அறுப்பின் சட்டம் - பெண்கள் பிராணிகளை அறுக்கலாமா?

சபீர் · சபீர் Thu 26 Aug 2010 - 12:01

கேள்வி:-
அஸ்ஸலாமு அலைக்கும் வரஹ்,

எனக்கு சில சந்தேகங்கள்

1- ஆடு மாடு கோழி அறுக்கும் போது நாம் சில சட்டங்களைப் பின்பற்றுகிறோம்.ஆனால் மீன் வகைகளுக்கு இதனைப் பின்பற்றுவது இல்லையே ஏன்?

2- ஆடு மாடு கோழி பெண்கள் அறுக்க அனுமதி உண்டா? குர்ஆன் வல் ஹதீஸ் அடிப்படையில் விளக்கம் கொடுக்கவும்?

சபீர் · சபீர் Thu 26 Aug 2010 - 12:02

பதில்:-
வ அலைக்குமுஸ்ஸலாம் வரஹ்,
1- ஆடு மாடு கோழி அறுக்கும் போது நாம் சில சட்டங்களைப் பின்பற்றுகிறோம்.ஆனால் மீன் வகைகளுக்கு இதனைப் பின்பற்றுவது இல்லையே ஏன்?
''அல்லாஹ்வின் தூதரே! குறைந்த அளவு தண்ணீரை எடுத்துக்கொண்டு நாங்கள் கடலில் பிரயாணம் செய்கிறோம். நாங்கள் அந்தத் தண்ணீரில் உளூச் செய்தால் தாகத்தால் சிரமப்படுவோம். ஆகவே, கடல் நீரால் உளூச் செய்யலாமா?'' என்று ஒரு மனிதர் நபி (ஸல்) அவர்களிடம் கேட்டார். ''கடல் நீர் சுத்தப்படுத்துவதற்கு ஏற்றதாகும். அதில் செத்தவைகளும் (உண்பதற்கு) அனுமதிக்கப்பட்டவையாகும்'' என்று நபி (ஸல்) அவர்கள் கூறினார்கள். அறிவிப்பவர் அபூஹுரைரா (ரலி) (நூல்கள் - திர்மிதீ 64, நஸயீ, அபூதாவூத், அஹ்மத், முஅத்தா, இப்னுமாஜா, தாரிமீ, இப்னுஹிப்பான், ஹாகீம், பைஹகீ)
கடல் நீர் வாழ் பிராணிகளில் செத்தவையும் உண்ண அனுமதிக்கப்பட்டிருப்பதால், இறை நாமம் கூறி அறுத்து உண்பதற்கு அனுமதிக்கப்பட்ட கால்நடை பிராணிகளுக்குள்ள சட்டம் மீனுக்கு இல்லை!
இறைத்தூதர்(ஸல்) அவர்கள் கடற்கரையை நோக்கி ஒரு படையை அனுப்பினார்கள். அந்தப் படையினருக்கு அபூ உபைதா இப்னு ஜர்ராஹ்(ரலி) அவர்களைத் தளபதியாக ஆக்கினார்கள். அவர்கள் (படையினர்) முந்நூறு பேர் இருந்தனர். அவர்களில் நானும் ஒருவனாயிருந்தேன். நாங்கள் புறப்பட்டோம். பாதி வழியிலேயே எங்கள் கையிருப்பில் இருந்த (பயண) உணவு தீர்ந்து போய்விட்டது. அபூ உபைதா(ரலி) அந்தப் படையின் (கைவசமிருந்த) கட்டுச் சாதங்கள் அனைத்தையும் ஒன்று திரட்டும் படி உத்தரவிட்டார்கள். அவ்வாறே அவை அனைத்தும் ஒன்று திரட்டப்பட்டன. இரண்டு பைகள் (நிறைய) பேரீச்சம் பழங்கள் சேர்ந்தன. அபூ உபைதா(ரலி) அவற்றை எங்களுக்கு ஒவ்வொரு நாளும் சிறிது சிறிதாகக் கொடுத்து வந்தார்கள். இறுதியில், அவையும் தீர்ந்து போய்விட்டன. எங்களுக்கு (ஆளுக்கு) ஒவ்வொரு பேரீச்சம் பழம்தான் கிடைத்து வந்தது.

...இதை ஜாபிர்(ரலி) சொன்னபோது, இதைக் கேட்டுக் கொண்டிருந்த அறிவிப்பாளர் வஹ்ப் இப்னு கைஸான்(ரஹ்), 'ஒரு பேரீச்சம் பழம் எப்படி போதும்?' என்று கேட்டதற்கு ஜாபிர்(ரலி), 'அதுவும் தீர்ந்து போன பின்புதான் அதன் மதிப்பை நாங்கள் உணர்ந்தோம்" என்று பதிலளித்தார்கள்..

