மலேசியா: இசா பேரணி:இரு தரப்பும் போலீஸ் உத்தரவை மீறும்

ஒரு தரப்பு உள்நாட்டுப் பாதுகாப்புச் சட்டத்துக்கு (இசா) ஆதரவாக உள்ளது. இன்னொன்று அதை எதிர்க்கிறது. ஆனால், இரு தரப்புமே சனிக்கிழமை இசா பேரணியை நடத்துவது என்பதில் ஒரே முடிவுடன் இருக்கின்றன.

போலீசார் நேற்று எச்சரிக்கை விடுத்துள்ள போதிலும், தாங்கள் இசா பேரணியை நடத்தப்போவதாக இசா ஒழிப்பு இயக்கமான ஜிம்ஐ-யும் இசா ஆதரவு அமைப்பான பெர்முவாபக்காத்தான் உம்மாவும் (பெவாரிஸ்) இன்று தெரிவித்தன.

இன்று போலீசைச் சந்திக்கும் கூட்டத்துக்கு வருமாறு அழைப்பு வந்துள்ளபோதிலும் தமது இயக்கம் அகூட்டத்துக்குச் செல்லப்போவதில்லை என்று ஜிஎம்ஐ தலைவர் சையட் இப்ராகிம் சையட் நோ கூறினார்.

“இன்று போலீசைச் சந்தித்துப் பேசுவதால் எதுவும் மாறப்போவதில்லை. அவர்கள் ஏற்கனவே எச்சரிக்கை வெளியிட்டு விட்டனர். அத்துடன், நாங்களும் பேரணி நடத்துவதற்கான ஏற்பாடுகளில் மூழ்கியிருக்கிறோம்.”

போலீசைச் சந்திப்பதற்குப் பதிலாக பேரணி பற்றியும் அதன் நோக்கங்கள் பற்றியும் விளக்கி ஜிஎம்ஐ போலீசுக்கு ஒரு கடிதம் அனுப்பும் என்று அவர் சொன்னார்.

பெவாரிஸ் துணைத் தலைவர் 2, ரஹிமுடின் முகமட் ஹருனுடன் தொடர்புகொண்டு பேசியபோது, தம் இயக்கம் உள்நாட்டுப் பாதுகாப்புச் சட்டத்துக்கு ஆதரவாக நின்று மலாய் இனத்தையும் நாட்டையும் காக்கும் என்றார்.

பேரணியை ரத்துச் செய்யுமாறு போலீசார் வலியுறுத்தியபோதிலும் அதை நடத்தியே தீருவது என்று முடிவு செய்யப்பட்டிருப்பதாக அவர் குறிப்பிட்டார்.

“நாட்டுக்கு எது நல்லது என்பதைப் போலீஸ்காரர்கள் முடிவு செய்யக்கூடாது”, என்றாரவர்.

நேற்று கோலாலம்பூர் போலீஸ் தலைவர் முகம்மட் சப்து ஒஸ்மான், பேரணிகளைக் கைவிடுமாறு இரு தரப்பினரையும் எச்சரித்தார். அது சட்டத்துக்குப் புறம்பானது என்பதுடன் பொது ஒழுங்குக்கும் மிரட்டலாக அமையும் என்றார் அவர்.

இசா சட்டம் கொண்டுவரப்பட்டு 49 ஆண்டுகள் ஆகின்ற நிலையில் அச்சட்டம் தொடர்பான பேரணிகளுக்கும் ஏற்பாடு செய்யப்பட்டுள்ளது.இந்தக் கடுமையான சட்டம், மற்றவர்களோடு அரசியல் கருத்துவேறுபாடு கொண்டிருப்பவர்களையும் விசாரணையின்றி இரண்டு ஆண்டுகளுக்குக் காவலில் வைக்க வகை செய்கிறது. பின்னர் காவலைக் காலவரையின்றி நீட்டித்துக்கொண்டே செல்லவும் முடியும்.

ஜிஎம்ஐ-யில், 83 அரசுசாரா அமைப்புகள், அரசியல் கட்சிகள், மாணவர் அமைப்புகள், மகளிர் உரிமைப் போராட்ட அமைப்புகள்,மனித உரிமைப் போராட்ட அமைப்புகள் ஆகியவை உள்ளிட்டிருக்கின்றன. பெவாரிஸில் 12 மலாய் அரசுசாரா அமைப்புகள் பங்கு வகிக்கின்றன.

