மலேசியா: நாளைய ஆர்ப்பாட்டங்களை ஒட்டி சாலை தடுப்புக்கள்

மலேசியா: நாளைய ஆர்ப்பாட்டங்களை ஒட்டி சாலை தடுப்புக்கள்(அண்மையச் செய்தி)



நாளை இரண்டு பேரணிகளுக்கு ஏற்பாடு செய்யப்பட்டிருப்பதை ஒட்டி கிள்ளான் பள்ளத்தாக்கில் கோலாலம்பூருக்கு செல்லும் முக்கியச் சாலைகளில் போலீசார் சாலைத் தடுப்புக்களை அமைத்துள்ளனர்.

அதனால் முக்கியச் சாலைகளில் போக்குவரத்து ஊர்ந்து கொண்டு இருக்கிறது.

பெட்டாலிங் ஜெயாவில் உள்ள கூட்டரசு நெடுஞ்சாலையிலும் கோலாலம்பூர் மருத்துவமனைக்கு அருகில் ஜாலான் பாகாங்கிலும் இரண்டு சாலைத் தடுப்புக்கள் போடப்பட்டுள்ளன.

நகருக்கு வெளியிலிருந்து ஆர்ப்பாட்டக்காரர்கள் பஸ்கள் மூலம் கொண்டு வரப்படுவதை கண்காணிப்பதற்காக ஜாலான் டூத்தா டோல் சாவடியில் போலீசார் நிறுத்தப்பட்டுள்ளனர்.

ஜாலான் சுங்கை பெசியில் ஜாலான் இஸ்தானாவுக்குள் நுழையும் எல்லா வாகனங்களையும் சோதிப்பதற்காக சாலைத் தடுப்புக்கள் அமைக்கப்பட்டுள்ளன.

நாளைய இரண்டு பேரணிகளின் மையமாக ஜாலான் இஸ்தானா விளங்கும்.

உள்நாட்டுப் பாதுகாப்புச் சட்டத்திற்கு ஆதரவாக ஒரு பேரணியும் எதிர்ப்பாக ஒரு பேரணியும் நடத்துவதற்கு இரண்டு அமைப்புக்கள் திட்டமிட்டுள்ளன.

போலீசார் கடுமையான எச்சரிக்கைகளை வெளியிட்டுள்ள போதிலும் நாளை அவற்றை நடத்துவதற்கு ஜி எம் ஐ என்ற உள்நாட்டுப் பாதுகாப்புச் சட்டத்தை ரத்துச் செய்யக் கோரும் அமைப்பும் அந்தச் சட்டத்திற்கு ஆதரவாக இருக்கும் பெவாரிஸ் என்ற அமைப்பும் உறுதி பூண்டுள்ளன.

2007 ம் ஆண்டு இறுதியில் நடைபெற்ற பெர்சே, ஹிண்ட்ராப் பேரணிகளின் போது போடப்பட்ட சாலைத் தடுப்புக்களை இப்போதைய சாலைத் தடுப்புக்கள் நினைவுபடுத்துகின்றன.

பொது மக்கள் அந்த பேரணிகளில் கலந்து கொள்வதை தடுக்கும் நடவடிக்கையாக அவை கருதப்படுகின்றன.

பெவாரிஸ் தேசியப் பள்ளிவாசலைத் தவிர்த்துள்ளது

இன்னொரு நிலவரத்தில் ஏற்கனவே திட்டமிட்டிருந்தவாறு தேசியப் பள்ளிவாசலில் கூடுவதில்லை என்று பெவாரிஸ் முடிவு செய்துள்ளது. அதற்குப் பதில் பாங்க் நெகாராவுக்கு அருகில் உள்ள பாடாங் மெர்போக்கிலும் செண்ட்ரல் மார்க்கெட்டிலும் அது ஒன்று கூடும்.

பல்வேறு சமயத் தலைவர்களுடன் ஆலோசனை நடத்திய பின்னர் நேற்றிரவு அந்த முடிவு செய்யப்பட்டதாக பெவாரிஸ் துணைத் தலைவர் ரஹிமுடின் முகமட் ஹருன் கூறினார்.

தேசியப் பள்ளிவாசலின் புனிதத் தன்மையைப் பாதுகாக்கும் பொருட்டும் அந்த முடிவு எடுக்கப்பட்டதாக அவர் சொன்னார்.

“அங்கு சமயக் கடமைகளை நிறைவேற்றச் செல்லும் மக்களுக்கு இடையூறை ஏற்படுத்தவும் நாங்கள் விரும்பவில்லை”, என்றும் ரஹிமுடின் மலேசியாகினியிடம் தெரிவித்தார்.

தேசியப்பள்ளிவாசலில் கூடுவதற்கு திட்டமிட்டுள்ள ஜி எம் ஐ ஆதரவாளர்களுடன் மோதுவதைத் தவிர்ப்பதற்காக அந்த முடிவு செய்யப்பட்டதா என்று அவரிடம் வினவப்பட்டது.

அதற்கு அவர் ” நாங்கள் அமைதியை உறுதி செய்ய விரும்புகிறோம். அங்கு கூட வேண்டிய அனைவரும் சிலாட் தற்காப்புக் கலையில் பயிற்சி பெற்றவர்களாக இருக்க வேண்டும். கைகலப்பு நிகழுமானால் அவர்களுக்கு எந்தப் பிரச்னையும் இருக்காது. ஆனால் தேசியப் பள்ளிவாசலின் புனிதத்தை பாதுகாப்பது தான் மிகவும் முக்கியம் ” என்று கூறினார்.

ஜி எம் ஐ அமைப்பு பேரணியை கைவிடுமானால் தானும் அவ்வாறு செய்யத் தயார் என்று பெவாரிஸ் திரும்பத் திரும்பக் கூறிவருகிறது.

இரண்டு அமைப்புக்களும் தங்களது பேரணியை ஒரே நேரத்தில் பிற்பகல் 2 மணிக்கு தொடங்குவதற்குத் திட்டமிட்டுள்ளன.

தேசியப் பள்ளிவாசலைத் தவிர ஜி எம் ஐ ஆதரவாளர்கள் ஜாலான் ராஜா லாவுட்டில் உள்ள சோகோ கடைத் தொகுதியிலும் மஸ்ஜித் ஜமெய்க்கிலும் ஒன்று கூட திட்டமிடப்பட்டருந்தது. பின்னர் இஸ்தானாவுக்கு அங்கிருந்து ஆதரவாளர்கள் செல்வர்.

மலேசியாஇன்று