ராஜராஜன் சிலையை மீட்க குஜராத் செல்கிறது தமிழக குழு

சென்னை ; தஞ்சையை ஆண்ட சோழப் பேரரசன் ராஜராஜனின் வெண்கல சிலையை மீட்க,
குஜராத்தில் உள்ள தனியார் மியூசிய நிர்வாகத்தினரிடம் பேச்சு வார்த்தை
நடத்த தமிழக அரசின் குழு செல்கிறது.
தஞ்சையை ஆண்ட ராஜராஜ சோழனின் ஆயிரமாம் ஆண்டு விழா, அரசு சார்பில்
கொண்டாடப்படுகிறது. இந்நிலையில், ஆயிரம் ஆண்டுகளுக்கு முன் தஞ்சை பெரிய
கோவிலில் வைத்து வழிபாடு நடத்தப்பட்டதாக கருதப்படும் ராஜராஜ சோழனின் சிலை,
குஜராத் மாநிலம் ஆமதாபாத் நகரில் உள்ள, "காலிக்கோ' மியூசியத்தில் வைத்து
பராமரிக்கப்பட்டு வருகிறது. இந்த மியூசியத்தை சாராபாய் பவுண்டேஷன் என்ற
அமைப்பு நடத்தி வருகிறது. இச்சிலையை மீட்க வேண்டும் என இரண்டு
ஆண்டுகளுக்கு முன்னரே முயற்சி மேற்கொள்ளப்பட்டது. அப்போது தொல்லியல்
துறையினர், வரலாற்று ஆர்வலர்கள், பொதுமக்கள் என 10 ஆயிரம் பேர்
கையெழுத்திட்ட கோரிக்கை மனு ஒன்று, ஆமதாபாத் மியூசியத்தினரிடம்
வழங்கப்பட்டது. மேலும், ராஜராஜன் சிலையை அன்பளிப்பாக வழங்க வேண்டும் என,
தமிழக முதல்வர் கருணாநிதி, குஜராத் அரசிடம் கோரிக்கை விடுத்ததாகவும்
தெரிகிறது. இவை பயனற்றுப்போன நிலையில், சிலையை மீட்க சட்டப்பூர்வமான
வழிமுறைகளை கையாள தமிழக அரசு முடிவு செய்துள்ளதாகத் தெரிகிறது.
அதற்கு
முன்னதாக, கடைசி முயற்சியாக தமிழக அரசு சார்பில், அமைச்சர் தங்கம்
தென்னரசு தலைமையில், சுற்றுலாத் துறை செயலர் இறையன்பு, தொல்லியல் நிபுணர்
நாகசாமி, வரலாற்று ஆய்வாளர் குடவாயில் பாலசுப்ரமணியன் ஆகியோர் கொண்ட குழு
குஜராத் செல்கிறது.
இக்குழுவினர், வரலாற்று ஆவணங்களை சான்றாகக் காட்டியும், ராஜராஜனின்
சிலைக்கு உள்ள முக்கியத்துவத்தை எடுத்துக் கூறியும், அதை தமிழக அரசிற்கு
அன்பளிப்பாக தரும்படி கோரிக்கை விடுக்க உள்ளனர்.
இக்குழுவின் முயற்சி
வெற்றி பெற்றால், ராஜராஜ சோழனின் ஆயிரமாம் ஆண்டு விழாவில், பழமையான ராஜராஜ
சோழனின் வெண்கலச் சிலை இடம் பிடிக்க வாய்ப்பு ஏற்படும்.சிலை உருவான வரலாறு
ராஜராஜ
சோழன் தனது ஆட்சிக் காலத்தில், தனது ஆளுகைக்கு உட்பட்ட பகுதிகளில் ஏராளமான
கலைநயம் மிக்க கோவில்களை கட்டி முடித்தான். அவை இன்றளவும் மக்களாலும்,
வரலாற்று ஆர்வலர்களாலும் போற்றப்பட்டு வருகின்றன. அவனது திறமைக்கு
கட்டியம் கூறும் தஞ்சை பெரிய கோவிலை புராதன சின்னமாக யுனெஸ்கோ
அறிவித்துள்ளது. இத்தகைய சிறப்புக்குரிய ராஜராஜ சோழன், தஞ்சை பெரிய கோவிலை
நிர்வாகம் செய்வதற்காக தென்னவன் மூவேந்த வேலன் என்பவரை நியமித்தான். அந்த
நிர்வாக அதிகாரிதான், பின் ராஜராஜனின் சிலையையும், அவனது மனைவி அரசி
லோகமாதேவி சிலையையும் வடித்தான் என்றும், அது பின்னர் தஞ்சை பெரிய
கோவிலிலேயே வழிபாட்டிற்கு வைக்கப்பட்டது என்றும் வரலாற்று ஆய்வாளர்கள்
கூறுகின்றனர்.