ஜிஎம்ஐ ஆதரவாளர்களிடம், சனிக்கிழமை கருப்பு அல்லது சிவப்பு உடை அணிந்து வருமாறு கூறப்பட்டுள்ளது. பெவாரிஸ், அதன் ஆதரவாளர்கள் வெண்ணிற ஆடையில் வருவதை விரும்புகிறது.

இசாவுக்கு ஆதரவான இயக்கத்தினர், பிற்பகல் ஒரு மணிக்கு பாசார் செனி, தேசியப் பள்ளிவாசல், பாடாங் மெர்போக் ஆகிய இடங்களிலிருந்து புறப்பட்டு டாட்டாரான் மெர்டேகாவில் ஒன்றுகூடுவர்.அங்கு இசாவுக்கு ஆதரவு தெரிவித்து 60 மீட்டர் நீள பதாகை ஒன்றில் கையொப்பமிடுவர்.

சோஹோ விற்பனை மையம், ஜாமெக் பள்ளிவாசல், தேசியப் பள்ளிவாசல் ஆகிய இடங்களில் ஒன்றுகூடும் ஜிஎம்ஐ ஆதரவாளர்கள் பிற்பகல் மணி 2-க்குத் தங்கள் அணிவகுப்பைத் தொடங்குவர்.

இரு தரப்பினரும் இஸ்தானா நெகாரா கோக்கிச் செல்வர்.அங்கு மாமன்னர் மிர்சான் ஜைனல் அபிடினிடம் ஒப்படைப்பதற்கான மகஜர்களை அரண்மனை அதிகாரிகளிடம் வழங்குவர்.

இரு தரப்பினரும் ஒரே வழியில்தான் இஸ்தானா நெகாராவை நோக்கிச் செல்வார்கள் என்பதால், ஊர்வலத்தின் இறுதிக் கட்டத்தில் ஒரு மோதல் நிகழலாம் என்று அஞ்சப்படுகிறது.

ஜிஎம்ஐ பேரணியில், பக்காத்தான் ரக்யாட் பெருந்தலைகள் அன்வார் இப்ராகிம், பாஸ் ஆன்மீகத் தலைவர் நிக் அப்துல் அஜீஸ் நிக் மாட், ஜசெக மூத்த தலைவர் லிம் கிட் சியாங் முதலியோர் கலந்துகொள்வார்கள் என்று எதிர்பார்க்கப்படுகிறது.

அரசாங்கம் இசாவை மறுஆய்வு செய்யவிருப்பதைக் கருதி பேரணி வேண்டாம் என்று அம்னோ இளைஞர் தலைவர் கைரி ஜமாலுடின் அறிவுறுத்தியிருப்பதால், பெவாரிஸ் பேரணியில் முக்கிய புள்ளிகள் இடம்பெற மாட்டார்கள் என்று தெரிகிறது.

பெவாரிஸிடம் 5,000 உறுப்பினர்கள்தாம் உள்ளனர். அந்த வகையில் இசா-ஆதரவு இயக்கத்தினரைவிட இசா-எதிர்ப்பு இயக்கத்தினர் எண்ணிக்கை அதிகமாக இருக்கும் என்று ரஹிமுடின் கூறினார்.

“முன்னேற்பாடுகள் செய்வதற்குக்கூட எங்களிடம் பணம் இல்லை. எங்கள் நோக்கங்களை விளக்கும் அறிக்கைகள் தயாரிப்பதற்குக்கூட பணமில்லை. ஜிஎம்ஜி-க்குப் பணம் கொடுத்து ஊக்குவிப்பவர்கள் நிறைய உண்டு. பக்காத்தான் தலைவர்கள் நிறைய உதவுகிறார்கள்”, என்று அவர் கூறிக்கொண்டார்.

கடந்த காலங்களில், கோலாலம்பூரில் பேரணிகள்- பெர்சே பேரணி ,இண்ட்ராப் பேரணி- நடைபெற்றபோது போலீசார் அவற்றுக்கு எதிராகக் கண்ணீர் புகைக் குண்டுகளை வீசியும் பீரங்கிகளில் நீரைப் பீய்ச்சியடித்தும் கடுமையாக நடந்துகொண்டது குறிப்பிடத்தக்கது.