மன்மதன் அம்பு'க்கு கமல் தூது

கார்த்திக் · கார்த்திக் Thu 9 Sep 2010 - 15:43

உதய நிதியின் 'ரெட் ஜெயின்' படநிறுவனத்தின் சார்பாக... இயக்குனர் கே.எஸ். ரவிக்குமாரின் கண்காணிப்பில் உலகநாயகனுடன் "மன்மதன் அம்பு" விடுபவர்கள் மாதவன், திரிஷா, சங்கீதா மற்றும் பலர்.

‘தசாவதாரம்’ படத்திற்கு பின் உலக நாயகன் கமலஹாசனும், இயக்குனர் கே.எஸ். ரவிக்குமாரும் இணைந்துள்ள “மன்மதன் அம்பு” படம் தொடங்குவதற்கு முன்பிருந்தே பல சுவாரசியங்களை உருவாக்கி கொண்டேதான் வருகிறது.

படத்திற்கு தலைப்பினை வைக்கும் போதே இந்தச் சுவாரசியம் தொடங்கியது...

படத்துக்கு என்ன பேர் வைப்பது என்று யோசித்தப் பொழுது... தனது நூறாவது படமான ராஜபார்வையில் இடம் பெற்ற “அந்தி மழை பொழிகிறது” என்னும் பாடலின் சரணத்தில் வரும் ‘மன்மதன் அம்புகள் தைத்த இடங்களில் சந்தனமாய் எனை பூசுகிறேன்’ என்னும் வரியிலிருந்து கமலஹாசன் தேர்ந்தெடுத்ததுதான் இந்த “மன்மதன் அம்பு”.

தனது ஒவ்வொரு படத்திற்கும் தனியாக ஒத்திகை பயிற்சியில் ஈடுபடுவதை வழக்கமாகக் கொண்ட உலகநாயகன், முதன்முறையாக ‘மன்மதன் அம்பு’ படத்திற்கான நடிப்பு ஒத்திகைகளை ஆழ்வார்பேட்டையில் உள்ள தனது இல்லத்தில் சக நடிகர்களுடன் தொடங்கினார்.

இந்திப் படங்களில் நடித்து வந்த போதும், மாதவன் மற்றும் திரிஷா மும்பையிலிருந்து வந்து இதில் தவறாமல் கலந்துகொண்டனர்.

இந்த ஒத்திகை இரண்டு மாதகாலமாக நடைபெற்றது. அதன் பிறகே படப்பிடிப்புப் பணிகள் தொடங்கின. எந்தப் படத்திற்கும் இல்லாத சிறப்பு இது.

மேலும், இதுவரை தனக்கு வந்த படவாய்ப்புகளை எல்லாம் மறுத்து வந்த திரிஷாவின் அம்மா ‘உமா கிருஷ்ணன்’ முதன் முறையாக இதில் முக்கிய வேடத்தில் நடிக்கிறார்.

இப்படியாக இன்னும் பல சிறப்புகளை கடந்து வளர்ந்துவரும் “மன்மதன் அம்பு”படத்தின் முக்கியமான காட்சிகளுக்கான படப்பிடிப்பு ஐரோப்பிய நாடுகளில் நடந்து முடிந்துள்ளது.

தற்போது இதன் அடுத்தக்கட்ட படப்பிடிப்புக்கான இடம் தேடப்பட்டுவருகிறதாம்.

இந்நிலையில், ‘‘ஊலலலா” படத்தின் இசை வெளியீட்டுக்கு வந்த இயக்குனர் கே.எஸ்.ரவிக்குமார், மன்மதன் அம்பு படத்திற்கான பாடல் ‘கம்போசிங்’ நடைபெற்று வருவதாகவும் அதற்கு உடனே செல்லவேண்டும் என்றும் விரைந்துள்ளார்.

தசாவதாரம்’ படத்திற்கு பின்னணி இசை மட்டுமே அமைத்த தேவிஸ்ரீபிரசாத் இசையில் பாடல்கள் வேகமாக உருவாகிவருகிறது.

இசை வெளியீட்டை முன்கூட்டியே நடத்த உள்ளனராம். எனவே, விரைவில் ‘மன்மதன் அம்பு’ பாடல்கள் நமது உள்ளங்களை தைக்கவருகிறது.

நடந்து முடிந்த காட்சிகளின் படி... சற்றுமுன் கிடைத்த தகவல்...

படத்தில் மாதவன் பெயர் மதன். மாதவன் விடும் மன்மதன் அம்புக்காக திரிஷாவிடம் தூது செல்கிறாராம் உலக நாயகன். இதை பார்த்து, கமலஹாசன்தான் திரிஷாவுக்கு அம்பு விட்டாரோ என்று தவறாக நினைக்கிறாராம் சங்கீதா.

அது அப்படி அல்ல, அவர் எனக்காக தூதுதான் போனார் என்று சங்கீதாவிடம் விளக்குகிறாராம் மாதவன்

அப்படின்னா... கமலுக்கு ஜோடி திரிஷா இல்லையா... (உஷ்ஷ்ஷ்... படம் முடியும் வரை பொறுத்திருக்கவும்)

அம்பு யாருவிட்டாலும் சரி... அங்கு மன்மதன் கமல்தான்...