நாட்டுத் தொழில்நுட்ப அடிப்படையில் இந்தியா முதன்முறையாக அணுமின் சக்தியால் இயங்கும் "அரிஹந்த்' நவீன நீர்மூழ்கிக் கப்பலை வடிவமைத்து சாதனை படைத்துள்ளது.

இதேபோல மேலும் 2 நீர்மூழ்கி கப்பல்கள் இப்போது வடிவமைக்கப்பட்டு வருகிறது.

இதற்கான சிறிய அணு உலைகளை கட்டுவதில் கல்பாக்கம் அணு ஆராய்ச்சி மையம் முக்கிய பங்காற்றியுள்ளது.

இதன்மூலம் அணு உலையாக மட்டுமன்றி ஆராய்ச்சி மையமாகவும் கல்பாக்கம் உருவாகியுள்ளது.

"அரிஹந்த்' நீர்மூழ்கி கப்பல் தொடர்ந்து 6 மாதங்களுக்கு மேல் கடலுக்குள் பதுங்கியிருக்கும் திறன் கொண்டது.

அதி நவீன அணு ஆயுதங்கள், புளூட்டானிய முனையுடன் கூடிய ஏவுகணைகளை துல்லியமாக வீசி எதிரிகளை இந்த நீர்மூழ்கி கப்பல் அழிக்கவல்லது.

இத்தகவலை கல்பாக்கம் இந்திரா காந்தி அணு அராய்ச்சி மைய வட்டாரங்கள் தெரிவித்தன.