சவுதி அரேபியாவில் வேலை கிடைக்காமல் சங்கராபுரத்தைச் சேர்ந்த பலர் பட்டினியால் தவிப்பு

சங்கராபுரம்: சங்கராபுரம் பகுதியிலிருந்து வேலை தேடி, சவுதி அரேபியா சென்ற பலர் வேலையின்றி, பட்டினியால் அவதிப்பட்டு வருகின்றனர்.விழுப்புரம் மாவட்டம் சங்கராபுரம் வட்டம், வடகீரனூர் சடையன் மகன் ராமமூர்த்தி(30). இவருக்கு லலிதா என்ற மனைவியும், ஜெயபிரியா என்ற ஒரு மகளும் உள்ளனர்.

கடந்த 2004ல், தோட்ட வேலைக்காக, சவுதி சென்றார். அங்கு சரியாக கூலி வழங்காததால், வேறு ஒரு கட்டுமான கம்பெனியில், ராமமூர்த்தியின் பாஸ்போர்டை வாங்கிக் கொண்டு, வேலை கொடுத்தனர்.இவருடன் சங்கராபுரம் அடுத்த நெடுமானூர் மாணிக்கம் மகன் கிருஷ்ணன், சேஷசமுத்திரம் முனியன் மகன் ஆறுமுகம், கீழப்பட்டை கேசவன் மகன் முருகேசன் உள்ளிட்ட, 100க்கும் மேற்பட்டோர் கட்டுமான கம்பெனியில், கூலி வேலை செய்து வந்தனர்.

ஜூன் மாதம், கட்டுமான கம்பெனி நஷ்டம் அடைந்ததாக கூறி, வேலை பார்த்த கூலி தொழிலாளர்களுக்கு பாஸ்போர்ட், கூலி வழங்காமல் நீக்கப்பட்டனர்; இந்தியா திரும்ப விசாவும் தரவில்லை.இதனால், அவர்கள் அனைவரும் சாலை ஓர பிளாட் பாரங்களில் படுத்தும், கையில் பணம் இல்லாததால், பட்டினி கிடக்கின்றனர்.

சவுதி அரேபியாவில் உள்ள கீழப்பட்டு கிராமத்தைச் சேர்ந்த முருகேசன் தொலைபேசி மூலம் தினமலர் நிருபரிடம் கூறியதாவது:சவுதி அரேபியாவில் சிறந்த நிறுவனத்தில் வேலை வாங்கி தருவதாக, இந்தியர்களை அழைத்து வந்து, கட்டுமான கம்பெனியிலும், ஆடு, ஒட்டகம் மேய்க்கவும் அனுப்புகின்றனர்.

கடந்த சில மாதமாக, இங்குள்ள கம்பெனியினர் செய்த வேலைக்கு கூலி தராமல் இந்தியர்களை வெளியேற்றி வருகின்றனர்; கேட்டால் மிரட்டுகின்றனர். இது பற்றி இந்திய தூதரகத்தில் முறையிட்டும், எவ்வித நடவடிக்கையும் எடுக்கவில்லை.சவுதி அரேபியாவில் வேலையின்றி தவிக்கும் தமிழர்களை, இந்தியா கொண்டுவர, தமிழகம் மற்றும் மத்திய அரசு உடனடி நடவடிக்கை எடுக்க வேண்டும்.இவ்வாறு அவர் கூறினார்.

Yes Its real...