தி.மு.க.,விடமிருந்து மக்களை மீட்பதே தேமுதிகவின் புனிதப் பணி: விஜயகாந்த்

சென்னை, செப்.11- தி.மு.க.,விடமிருந்து மக்களை மீட்பதே தேமுதிகவின் புனிதப் பணி என்று அக்கட்சியின் தலைவர் விஜயகாந்த் தெரிவித்துள்ளார். தேமுதிகவின் 6வது ஆண்டு துவக்க விழா வரும் 14-ம் தேதி நடைபெறுகிறது. இதையொட்டி, அவர் வெளியிட்டுள்ள ஓர் அறிக்கையில் இதைத் தெரிவித்துள்ளார்.

அந்த அறிக்கையில் அவர் மேலும் கூறியிருப்பதாவது:

தேசிய முற்போக்கு திராவிட கழகம் ஆறாவது ஆண்டில் அடியெடுத்து வைக்கும் நாள் செப்டம்பர் 14. இந்த ஐந்து ஆண்டுகளில் தமிழ்நாட்டு மக்களின் இதயங்களில் முத்திரைப் பதித்துள்ள கட்சியாக தேமுதிக வளர்ந்துள்ளது.

எத்தனையோ இன்னல்களுக்கு இடையிலும் கழகத்தைக் கண்கள் போல் காப்பாற்றி வளர்த்த பெருமை லட்சோப லட்சம் கழகத் தொண்டர்களுக்கும், அவர்களை வழி நடத்திச் செல்லும் ஆயிரக்கணக்கான நிர்வாகிகளுக்கும் உண்டு. அவர்களுடைய உழைப்பையும், தியாகத்தையும் எவ்வளவு போற்றினாலும் தகும்.

தமிழ்நாட்டில் அரசியலில் தனக்கென ஒரு தனித் தன்மையோடு வளர்ந்து வருவது தே.மு.தி.க.. முதலில் மக்களின் நன்மதிப்பைப் பெற்று பின்னர் அரசியல் கட்சியாக உருவானது.

கட்சி துவங்கி சில மாதங்களிலேயே சட்டமன்றத் தேர்தல்களில் அனைத்து தொகுதிகளிலும் போட்டியிட்டது மட்டுமல்ல, 8.5 சதவிகிதம் வாக்குகளைப் பெற்றது. பிறகு நடைபெற்ற நாடாளுமன்றத் தேர்தலிலும் 11 சதவிகிதம் வாக்குகளைப் பெற்றது. தனித்து போட்டியிட்டும் தமிழ்நாட்டு மக்கள் தொடர்ந்து ஆதரிக்கிறார்கள் என்றால், அதற்குக் காரணம் நாம் அரசியல் கட்சியை நடத்தி வரும் நடைமுறைதான்.

பொதுமக்களுக்கு இடையூறு விளைவிக்கும் வகையில் எந்தப் போராட்டத்தையும் நடத்தியதில்லை. அதே போல வணிகர்களையோ, வசதி படைத்தவர்களையோ, அரசு அலுவலர்களையோ உருட்டி, மிரட்டி கட்சி வளர்ச்சிக்கென நிதி திரட்டியதில்லை. மக்கள் நலப் பணிகளும் நம்முடைய சொந்த செலவிலேயே நடைபெறுகின்றன. இவ்வாறு நம்மை நாமே வருத்திக் கொண்டு அரசியலில் ஒரு புதிய பண்பாட்டை நிலை நிறுத்தி வருகிறோம்.

வரும் சட்டமன்றத் தேர்தலில், எக்காரணத்தைக் கொண்டும் இன்றைய தி.மு.க ஆட்சியை மீண்டும் வராமல் அதனை தோற்கடித்து, தமிழ்நாட்டு மக்களை மீட்பதே நம்முடைய புனிதப் பணி. இந்த தேர்தலில் தேசிய முற்போக்கு திராவிட கழகத்தை வெற்றி பெறச் செய்வது நம்முடைய கடமையாகும். அந்த அர்ப்பணிப்பு உணர்வோடு தே.மு.தி.கவின் ஆறாவது ஆண்டு துவக்க விழாவை கொண்டாடுமாறு கேட்டுக் கொள்ளுகிறேன்.

இவ்வாறு விஜயகாந்த் தனது அறிக்கையில் தெரிவித்துள்ளார்.