பிறகு நாங்கள் கடல் வரை வந்து சேர்ந்து விட்டோம். அங்கு தற்செயலாக சிறிய மலை போன்ற (திமிங்கல வகை) மீன் ஒன்று கிடைத்தது. அதிலிருந்து (எங்களுடைய) அந்தப் படை பதினெட்டு நாள்கள் உண்டது. பிறகு அபூ உபைதா(ரலி) அதன் விலா எலும்புகளிலிருந்து இரண்டு விலா எலும்புகளை பூமியில் நட்டு வைக்கும்படி உத்திரவிட்டார்கள். அவ்வாறே, அவை இரண்டும் நட்டப்பட்டன. பிறகு, ஒட்டகத்தை அதன் கீழே ஓட்டிச் செல்லும்போது உத்திரவிட்டார்கள். அவ்வாறே ஓட்டிக் செல்லப்பட்டது. அது (அந்தத் திமிங்கலத்தின்) விலா எலும்புகளின் கீழே சென்றது. ஆனால், அவற்றை அது தொடவில்லை. அறிவிப்பவர் ஜாபிர் இப்னு அப்தில்லாஹ்(ரலி) (நூல் - புகாரி 2483)
சுவனவாசிகள் முதலில் உண்ணும் உணவு மீனின் ஈரல் பகுதியில் உள்ள சதையாகும் என புகாரி 3329 அறிவிப்புகளில் பதிவுசெய்யப்பட்டுள்ளன!

சபீர் · சபீர் Thu 26 Aug 2010 - 12:03

2- ஆடு மாடு கோழி பெண்கள் அறுக்க அனுமதி உண்டா? குர்ஆன் வல் ஹதீஸ் அடிப்படையில் விளக்கம் கொடுக்கவும்?

பிராணிகளை அறுப்பதில் ஆண், பெண்ணுக்கென தனிச் சட்டம் எதுவுமில்லை. அறுக்கும் பிராணிகளைக் கட்டுப்படுத்தி அறுக்க இயன்றவர் அறுக்கலாம். பெண்கள் ஆடு, மாடு, ஒட்டகம், கோழி ஆகியவற்றை அறுக்கலாம். பெண்கள் அறுக்கும் பிராணிகளின் இறைச்சியை உண்ணலாம் எனவும் நபி (ஸல்) அவர்கள் கூறியிருக்கிறார்கள்.

கஅபு இப்னு மாலிக் (ரலி) அவர்களின் அறிவிப்பு:

'ஸல்வு' எனுமிடத்தில் மேயக்கூடிய சில ஆடுகள் எங்களுக்குச் சொந்தமாக இருந்தன. அந்த ஆடுகளில் ஒன்று சாகும் தருவாயில் இருப்பதை எங்களின் அடிமைப்பெண் பார்த்துவிட்டு, ஒரு கல்லை (கூர்மையாக) உடைத்து, அதன் மூலம் அந்த ஆட்டை அறுத்தார். 'நபி(ஸல்) அவர்களிடம் இதுபற்றி நான் கேட்கும் வரை சாப்பிடாதீர்கள்!" என்ற கூறினேன். நபி(ஸல்) அவர்களிடம் கேட்டதற்கு அதை சாப்பிடுமாறு கூறினார்கள்.

'நபி(ஸல்) அவர்களிடம் இது பற்றி நான் கேட்கும் வரை என்பதற்கு பதிலாக நபி(ஸல்) அவர்களிடம் இது பற்றி நான் ஆளனுப்பிக் கேட்கும் வரை' என்று கூட கஅபு(ரலி) சொல்லியிருக்கலாம்!' என்று அறிவிப்பாளர்
(சந்தேகத்துடன்) கூறுகிறார்.

"ஓர் அடிமைப் பெண் இவ்வாறு ஆட்டை அறுத்திருப்பது எனக்கு வியப்பை அளிக்கிறது!' என்று
உபைதுல்லாஹ்(ரஹ்) கூறினார். (புகாரி - 2304, 5502, 5504, 5505)

Sponsored content · Sponsored content

அறுப்பின் சட்டம் - பெண்கள் பிராணிகளை அறுக்கலாமா?

அறுப்பின் சட்டம் - பெண்கள் பிராணிகளை அறுக்கலாமா?

Re: அறுப்பின் சட்டம் - பெண்கள் பிராணிகளை அறுக்கலாமா?

Re: அறுப்பின் சட்டம் - பெண்கள் பிராணிகளை அறுக்கலாமா?

Re: அறுப்பின் சட்டம் - பெண்கள் பிராணிகளை அறுக்கலாமா?

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக