தமிழக மீனவர்களை நிர்வாணமாக்கி இலங்கை கடற்படையினர் சித்ரவதை

ராமேஸ்வரம் : மீன்பிடிக்க சென்ற தமிழக மீனவர்களை இலங்கை கடற்படையினர் நடுக்கடலில் தாக்கி, நிர்வாணமாக்கி சித்ரவதை செய்த சம்பவம், ராமேஸ்வரத்தில் பதட்டத்தை ஏற்படுத்தியுள்ளது.


ராமேஸ்வரத்திலிருந்து நேற்று முன்தினம் 400க்கும் மேற்பட்ட படகுகளில் மீனவர்கள் மீன்பிடிக்க சென்றனர். மாலை 4 மணிக்குமேல் இறால் மீன்பிடிக்க கச்சத்தீவு கடல் பகுதிக்குள் செல்ல முயன்ற மீனவர்களை, வழிமறித்த இலங்கை கடற்படையினர் பிளாஸ்டிக் பைப்பினால் தாக்கி விரட்டியுள்ளனர்.மேலும், இரவில் கச்சத்தீவு கடல் பகுதிக்குள் சென்ற படகை நிறுத்தி, அதில் இருந்த இறால் மீன்களை பறித்துக் கொண்டு, மீனவர்களை நிர்வாணப்படுத்தி அடித்து சித்ரவதை செய்துள்ளனர். மீனவர்களின் மொபைல் போன், டார்ச் லைட்டை பறித்துக் கொண்டு, அவர்களை எச்சரித்து விரட்டியுள்ளனர். உயிர் பிழைத் தால் போதும் என மீனவர்கள் கரை திரும்பினர். இதுபோல், 50க்கும் மேற்பட்ட படகில் இருந்த மீனவர்களை தாக்கி இறால் மீன்களை பறித்துசென்ற சம்பவம் நடந்துள் ளது.


இலங்கை கடற்படையினரின் தாக்குதலில் காயமடைந்த மீனவர்கள் குமரய்யா மற்றும் மணி கூறுகையில், "நடுக்கடலில் மீன்பிடித்துக் கொண்டிருந்தபோது 10க்கும் மேற்பட்ட படகில் வந்த இலங்கை கடற்படையினர், படகுகளை வழிமறித்து பிளாஸ்டிக் தடியினால் தாக்கினர். இதில் இடுப்பு, முதுகு பகுதியில் வீக்கம் எற்பட்டுள்ளது. இரண்டு படகுகளை ஒன்றுடன் ஓன்று மோதவிட்டும் மீனவர்களை நிர்வாணப்படுத்தியும் சித்ரவதை செய்தனர். இலங்கை கடற்படையினரின் மனிதாபிமானமற்ற செயல்களால் மீன்பிடி தொழிலை கைவிடும் சூழ்நிலை உருவாகி வருகிறது' என்றனர். "இனிமேல் இலங்கை கடல் பகுதிக்குள் வந்தால் கடும் நடவடிக்கை எடுப்போம்', என இலங்கை கடற்படையினர் எச்சரித்ததாக நேற்று கரை திரும்பிய மீனவர்கள் தெரிவித்தனர். நடுக்கடலில் இலங்கை கடற்படையினர் நடத்திய தாக்குதல் சம்பவம் தொடர்பாக புலனாய்வு மற்றும் மீன்துறை அதிகாரிகள் விசாரித்து வருகின்றனர்.

தமிழ் நாட்டு காரங்க ரொம்ப நல்லவங்க அண்ணா... எவ்வளவு வாங்கினாலும் தாங்கிகிறாங்க...


கொஞ்சம் கூட சூடு சுறணை வேணாமா...?