திரைப்பட நடிகர் முரளி இன்று காலை மாரடைப்பால் காலமானார்

by கார்த்திக் Wed Sep 08, 2010 9:21 am

First topic message reminder :

சென்னை, செப்.8: பிரபல திரைப்பட நடிகர் முரளி, இன்று காலை மாரடைப்பால் காலமானார்.

நடிகர் முரளிக்கு நெஞ்சுவலி ஏற்பட்டதால், உடனடியாக அவர் சென்னை தனியார் மருத்துவமனையில் அனுமதிக்கப் பட்டிருந்தார். இன்று காலையில், சிகிச்சை பலன் இன்றி அவருடைய உயிர் பிரிந்தது.

தமிழ்த் திரையுலகில் 1984இல் பூவிலங்கு படத்தின் மூலம் அறிமுகமானார். புதுவசந்தம், இதயம் ஆகிய படங்கள் அவருக்கு ரசிகர்களிடையே நல்ல பெயரைப் பெற்றுத் தந்தது.

இரண்டு நாள்களுக்கு முன்னர்தான் அவர் தன்னுடைய 100 ஆவது படத்துக்கான ஒப்பந்தத்தில் கையெழுத்து இட்டிருந்தார் என்பது குறிப்பிடத்தக்கது.

புதுவசந்தம், , இதயம், தங்க மனசுக்காரன், சின்னப் பசங்க நாங்க, பூமணி, காலமெல்லாம் காதல் வாழ்க, பொற்காலம், காதலே நிம்மதி, கனவே கலையாதே, இரணியன், அள்ளித் தந்த வானம், சுந்தரா டிராவல்ஸ், நம்ம வீட்டு கல்யாணம், காதலுடன், பாசக்கிளிகள் உள்ளிட்ட படங்கள் அவர் நடித்த படங்களில் குறிப்பிடத்தகுந்தவை.

சிவாஜி, விஜயகாந்த், பிரபு, சத்யராஜ், பிரபுதேவா, சூர்யா, பார்த்திபன், சரத்குமார் உள்ளிட்ட பல நடிகர்களுடன் முரளி இணைந்து நடித்துள்ளார்.

தினமணி

by **பிளேடு பக்கிரி** Wed Sep 08, 2010 12:35 pm

by sathikdm Thu Sep 09, 2010 12:46 pm

திரைப்பட நடிகர் முரளி இன்று காலை மாரடைப்பால் காலமானார் - Page 2 Murali

சென்னை, செப். 8: நடிகர் முரளி (46) சென்னையில் புதன்கிழமை மாரடைப்பால் காலமானார்.

1984-ல் "பூ விலங்கு' என்ற படத்தின் அறிமுகமானவர் நடிகர் முரளி. தொடர்ந்து "பகல் நிலவு', "இதயம்', "அதர்மம்' உள்ளிட்ட பல படங்களில் நடித்திருக்கிறார்.

செவ்வாய்க்கிழமை மாலை முதலே முரளிக்கு லேசாக நெஞ்சு வலி இருந்துள்ளது. புதன்கிழமை அதிகாலை நெஞ்சுவலி அதிகமாக இருந்ததால், சென்னை போரூரில் உள்ள தனியார் மருத்துவமனையில் அனுமதிக்கப்பட்டார். மருத்துவர்கள் முதல் உதவி செய்வதற்கு முன்பாகவே அவர் உயிர் பிரிந்தது.

இதையடுத்து அவரது உடல் சென்னை வளசரவாக்கத்தில் உள்ள அவரது வீட்டில் பொதுமக்கள் மற்றும் ரசிகர்களின் அஞ்சலிக்காக வைக்கப்பட்டது. நடிகர்கள் ரஜினிகாந்த், சரத்குமார், கார்த்தி, பார்த்திபன்,அர்ஜுன், மோகன், ராதா, ராதிகா, சினேகா, தயாரிப்பாளர் சங்கத் தலைவர் இராம.நாரயணன், இயக்குநர்கள் பாரதிராஜா, சேரன், விக்ரமன் உள்ளிட்ட திரையுலகினர் முரளியின் உடலுக்கு அஞ்சலி செலுத்தினார்கள்.

