தமிழகத்தில் காற்றாலை மூலமாக 5 ஆயிரம் மெகாவாட் மின் உற்பத்தி

by கார்த்திக் Sat Sep 04, 2010 9:42 am

கோவை, செப். 3: தமிழகத்தில் காற்றாலை மூலமாக 5 ஆயிரம் மெகவாட் மின்சாரம் உற்பத்தி செய்யப்படுகிறது. வேறு எந்த மாநிலங்களிலும் இந்த இலக்கு எட்டப்படவில்லை என்று தமிழ்நாடு எரிசக்தி வளர்ச்சி முகமை நிர்வாக இயக்குநர் ஆர்.கிறிஸ்துதாஸ் காந்தி தெரிவித்தார்.

கோயமுத்தூர் தொழில்நுட்பக் கல்லூரியில் (சிஐடி) ராஜீவ் காந்தி புதுப்பிக்கத்தக்க எரிசக்தி தினத்தையொட்டி வெள்ளிக்கிழமை நடந்த இந்த விழிப்புணர்வுக் கருத்தரங்கில் அவர் பேசியது:

சுதந்திரம் பெற்றபோது தமிழகத்தில் 50 மெகாவாட் மின் உற்பத்தி இருந்தது. தற்போது 12 ஆயிரம் மெகாவாட் மின் உற்பத்தி செய்யப்படுகிறது. அதில், 5 ஆயிரம் மெகாவாட் மின்சாரம் காற்றாலைகள் மூலமாக உற்பத்திசெய்யப்படுகிறது. காற்றாலை மின்சார உற்பத்தி இலக்கை தற்போது தமிழகம் எட்டிவிட்டது. வேறு எந்த மாநிலங்களிலும் இந்த அளவு இலக்கு எட்டப்படவில்லை. தமிழகத்தில் 30-40 சதவிகிதம் வரை காற்றாலை மின் உற்பத்தி உள்ளது.

தமிழகத்தில் 2 ஆயிரம் மெகாவாட் மின்சாரம் நமக்கு பற்றாக்குறையாக உள்ளது. 2015-ம் ஆண்டில் மின் உற்பத்தி 20 ஆயிரம் மெகாவாட் அளவு இருக்கும். அப்போதும் 2 ஆயிரம் மெகாவாட் மின் பற்றாக்குறை நிலவும் என கணித்துள்ளனர். மின் பற்றாக்குறையைப் போக்க புதுப்பிக்கத்தக்க எரிசக்தி நமக்கு கைகொடுக்கிறது.

சூரிய வெப்ப சக்தி, காற்றாலைகள் மூலமாகவும் மின்சாரம் தயாரிப்பது, பயோ-கேஸ், பயோ-மாஸ் போன்றவற்றை எரிசக்தியாகப் பயன்படுத்துவது போன்ற புதுப்பிக்கத்தக்க எரிசக்தி பயன்பாடு குறித்து நாம் விழிப்புணர்வு பெற வேண்டும்.

சூரிய வெப்ப சக்தி மூலமாக மின்சாரம் உற்பத்தி செய்ய சூரியப் பலகை தொழில்நுட்பத்தை மேம்படுத்துவதற்கான ஆய்வுகளை பொறியியல் தொழில்நுட்பத் துறை மாணவர்கள் மேற்கொள்ள வேண்டும்.

சூரியப் பலகையில் பயன்படுத்தப்படும் சிலிகான் கண்ணாடி உள்ளிட்டவற்றை வெளிநாடுகளில் இருந்து தான் இறக்குமதி செய்கிறோம். அத்தொழில்நுட்பத்தை கண்டறிந்து நாமே தயாரித்தால், இவ்வகை மின்சார பயன்பாடு கைக்கு எட்டும் தூரத்தில் மக்களுக்குச் சென்றடையும். சூரிய சக்தியில் இருந்து 1 மெகாவாட் மின்சாரம் தயாரிக்க | 15 கோடி ஆகிறது. இன்னும் 10 ஆண்டுகளில் சூரிய சக்தி மூலமாக 20 ஆயிரம் மெகாவாட் மின் உற்பத்தி செய்ய மத்திய அரசு இலக்கு நிர்ணயித்துள்ளது.

புதுப்பிக்கத்தக்க எரிசக்தி மூலம் மின்சாரம் பெறுவது சுற்றுச்சூழலுக்கு கேடு விளைவிக்காததாகும். மின்சாரம் மட்டுமல்லாது சாண எரிவாயு கலன்கள் அமைத்தல், சூரிய வெப்ப சக்தி மூலமாக உணவு தயாரித்தல், குப்பையில் இருந்து மின்சாரம் தயாரித்தல் போன்ற எண்ணற்ற பயன்களை பெறலாம் என்றார்.

அதன் பின்னர் செய்தியாளர்களிடம் அவர் கூறியது: சென்னை, மதுரை, திருநெல்வேலி, கோவையில் புதுப்பிக்கத்தக்க எரிசக்தி குறித்து விழிப்புணர்வு பயிற்சிப் பட்டறை அண்ணா பல்கலைக்கழகம் மூலமாக பல்வேறு கல்லூரிகளில் நடத்தப்பட்டது. விடுதிகளில் சமையல் பயன்பாட்டுக்கு சூரிய வெப்ப சக்தி மின்சாரத்தை பயன்படுத்த 40 கல்லூரிகளும், அதேபோல் 50 கல்லூரிகள் தெருவிளக்கு, பயோகேஸ் அமைக்கவும் விருப்பம் தெரிவித்துள்ளன. சூரிய சக்தி மூலமாக 1 மெகாவாட் மின்சாரம் தயாரிக்க 28 விண்ணப்பங்கள் வந்ததில், 7க்கு அனுமதி அளித்திருக்கிறோம். 5 மெகாவாட் மின்சாரம் தயாரிப்பதற்கான விண்ணப்பங்கள் அனுப்ப இம்மாதம் 15-ம் தேதி கடைசி நாளாகும் என்றார்.

சிஐடி கல்லூரி முதல்வர் வி.செல்லதுரை, செயலர் ஆர்.பிரபாகர், பேராசிரியர் வி.ஜெகன்நாதன், நிர்வாக அலுவலர் எஸ்.சண்முகம் உள்ளிட்டோர் கலந்துகொண்டனர்.