விவேகானந்தர் பாறை நினைவு மண்டபம் - 40ம் ஆண்டு நிறைவு

கன்னியாகுமரி :
உலக சகோதர தின விழாவும், கன்னியாகுமரி கடலில் அமைந்துள்ள சுவாமி விவேகானந்தர் பாறை நினைவு மண்டபத்தை நாட்டிற்கு அர்ப்பணித்த 40 ஆண்டு விழாவும் கன்னியாகுமரியில் நடைபெற்றது.

வீரத்துறவி சுவாமி விவேகானந்தர் அமெரிக்காவின் சிகாகோ நகரில் கடந்த 1893 ம் ஆண்டு செப்டம்பர் மாதம் 11ம் தேதி நடந்த உலக சாதுக்கள் மாநாட்டில் கலந்து கொண்டு பேசினார். அப்போது சகோதர, சகோதரிகளே என்று ஆரம்பித்த தொடக்க உரையின் மூலம் உலகின் அனைவரையும் தன்பால் ஈர்த்தது மட்டுமின்றி இந்தியாவின் அந்தஸ்தையும், அபிமானத்தையும் உலக அரங்கில் உயர்த்தினார். அந்த நாளை நினைவு கூரும் வகையில் ஆண்டுதோறும் உலக சகோதர தின விழாவாக கொண்டாடப்பட்டு வருகிறது.

மேலும் சிகாகோ மாநாட்டில் கலந்து கொள்வதற்கு முன்பு 1892ம் ஆண்டு டிசம்பர் மாதம் 24ம் தேதி கன்னியாகுமரி வந்த விவேகானந்தர் 25 மற்றும் 26, 27 ஆகிய மூன்று நாட்களும், தற்போது நினைவு மண்டபம் அமைந்துள்ள ஸ்ரீ பாதபாறையில் (குமரி அம்மன் தவமிருந்ததாக ஐதீகம்) கடும் தவம் மேற்கொண்டார். தவத்தின் பலனாக புதிய ஞானம் பெற்று "எழுமின் - விழிமின்' என்ற முழுக்கத்தோடு கன்னியாகுமரியிலிருந்து ராமேஷ்வரம் வழியாக கொல்கத்தா சென்றார்.

சுவாமி விவேகானந்தர் தியானம் செய்த இடத்தில் கடந்த 1970ம் ஆண்டு செப்டம்பர் 2ம் தேதி
1 கோடியே 70 லட்சம் ரூபாய் செலவில் ஏக்நாத் ரானடேயின் முயற்சியால் கட்டப்பட்ட நினைவு மண்டபம் திறக்கப்பட்டது. தற்போது கன்னியாகுமரிக்கு வரும் சுற்றுலா பயணிகள் மண்டபத்தை பார்த்து வியக்காதவர்களே இல்லாத அளவுக்கு தினமும் ஆயிரகணக்கான சுற்றுலா பயிணிகள் வந்து செல்கின்றனர்.

-நன்றி தினமலர்