"பூவிலங்கு' முதல் "பாணா காத்தாடி' வரை: கர்நாடகத்தைச் சேர்ந்த முரளி 1984-ம் ஆண்டு வெளியான "பூ விலங்கு' படத்தின் மூலம் அறிமுகமானார். பாரதிராஜாவின் இயக்கத்தில் வெளியான "கடல் பூக்கள்' படத்துக்காக 2000-ம் ஆண்டின் சிறந்த நடிகருக்கான தமிழக அரசு விருதை முரளி பெற்றுள்ளார்.

சிவாஜி, விஜயகாந்த், பிரபு, சத்யராஜ், பிரபுதேவா, பார்த்திபன், சரத்குமார் உள்ளிட்ட நடிகர்களுடன் இணைந்து நடித்துள்ளார். அவர் கடைசியாக நடித்த படம் "பாணா காத்தாடி'. அவருடைய மூத்த மகன் அதர்வா நாயகனாக அறிமுகமான இப்படம் கடந்த மாதம் வெளியாகியது. இது முரளியின் 99 படம். முரளியை நாயகனாக அறிமுகப்படுத்திய சத்யஜோதி பிலிம்ஸ் நிறுவனம் இந்தப் படத்தை தயாரித்திருந்தது. பெரும்பாலான படங்களில் கல்லூரி மாணவராக நடித்த முரளி இந்தப் படத்திலும் எம்.பி.பி.எஸ். நான்காம் ஆண்டு மாணவராக ஒரு காட்சியில் நடித்திருந்தார்.

விடியல் காரணம்: முரளியின் 100-வது படத்தை இயக்குநர் அகத்தியனின் மாணவர் வசீகரன் இயக்குவதாக இருந்தது. நிதீஷ் பிக்சர்ஸ் என்ற புதிய நிறுவனம் இந்தப் படத்தைத் தயாரிப்பதாக இருந்தது. விறுவிறுப்பான ஆக்ஷன் கதையமைப்பில் உருவாக்கம் பெற்றிருந்த இப்படத்துக்கு "விடியல் காரணம்' எனப் பெயரிடப்பட்டிருந்தது. வரும் 11 அல்லது 15 தேதிகளில் முதல் கட்ட படப்பிடிப்பைத் தொடங்க திட்டமிட்டிருந்தார்கள்.

கன்னட சினிமாவின் புகழ் பெற்ற இயக்குநர் சித்த லிங்கய்யா என்பவரின் மகன்தான் முரளி. மறைந்த முரளிக்கு மனைவி ஷோபா, மகன்கள் அதர்வா,ஆகாஷ் மகள் காவ்யா உள்ளனர். மருத்துவப்படிப்பை முடித்துள்ள மகள் காவ்யாவிற்கு கடந்த வாரம்தான் திருமண நிச்சயதார்த்தம் நடந்துள்ளது.

இன்று படப்பிடிப்பு ரத்து: நடிகர் முரளியின் உடல் வியாழக்கிழமை காலை 10.30 மணிக்கு சென்னை வளசரவாக்கத்தில் உள்ள அவரது வீட்டில் இருந்து ஊர்வலமாக எடுத்துச் செல்லப்படுகிறது. இறுதிச் சடங்குகள் பெசன்ட் நகர் மின் மயானத்தில் நடைபெறுகிறது.

முரளிக்கு அஞ்சலி செலுத்தும் வகையில் வியாழக்கிழமை படப்பிடிப்புகள் ரத்து செய்யப்படுகின்றன. நடிகர் சங்கம், தயாரிப்பாளர் சங்கம், பெப்ஸி உள்ளிட்ட தமிழ்த் திரையுலக அமைப்புகள் முரளியின் மரணத்துக்கு இரங்கல் தெரிவித்துள்ளன.

நன்றி,
தினமணி திரைப்பட நடிகர் முரளி இன்று காலை மாரடைப்பால் காலமானார் - Page 2 Murali

by மஞ்சுபாஷிணி Thu Sep 09, 2010 1:00 pm

அமைதியான குணமும் கிசுகிசுவில் மாட்டாது எல்லோரிடமும் நல்ல பெயருடன் வலம் வந்த அருமையான மனிதர் முரளி..... உயிர் போகும் வயதில்லை இது.... மனம் வேதனை அடைகிறது இதை அறிந்தது முதல்......

அன்னாருக்கு என் அஞ்சலிகள்.....