இலக்கை குறிபார்த்து சுடத் தெரியாத போலீசார்

பெங்களூரு : "பெங்களூரு மாநகர போலீசாரில் 20 சதவீதம் பேருக்கு மட்டுமே, இலக்கை குறிபார்த்து சரியாக சுடத் தெரிகிறது. மற்றவர்களுக்கு சரியாக குறி பார்த்து சுடத் தெரியவில்லை'என்ற பரபரப்பு தகவல் வெளியாகியுள்ளது.

கர்நாடகா போலீஸ் வட்டாரங்கள் கூறியதாவது:மும்பையில் கடந்த 2008ல் நடந்த பயங்கரவாத தாக்குதல் சம்பவத்துக்கு பின், நாடு முழுவதும் உள்ள முக்கிய நகரங்களுக்கு பயங்கரவாதிகளால் எந்த நேரத்திலும் ஆபத்து ஏற்படலாம் என்ற கவலை எழுந்துள்ளது. இதனால், மாநகர போலீசில் பணியாற்றுவோர் திறமையானவர்களாக இருக்க வேண்டும் என, போலீஸ் உயரதிகாரிகள் கருதுகின்றனர்.இந்நிலையில், பெங்களூரு மாநகர போலீசில் பணியாற்றும் போலீசாருக்கான துப்பாக்கி சுடும் பயிற்சி சமீபத்தில் நடந்தது. இதில் காவலர் முதல், உயர் போலீஸ் அதிகாரிகள் வரையிலான அனைவரும் பங்கேற்றனர்.ஆச்சரியம் அளிக்கும் வகையில், இதில் பங்கேற்ற போலீசாரில் 20 சதவீதம் பேருக்கு மட்டுமே, இலக்கை சரியாக குறிபார்த்து சுடத் தெரிந்தது. அதிலும் வெறும் ஐந்து சதவீதம் பேரால் மட்டுமே வட்டத்திற்குள் உள்ள குறிப்பிட்ட இலக்கை சரியாக சுட முடிந்தது. மற்றவர்களால் சரியாக சுட முடியவில்லை.இந்த விவகாரத்தில், போலீசாரின் திறமை மீது உயர் போலீஸ் அதிகாரிகளுக்கும் மட்டுமல்லாமல், பொதுமக்களுக்கும் கவலையை ஏற்படுத்தியுள்ளது. போலீசாருக்கான துப்பாக்கி சுடும் பயிற்சி, குறிப்பிட்ட கால இடைவெளிகளில் அவ்வப்போது நடத்தப்பட வேண்டும் என்றும், இந்த பயிற்சியில் அனைத்து போலீசாரும் தவறாமல் பங்கேற்க வேண்டும் என்றும் கோரிக்கை எழுந்துள்ளது.

"துப்பாக்கி சுடும் பயிற்சியில் ஒரு சில போலீசார் பங்கேற்பது இல்லை. அவர்கள் மீது ஒழுங்கு நடவடிக்கை எடுக்கப்பட வேண்டும். இல்லையெனில், மும்பை தாக்குதல் போன்ற அசம்பாவிதங்கள் பெங்களூரில் நிகழ்ந்தால், அதை எதிர்கொள்வது மிகவும் சிரமம்'என்பது போலீஸ் உயரதிகாரிகளின் கவலையாக உள்ளது.இவ்வாறு போலீஸ் வட்டாரங்கள் தெரிவித்தன.

தினமலர்