வெடிகுண்டு முருகேசன் - திரை விமர்சனம்

**சிவா** · **சிவா** Wed Jul 29, 2009 2:49 am

தினமலர் விமர்சனம்

ராஜபாளையம் கடைத்தெருவில் கைவண்டி வைத்துக் கொண்டு கடைக்கு கடை குடிதண்ணீர் பிடித்து சப்ளை செய்யும் பசுபதி, அவ்வப்போது பொதுமக்களுக்கு சேவை செய்கிறேன் பேர்வழி... என போலீசில் மாட்டிக் கொண்டு விழி பிதுங்குகிறார். அவருக்கும் அந்த ஊர் ‌போலீஸ் ஸ்டேஷனுக்கு புதிதாக வரும் பெண் காவலர் ஜோதிர்மயிக்கும் இடையில் காதல்! இந்த காதலையும், அது சார்பான கலாட்டாக்களையும் எவ்வளவு கலகலப்பாக சொல்ல முடியுமோ அவ்வளவு கலகலப்பாகவும், காமெடியாகவும் சொல்லி இருக்கிறார் இயக்குனர் மூர்த்தி!

வெடிகுண்டு முருகேசனாக பசுபதி வெளுத்து வாங்கி இருக்கிறார். அவர் அவரது பெயர் காரணம் கூறுவதில் ஆரம்பித்து படம் முழுக்க காலை தாங்கி தாங்கி நடந்தபடி செய்யும் சேட்டைகள் சுவாரஸ்யம். மேக்கப் இல்லாத பசுபதி ஜோதிர்மயியுடன் ஆட்டம் - பாட்டம் என படம் முழுக்க கலாட்டா செய்திருப்பது மேலும் காமெடி.

பெண் காவலர் நாச்சியாராக பந்தோபஸ்துக்கும், பசுபதியுடன் பாதுகாப்பாக கோர்ட்டுக்கும் வரும் போதெல்லாம் அழும் பெண் காவலராக ஜோதிர்மயி, சும்மா தூள் ஆயி1

வில்லன் லோசுகர் கணேசனாக வீராவும், அவரது தம்பி கொடாஞ்சானாக ரனீஷூம், உஷ்ஷ் ஆக ஜார்ஜ்.. இவர்களுடன் டி.பி.கஜேந்திரன், பாவா லெட்சுமணன் ஆகியோரும் காமெடி கலாட்டா புரிந்திருக்கின்றனர் என்றாலும் அலாட் ஆறுமுகமாக வந்து அலறடிக்கும் வடிவேலு காமெடி காட்சிகள் முன் பசுபதி முதல் பாவா லெட்சுமணன் வரை சகலரும் ஜகா வாங்கி காணாமல் போகின்றனர் என்றால் மிகையல்ல! சபாஷ் ‌வெடி சாரி.. வடிவேலு!

பசுபதியின் பள்ளித் தோழி பொன்னியாக படம் முழுக்க மனநிலை பாதிக்கப்பட்ட கேரக்டரில் வரும் தீபா சில இடங்களில் ஐயோ பாவம் எனும் எண்ணத்தை கிளப்பினாலும், பல இடங்களில் செம கோபத்தையும் கிளப்புகிறார். இயக்குனர் மூர்த்தியும், படத்தொகுப்பாளர் ஸ்ரீகாந்தும் நினைத்திருந்தால் இந்த அவர்ஷனை குறைத்திருக்கலாம்!.

எம்.எஸ்.பாலபரணியின் ஒளிப்பதிவும், தினாவின் இசையும் படத்தை நம் மனதில் பசை போட்டு ஒட்ட வைக்கிறது. கருப்பசாமி குத்தகைதாரர் படம் மூலம் நடிகர் கரணுக்கு ஒரு இடத்தை பிடித்துக் கொடுத்த இயக்குனர் மூர்த்தி, தனது இரண்டாவது படமான வெடிகுண்டு முருகேசன் மூலம் பசுபதிக்காக பாடுபட்டிருக்கிறார். அதில் பாதி வெற்றி.. மீதி...?!

வெடிகுண்டு முருகேசன் : காமெடி கதிரேசன்!

**சிவா** · **சிவா** Wed Jul 29, 2009 2:50 am

விகடன் விமர்சனம்

சிறு வயதில் குண்டாக இருந்ததால் குண்டு முருகேசன் என்று எல்லோரும் கூப்பிட அவமானமாகிவிடுகிறது முருகேசனுக்கு. குண்டுக்கு முன்னால் ஏதாவது சேர்த்தால் கெத்தாக இருக்குமே என தானாக சேர்த்துக் கொண்ட அடைமொழிதான் வெடிகுண்டு முருகேசன். கடைகளுக்கு தள்ளுவண்டியில் தண்ணீர் சப்ளை செய்யும் முருசேன். குடித்து விட்டு வண்டி ஓட்டுவது தொடங்கி கவர்ன்மென்ட் பஸ்ஸை கடத்துவது வரை அடிக்கும் லூட்டிகளால் அவ்வப்போது போலீஸின் சிறப்பு விருந்தாளியாகிறார். அலப்பறை முருகேசனுக்குள் இருக்கும் ஈர மனசுக்கு சாட்சியாக வருகிறாள் பொன்னி. சிறு வயது பள்ளி தோழியாகிய பொன்னி ஒரு மன நோயாளி. அவளை அவளது குடும்பமே கொன்றுவிட தீர்மானிக்கும் சூழலில், பொன்னியை காப்பாற்றி தன்னுடனேயே அழைத்துக்கொண்டு திரிகிறார். பொன்னியை வில்லன் குறிவைக்க.... பசுபதி அவரை துரத்த... அதன் பிறகு நடக்கும் சேஸிங் எபிசோட்... மீதி குண்டு.

