சொல்கிறார்கள்

போட்டிக்கு முன் 15 நிமிடம் தியானம் : சர்வதேச, "செஸ்' போட்டிகளில் சாம்பியன் பட்டம் வென்ற 13 வயது, சதுரங்க ராணி ஸ்ரீஜா: நான் இரண்டாம் வகுப்பு படித்தபோது, என்னை செஸ் கிளப்பிற்கு அப்பா அழைத்துப் போனார். செஸ் விளையாட்டின் நுணுக்கங்களை, பயிற்சியாளர் பாபநாசம் கற்றுத் தந்தார்.மயிலாடுதுறை, கோவையில் நடந்த மாவட்ட அளவிலான செஸ் போட்டிகளில் முதல் இடத்தைப் பெற்றேன். அதன்பின் தொடர்ந்து சர்வதேச அளவிலான போட்டிகளில் பங்கேற்கும் அளவுக்கு முன்னேறியுள்ளேன். சர்வதேச அளவில் செஸ் போட்டியில் விளையாடும்போது, வெற்றி, தோல்வி பெறும் போட்டிகளைக் கணக்கிட்டு ரேட்டிங் செய்வர். இதில், குறைந்தபட்ச ரேட்டிங், 1,100 ஆகும். நான் 1,811 ரேட்டிங்கில் உள்ளேன். நாம் விளையாடுவதைப் பொறுத்து ரேட்டிங் மாறிக்கொண்டே இருக்கும்.சீனாவில் நடந்த 14 வயதுக்குட்பட்டோருக்கான போட்டியில், 14 நாடுகளைச் சேர்ந்த 27 போட்டியாளர்கள் கலந்து கொண்டனர். அதில் ஏழு புள்ளிகள் பெற்று முதலிடத்தைப் பெற்று, இந்த ஆண்டுக்கான ஆசிய சாம்பியன் பட்டத்தை வென்றேன்.சர்வதேச அளவிலான போட்டிகளில் பங்கேற்க ஆகும் செலவுகளை இந்திய அரசு ஏற்றுக் கொள்கிறது. மாநில அளவிலான போட்டிகளில் பங்கேற்க, தமிழ்நாடு செஸ் அசோசியேஷன் செலவுகளை ஏறறுக் கொள்கிறது. என்.எல்.சி., நிறுவனமும் உதவிகளைச் செய்து தருகிறது.ஒவ்வொரு போட்டி ஆரம்பிக்கும் முன்னர், கவனம் சிதறாமல் இருக்க, 15 நிமிடம் தியானம் செய்வேன். தினமும் யோகா செய்கிறேன். தினமும் நான்கு மணி நேரம் பயிற்சி எடுக்கிறேன்.இந்த ஆண்டு அக்டோபர் 4ம் தேதி, கிரீஸ் நாட்டில் நடக்கும் உலக அளவிலான செஸ் போட்டியில், 14 வயதுக்குட்பட்டோருக்கான பிரிவில் பங்கேற்கிறேன்; அதிலும், வெற்றி பெறுவேன்.
nandri ; dinamalar....