மலேசியா: இசாவை அகற்றும் நோக்கம் கிடையாது என ஓர் அமைச்சர் கூறுகிறார்

உள் நாட்டுப் பாதுகாப்புச் சட்டம் ரத்துச் செய்யப்பட மாட்டாது. அதற்கு பதில் அது திருத்தப்படும் அல்லது நடப்பு சூழலுக்கு ஏற்ப புதிய பெயரைப் பெறுவதற்கும் சாத்தியம் இருப்பதாக தற்காப்பு அமைச்சர் அகமட் ஸாஹிட் ஹமிடி தெரிவித்துள்ளார்.

ஒரு விவகாரம் அல்லது வழக்கு நீதிமன்றத்திற்குக் கொண்டு செல்லப்படுவதற்கு முன்னர் ஒரு நபரை விசாரிப்பதற்கு இசா போன்ற சட்டங்கள் தேவைப்படுவதாக அவர் சொன்னார்.

“நமது நாட்டை மட்டும் பார்க்கக் கூடாது. நமது அண்டை நாடுகளை அல்லது மற்ற நாடுகளையும் பாருங்கள். அவையும் ஏறத்தாழ நம்மைப் போன்ற சட்டங்களை அல்லது அதை விட கடுமையான சட்டங்களை பெற்றுள்ளன.”

“சமயம், இனம், பண்பாடு ஆகியவை தொடர்பாக பிரச்னைகள் ஏதும் தோன்றாமல் இருக்கும் பொருட்டு அரசியல், பொருளாதார நிலைத்தன்மையை உறுதி செய்வது அந்த சட்டத்தின் நோக்கமாகும்.”

மக்கள் தாங்கள் ஏதும் தவறு செய்யவில்லை என்றால் இசா சட்டம் குறித்து அச்சமடையத் தேவையில்லை என்றும் அவர் சொன்னார்.

“1988 ம் ஆண்டு எனது அனுபவத்திலிருந்து நான் பேசுகிறேன். அப்போது நான் இசா சட்டத்தின் கீழ் தடுத்து வைக்கப்பட்டிருந்தாலும் நிலைமயை நான் ஏற்றுக் கொண்டேன்.”

“நான் விசாரிக்கப்பட்ட போது போலீசார் தங்களது கடமையை தொழில் ரீதியாக செய்வதாக நான் கருதினேன்”, என்று அவர் கூறியதாக பெர்னாமா தகவல் வெளியிட்டது.

எதிர்க்கட்சிகள் ஆர்ப்பாட்டம் செய்வதற்கு ஒரு வாய்ப்பை விரும்பியதாக பிரதமர் துறை துணை அமைச்சர் அகமட் மஸ்லான் கூறியதாகவும் பெர்னாமா தகவல் வெளியிட்டுள்ளது.

உள்நாட்டுப் பாதுகாப்புச் சட்டத்தை மறு ஆய்வு செய்வதாக பிரதமர் நஜிப் அப்துல் ரசாக் வாக்குறுதி அளித்திருப்பதும் அவற்றுக்கு தெரியும் என்று அவர் சொன்னார்.

.”உண்மையில் அவை யோசனைகள் ஏதும் தெரிவிக்க விரும்பினால் தங்களது கருத்துக்களை புள்ளிவரங்களுடன் விவேகமாக எழுத்துப்பூர்வமாக தெரிவித்திருக்க வேண்டும்.

சாலைகளில் போக்குவரத்து நெரிசல் ஏற்படும் அளவுக்கு அவை பொது மக்களுக்கு சிரமத்தை ஏற்படுத்தியிருக்கக் கூடாது”, என்றார் அவர்