எந்த ஹீரோயிசமும் இல்லாமல் மடித்து கட்டிய கைலியோடு கடைகளுக்கு தண்ணீர் சப்ளை செய்யும் பாத்திரத்தில் இயல்பாக பொருந்துகிறார் பசுபதி. இப்பப் பாட்டு போடுவாய்ங்க... டான்ஸ் வேற ஆடணுமா? என்று அப்பாவியாக யோசிக்கும்போது கிளாப்ஸ் அள்ளுகிறார். இவர் வழக்குகளில் மாட்டும் போதெல்லாம் அதை வைத்து குழப்ப குத்து குத்துவதெல்லாம் ஓ.கே.,தான். ஆனால், படத்தின் முன்பாதி முழுக்க பசுபதி பேசுகிறார். பேசுகிறார், பேசிக்கொண்டே இருக்கிறார்.

லூஸூப் பொண்ணு கான்ஸ்டபிளாக ஜோதிர்மயி பல காட்சிகளில் அப்படியே லைலாவை இமிடேட் செய்திருக்கிறார். பசுபதி சிறைக்கு போன பிறகு மனநோயாளியான பொன்னியை வைத்து காப்பாற்றும் காட்சியில் நெகிழ வைக்கிறார். ஆனால், சில சமயங்களில் லூஸூப்பொண்ணாகவும், சில சமயங்களில் முதிர்ச்சியாகவும் வருவதால் ஜோதிர்மயியின் பாத்திரம் நம்மை குழப்புகிறது. பசுபதியை கை விலங்குடன் அழைத்து செல்லும்போது, பாத்ரூம் போவதற்காக கைவிலங்கோடு பசுபதியை டிரான்ஸ்பார்மரில் கட்டிவிட்டு போக அந்த நேரம் பார்த்து பசுபதிக்கு வலிப்பு வர, கூட்டமே ஜோதிர்மயியை வசைபாடும்போது ஜோர் மயி.

நீண்ட நாட்களுக்கு பிறகு காமெடியில் கலக்கி இருக்கிறார் வடிவேலு. காணாமல் போன மாட்டை கண்டுபிடிக்க முத்துக்காளை பீப்பி ஊத, பக்கத்தில் துண்டு விரித்து கல்லா கட்டும் அறிமுகக் காட்சியே அசத்தல். ஹோட்டலில் சாப்பிடும்போது மொத்தக் கண்களும் வடிவேலுவை கண்காணிக்க, அசால்ட்டாக லைட்டை ஆப் செய்து எஸ்கேப் ஆகும் காட்சி, பசுபதியோடு ஹோட்டலுக்கு போய் முறைத்து கொண்டே சாப்பிடும் காட்சி என எல்லாமே கைத்தட்டல் ரகம்.

வில்லன்னா என்டர்டெயின்மென்ட் இருக்கக்கூடாதா? என்று எப்.எம்.மில் நேயர் விருப்பம் கேட்கும் வில்லன் வீரா அசத்தல் அறிமுகம். ஆனால் இவர் வில்லனா, காமெடியனா என புரியாத அளவுக்கு எதிர்பாராத நேரங்களில் எல்லாம் காமெடி குருமா ஊத்துக்கிறார்கள். மனநோயாளி பெண்ணாக வரும் தீபாவும் பெரிதாக ஈர்க்கவில்லை. இரண்டே காட்சிகளில் வந்தாலும் நீ கொடுக்கிற சம்பளத்துக்கு பில்டப்தான் கொடுக்க முடியும் என்று காலை வாரும் காமெடி அடியாள் பாத்திரத்தில் அசத்தியிருக்கிறார் சூப்பர்குட் லட்சுமணன்.

தினாவின் இசையில் ரோட்டோரம் வீட்டுக்காரி ஆட வைக்கிறது என்றால், நீண்ட ‌தூரம் செல்லும் பாதை மயிலிறகு மெலடி. சின்னச் சின்னதாக சினிமாத் தனங்களை கலாய்க்கும் காட்சியில் இயக்குனர் ஏ.ஜி.மூர்த்தியின் புத்திசாலித்தனம் பளிச்சிடுகிறது. கிளைமாக்ஸ் காட்சியில் வில்லன் திருந்துவதை இன்னும் நக்கல் அடித்திருக்கலாம். மொத்த படத்திலும் கைத்தட்டல் வாங்கும் காட்சிகளில் கூட ஒரு பெர்பெக்ஷன் இல்லை. அவ்வப்போது பசுபதி இலக்கிய, அரசியல் சிறுபத்திரிகைகளை வைத்துக்கொண்டு திரிவது ஏன் என்றும் தெரியவில்லை.

சினிமாத் தனங்களை கிண்டலடிக்கும் இயக்குனர் மனநோயாளி பெண்ணை பசுபதி அழைத்து செல்லும் காட்சியில் முழு சினிமாத் தனத்தை அனுமதித்தது ஏனோ? சில லாஜிக் மீறல்கள். வளவள வசனங்கள், கருத்துக் குத்துகள், அழுவாச்சி செண்டிமென்ட்கள், சீரற்ற திரைக்கதை இவற்றையெல்லாம் சரி செய்திருந்தால், வெடிகுண்டு முருகேசன் இன்னும் கொஞ்சம் வீரியமாக வெடித்திருப்பான்.

விகடன் மார்க் : 39/100