பண்ணை விவசாயி இனி பட்டதாரி அடுத்த மாதம் புதுதிட்டம் அறிமுகம்

நாகர்கோவில்: பண்ணை விவசாயிகளையும் பட்டதாரி ஆக்கும் திட்டம் வரும் 1ம்
தேதி முதல் தமிழகத்தில் அறிமுகம் செய்யப்படுகிறது. இதன் மூலம் பல லட்சம்
பண்ணை விவசாயிகள் பயன் பெறுவார்கள். விவசாயிகளுக்கு தொழில்நுட்ப கல்வியை
ஊட்டுவதில் தமிழ்நாடு வேளாண் பல்கலைக் கழகம் முன்னிலை வகித்து வருகிறது.
2005ம் ஆண்டு முதல் தொலைதூர கல்வி இயக்கம் மூலம் விவசாயிகளுக்கு இந்த
பல்கலைக் கழகம் தொழில்நுட்ப கல்வி வழங்கி வருகிறது. தற்போது இந்த பல்கலைக்
கழகத்தின் கீழ் 10 கல்லூரிகள், 36 ஆராய்ச்சி நிலையங்கள், 14 வேளாண்மை
அறிவியல் நிலையங்கள் செயல்பட்டு வருகின்றன. புதிய நெல்ரகங்களை அறிமுகம்
செய்து உற்பத்தியை பெருக்கும் வகையில் புதிய நெல்ரகங்கள்
கண்டுபிடிக்கப்பட்டு வருகின்றன. டி.ஆர்.3, அண்ணா -4 ஆகிய புதிய ரகங்கள்
அறிமுகம் செய்யப்பட்டுள்ளன. எக்டேருக்கு ஐந்து டன் நெல் உற்பத்தி செய்யும்
புதிய நெல் ரகத்தை கண்டு பிடிக்கும் பணியில் வேளாண் பல்கலைக் கழகம்
ஈடுபட்டுள்ளது. இந்த ரக நெல் கண்டுபிடிக்கும் போது செம்மை நெல்
சாகுபடியில் புதிய தொழில்நுட்பங்களை பயன்படுத்தினால் நெல் உற்பத்தி மேலும்
அதிகரிக்கும் என்று எதிர்பார்க்கப்படுகிறது. தமிழகத்தில், 80 லட்சம் பண்ணை
விவசாயிகள் உள்ளதாக கணக்கிடப்பட்டுள்ளது. தற்போது விவசாயிகளின்
கல்வித்தரத்தை மேம்படுத்தும் பணியில் இந்த பல்கலைக்கழகம் ஈடுபட்டுள்ளது.
இதன் ஒரு கட்டமாக, "உழவர்களுக்கான பண்ணை தொழில்நுட்பம்' என்ற பட்டப்
படிப்பை வேளாண் பல்கலைக் கழகம் அறிமுகம் செய்ய உள்ளது. 10ம் வகுப்பு
தேர்ச்சி பெற்ற 30 வயது நிரம்பிய பண்ணை விவசாயிகள் இந்த படிப்பில்
சேர்ந்து பட்டம் பெறலாம். இந்த திட்டம் அக்டோபர் 1ம் தேதி முதல்
தொடங்கப்படுகிறது. இந்த திட்டம் மூலம் விவசாயிகள் பட்டதாரி ஆக முடியும்
என்ற நிலை ஏற்பட்டுள்ளது. மேலும் ஒரு வருட பட்டயப்படிப்பும் தொடங்க
ஆலோசிக்கப்பட்டு வருகிறது.