சவுதியில் குழந்தையைக் கொன்றதாகக் குற்றம் சாட்டப்பட்ட ரிஸானாவின் வழக்கில் புதிய திருப்பம்

2005, மே மாதத்தில் சவுதி அரேபியாவில் பணிப்பெண்ணாக இருந்த ரிஸானா நபீக் கைக்குழந்தையொன்றைக் கொன்று விட்டதாகக் குற்றம்சாட்டப்பட்ட வழக்கில் புதிய திருப்பம் ஏற்பட்டுள்ளதாகக் கூறப்படுகிறது. நபீக்கிடமிருந்து போலீசார் மீண்டும் வாக்குமூலம் எடுத்துள்ளதாகக் கூறிய இலங்கைத் தூதரகம் அதுபற்றி வேறு தகவல்கள் வெளியிடவில்லை. கடந்த வருடத்தில் இந்த வழக்கு பல நீதிமன்றங்களுக்கு மாற்றப்பட்டு, 2008 மார்ச்சில் ரியாட் உயர் நீதிமன்றத்துக்கு வந்துள்ளது.

ஆனால் நபீகின் வாக்குமூலத்தை மொழிபெயர்ப்பவர் நவம்பர் மாதத்தில் வெளிநாடு சென்றுவிட்டதால், முக்கிய சாட்சி இல்லை என நீதிமன்றம் கூறியது. புட்டிப்பால் வழங்கும்போது குழந்தையைக் கொன்றதாகக் குற்றம் சாட்டப்பட்ட நபீக் மரண தண்டனை விதிக்கப்பட்டிருந்ததை எதிர்த்து மேன்முறையீடு செய்துள்ளார்.

ஆனால் நபீக்கின் வயது அந்த சம்பவம் நடந்தபோது 17 எனவும், வேலை கிடைக்கவேண்டும் என்பதற்காக 23 வயது என போலி சான்றிதழ்கள் காட்டப்பட்டதாகவும் இப்போது கூறப்படுகிறது. ஆகவே குறைந்த வயதுடைய சிறுமியை வேலைக்கமர்த்திய குற்றம் மட்டுமல்லாமல், நபீக்கை வெளிநாட்டுக்கு வேலைக்கு அனுப்பியவர்கள் மீதும் குற்றம் கூறப்படுகிறது.

நபீக் நியாயமான தீர்ப்பைப் பெற ஏற்கனவே 5 வருடங்களை சிறையில் கழித்துவிட்டதாக அவருக்காக வாதாடும் வக்கீல் கூறுகிறார். இவரது வயது சிக்கல் தவிர, வேறொரு குற்றச்சாட்டும் வேலைக்கமர்த்தியவர் மீது சாட்டப்பட்டுள்ளது. வீட்டுப் பணியாளாராக வந்த நபீக்கை அவரது வேலைக்கு மேல்திகமாக கைக்குழந்தையைப் பராமரிக்கும்படியும் கேட்கப்பட்டுள்ளார். அந்த வேலையில் அவர் சேர்ந்து 7 நாட்களில் இந்த சம்பவம் நடைபெற்றுள்ளதால், குழந்தையின் பெற்றோர் குற்றம் சுமத்துவது போல கோபத்தையோ பழிவாங்கலையோ செய்ய போதிய காலம் இருக்கவில்லை.

இதேவேளை குற்றத்தை ஒப்புக்கொண்ட நபீக், அந்த வாக்குமூலமானது மிரட்டல்களுக்கும், போதிய மொழிபெயர்ப்பு உதவிகள் இல்லாத நிலையிலும் தாம் வழங்கியதால் அது செல்லாது என்று கூறுகிறார். குழந்தை இறந்த அதேநாளில் அந்த வாக்குமூலம் கொடுக்கப்பட்டிருந்தது. ரம்ழான் காலத்தில் குழந்தையின் பெற்றோரிடம் பேசி சமரசத்துக்கு வந்து தமது மகளைக் காப்பாற்றுமாறு நபீக்கின் பெற்றோர் அரசைக் கேட்டுள்ளனர்.