ஆட்டோ டிரைவருடன் வெள்ளை எலி

தூத்துக்குடியில் ஆட்டோ டிரைவருடன் வெள்ளை எலி ஒன்று இரவில் வலம் வருவது பெரும் பரபரப்பை ஏற்படுத்தியுள்ளது.

தூத்துக்குடி வள்ளிநாயகபுரத்தைச் சேர்ந்தவர் முனீஸ்வரன் (52). இவர் கடந்த 30ஆண்டுகளாக ஆட்டோ டிரைவராக இருந்துவருகிறார். செல்லப்பிராணிகளை வளர்ப்பதில் அதிக ஆர்வம் உள்ளவர். ஆனால், வீட்டில் வளர்ப்பது சாத்தியமல்ல. குடும்பத்தினரும் எதிர்ப்புத் தெரிவித்துள்ளனர்.

இதனால், தனது ஆட்டோவிலேயே எலி ஒன்றை வளர்த்து வருகிறார். இந்த வெள்ளை எலிக்கு கணேஷ் என்று பெயரிட்டுள்ளார். மிகவும் சுடடியான இந்த கணேஷ், முனீஸ்வரனுடன் தினந்தோறும் ஆட்டோவில் பயணம் செய்கிறது. பகலில் ஆட்டோவில் உள்ள டேஸ் போர்டில் அதற்கென விரிக்கப்பட்ட படுக்கையில் தூங்கும். இரவு நேரங்களில் விழித்திருக்கும்.

தினமும் காலையில் முனீஸ்வரன் டீகுடிக்கும் போது கணேஷ்க்கும் டீவைத்துவிட வேண்டும். அதற்கு அடுத்ததாக ஹார்லிக்ஸ் கலந்த பாலில் ரொட்டி அதற்கு காலை டிபன். மதிய உணவாக பாசிப்பயிறு, நெல், புல், கோதுமை ஆகியவைகளை நனைத்து கொடுக்க வேண்டும். இரவு நேரங்களில் அதிக இனிப்பு கொண்ட பால்கோவா, ஐஸ்கிரீம் சாப்பிட்டுவிட்டு தனது வேலைகளை காட்டத் துவங்கிவிடுவார்.

மேலும், முனீஸ்வரன் சவாரிக்காக செல்லும் வீடு, நிறுவனங்களில் காத்திருக்கும் வேளையில், கணேஷ் அங்கும் இங்கும் சென்று தனது சுட்டி வேலைகளை காட்டுகிறது. பிறருக்கு தொந்தரவு கொடுக்காத இந்த எலி கணேஷ் முனீஸ்வரனின் ரெகுலர் கஸ்டமர்களை மிகவும் கவர்ந்துள்ளது.

சாதாரணமாக செல்லப் பிராணிகளாக நாய், பூனை, ஆடு என வளர்ப்பவர்கள் மத்தியில் செல்லப்பிராணியாக வெள்ளை எலியை வளர்க்கும் முனீஸ்வரன தூத்துக்குடி மக்களிடையே பரபரப்பாக பேசப்படுகிறார்