மங்களூர் விமான விபத்துக்கு, விமான தலைமை விமானி தூங்கியதே காரணம்

மங்களூர் விமான விபத்துக்கு, விமான தலைமை விமானி தூங்கியதே காரணம் என கருப்பு பெட்டி மூலம் கண்டுபிடிக்கப்பட்டுள்ளது. கடந்த மே 22ம் திகதி துபாயில் இருந்து மங்களூர் வந்த ஏர் இந்தியா விமானம், தரையிறங்கும் போது திடீரென விபத்துக்குள்ளானது. அதில் பயணித்த 158 பயணிகளும் இதில் பலியாகினர். 8 பேர் உயிர் தப்பினர். முற்றாக எரிந்து போன விமான பாகங்களில் இருந்து நீண்ட நாட்களின் பின்னர் கருப்பு பெட்டி கண்டு பிடிக்கப்பட்டது.


கருப்பு பெட்டியில் பதிவான விவரங்களை வைத்து அமெரிக்கா ஆராய்ச்சியில் ஈடுபட்டது. இதனை தொடர்ந்து வெளியிட்ட அறிக்கையில், துபாயில் இருந்து விமானம் புறப்பட்ட சிறிது நேரத்தில் தலைமை விமானி ஸ்லாகோ கேலோசிகா தூங்கியிருப்பதாக அமெரிக்கா தெரிவித்துள்ளது.

இதற்கு ஆதாரமாக, அவருடைய குரட்டை சத்தம் கருப்பு பெட்டியில் பதிவாகியுள்ளதாகவும், அவருக்கு பதில் துணை விமானியே விமானத்தை ஓட்டியதாகவும் அதில் தெரிவிக்கப்பட்டுள்ளது.

ஸ்லாகோ 1.30 மணி நேரம் தூங்கியுள்ளார். விமானம் தரையிறங்கும் போது, 2000 அடி உயரத்தில் வைத்தே விமானி தன் கட்டுப்பாட்டுக்குள் விமானத்தை கொண்டு வர வேண்டும். சுமார் 1000 அடி உயரத்தில் இருக்கும் போது ஓடு பாதை அவருக்கு தெரியும்.

ஆனால், இந்த விமானம் அப்படி தரையிறக்கப்படவில்லை. 400 அடி உயரத்தில் இருந்த போது தான் விமானத்தை தரையிறக்க விமானி முயற்சித்துள்ளார். அந்த நேரத்தில் விமானத்தில் உள்ள கியர் பாக்ஸ் செயலற்று விட்டது. இதை விமான கருவிகள் எச்சரிக்கை செய்துள்ளன. அது மட்டுமின்றி விமான நிலையத்தில் இருந்து கண்காணிப்பாளர்களும் எச்சரிக்கை விடுத்துள்ளனர். ஆனால் அதை கண்டுகொள்ளாமல் விமானி நல்ல தூக்கத்தில் இருந்துள்ளார். இவ்விபத்துக்கு முழு காரணமும் தலைமை விமானியையே சேரும். இவ்வாறு இவ் அறிக்கையில் கூறப்பட்டுள்ளது.

தேங்க்ஸ் -தமில்மீடியா

ஒருவரின் தூக்கம் எவ்வளவு மக்களை பலி கொண்டிருக்கின்றது .........