உன் ஸ்பரிஸம் கிடைக்குமா?

கார்த்திக் · கார்த்திக் Mon 30 Aug 2010 - 19:49

தொட்டுத் தூக்கி தொட்டிலிட்டு
அள்ளி அணைத்து அன்னமிட்டு
ஆராரோ சொல்லி மெல்லத் தட்டி
ஆற்று மணலில் சுட்டு விரலை
தொட்டுப் பிடித்து
அ,ஆ சொல்லிக் கொடுத்து
நம்பிக்'கை' ஊட்டிய உன்'கை'க்கு

நான் வளர்ந்து என் உழைப்பில்
உன் 'கை'க்கு
வைரத்தில் வளையலிட....
வக்கணையாய் கனவு காண.....

துயிலுரியும் துச்சாதன்ன வழிவந்த
இதயமில்லா ஈனப் பிணந்தின்னிகள்
பச்சை பழுப்பாகும் முன்
உன் உயிரை ஆய்ந்து_குப்பையென்று
கொழுத்தி விட்டான் உயிருடன்

அம்பி'கை'யும் துதிக்கும்
தும்பிக்'கை'யனும் _நீ
கொடுத்த ஈ'கை'யும்
உன் உயிரைக் காக்கவில்லை
ஈழத்தில் விளைந்த்தால் தான்
நம் வாழ்க்'கை' அழுகி{ய}றதோ!

இன்று
'கை' நிறையச் சம்பளம்
அம்மா!
எத்{துணை}தனை 'கை' வந்தாலும்
உன் 'கை' போலாகுமா?
உன் ஸ்பரிஸம் கிடைக்குமா?