காதலியை கர்ப்பமாக்கி தலைமறைவு காதலனின் குடும்பத்தினர் கைது

டயானா · டயானா Mon Sep 06, 2010 8:40 am

ஆலங்குடி: ஆலங்குடி அருகே பெண்ணை காதலித்து, கர்ப்பிணியாக்கி திருமணம்
செய்ய மறுத்து, தப்பியோடிய காதலனை போலீசார் தேடிவருகின்றனர். காதலனின்
தந்தை உட்பட குடும்பத்தைச் சேர்ந்த மூன்று பேர் கைது செய்யப்பட்டனர்.
புதுக்கோட்டை மாவட்டம் ஆலங்குடி அருகே ராங்கியன் விடுதியைச் சேர்ந்த
செல்வம் மகன் அறிவழகன் (24). அவர் டிராவல்ஸ் மூலம் சிங்கப்பூருக்கு
அடிக்கடி சென்று வருவார். அதே பகுதியைச் சேர்ந்த முத்துவீரன் மகள் தமிழழகி
(22). இவரது பெற்றோர் சில ஆண்டுக்கு முன் இறந்ததால், அதே பகுதியில் உள்ள
உறவினர் வீட்டில் வசித்து வருகிறார். ஒரே பகுதியைச் சேர்ந்த அறிவழகன்,
தமிழழகி இருவரும் காதலித்து வந்தனர். இருவரும் பழகியதில், தமிழழகி
கர்ப்பமானார். தன்னை திருமணம் செய்ய அறிவழகனிடம் வற்புறுத்திய போது,
"நான்கு மாத கருவை கலைத்து விட்டு வா, திருமணம் செய்து கொள்கிறேன்' என
கூறியுள்ளார். அதை நம்பி தமிழழகி, நான்கு மாத கருவை கலைத்துள்ளார். ஆனால்,
திருமணம் செய்ய அறிவழகன் மறுத்துள்ளார். மனமுடைந்த தமிழழகி சில
நாட்களுக்கு முன் விஷம் குடித்து தற்கொலைக்கு முயன்றார். அப்போது
உறவினர்கள் காப்பாற்றினர். இது குறித்து தமிழழகி ஆலங்குடி அனைத்து மகளிர்
போலீசில் புகார் அளித்தார். இன்ஸ்பெக்டர் பாலமுருகன், ஆலங்குடி தாசில்தார்
மற்றும் வருவாய் அதிகாரிகள் நான்கு மாத கருவை கலைத்து, புதைத்தாக கூறிய
இடத்துக்கு மருத்துவக் குழுவினருடன் சென்று ஆய்வு செய்தனர். அறிவழகனை கைது
செய்ய சென்றபோது அவர் தப்பியோடினார். அவரது தந்தை செல்வம், அண்ணன்
கவியரசன், அண்ணி முத்துலட்சுமி ஆகியோரை போலீசார் கைது செய்து, ஆலங்குடி
குற்றவியல் நீதிமன்றத்தில் ஆஜர்படுத்தினர்.